Əhliman Əmiraslanov görüşlər keçirir
Seçicilər Əhliman Əmiraslanovu dəstəkləyir
“Daim sizinləyik”, “Sizi dəstəkləyirik!”, “Həmişə yanımızda olan deputatımıza yenə səs verəcəyik”. Bu bəyanatlar 65 saylı Saatlı-Sabirabad-Kürdəmir seçki dairəsindən deputatlığa namizəd olan akademik Əhliman Əmiraslanovun seçiciləri ilə görüşündə səslənib.
xural.com-a daxil olan məlumatda bildirilir ki, Əhliman Əmiraslanovun seçicilərlə keçirilən silsilə görüşlərindən növbəti görüş rayonun Varxan kəndində baş tutmuşdur. Bu görüşdə Varxan kəndi ilə yanaşı ətraf Qaralar, Qaracalar, Seyidlər, Potubəyli, Əlisoltanlı və Gomuşçu kəndlərinin sakinləri də iştirak ediblər. Görüş zamanı Əhliman Əmiraslanov Azərbaycan Respublikası Prezidenti cənab İlham Əliyevin rəhbərliyi ilə Azərbaycandakı iqtisadi inkişaf, dövlətin daxili və xarici siyasətində qazanılan uğurlardan bəhs edib. O, bu uğurların davamlı olması istiqamətində atılan addımlardan söz açaraq Azərbaycan vətəndaşının rifah halının yaxşılaşdırılması üçün görülən tədbirlərin davamlı olacağına əmin olduğunu bildirib.
Ə.Əmiraslanov qeyd edib ki, “ötən 5 il ərzində Nərimankənd, Məzrəli, Mustafabəyli, Qıraqlı, Əlisoltanlı, Qaracalar, Varxan kənd tam orta məktəblərində, Bəylər, Potubəyli, Dəlilər, Kamallı, Hacıqasımlı ümumi orta məktəblərində hər il cari təmir işləri görülmüşdür. Rayonun Əlisoltanlı kəndində 5 km, Seyidlər kəndində 5 km, Qaracalar kəndində 4 km,Gomuşçu kəndində 4 km, Varxan kəndində 6 km, Yeni Novruzlu kəndində 5,5 km, Bəylik kəndində 5 km, Mustafabəyli kəndində 3,5 km, Qıraqlı kəndində 10,5 km olmaqla cəmi 48,5 km uzunluğunda kənddaxili yollara çınqıl döşənmişdir. Bu müddət ərzində millət vəkilinin ünvanına Saatlı rayonundan – 291 yazılı müraciət daxil olmuş, bunlardan 195-i sosial, 17-i iqtisadi, 79-u digər problemlərlə bağlı olmuşdur. Yazılı müraciətlərdən 173-ü müsbət həll olunmuşdur. O cümlədən, ötən 5 il ərzində deputat Əhliman Əmiraslanovun təşəbbüsü ilə Saatlıya 16 dəfə müxtəlif ixtisaslı həkim briqadaları ezam edilmişdir. Bu aksiyalar zamanı rayon və ətraf kənd sakinləri müxtəlif ixtisaslı həkimlər tərəfindən tibbi müayinələrdən keçirilmiş, tövsiyyələr və ixtisaslaşmış tibbi yardım almışlar. Aparılmış müayinələrin nəticəsi olaraq 39 nəfər seçici Bakıya göndərilərək müxtəlif (göz, onkoloji, ginekoloji, lor, neyrocərrahiyyə və.s.) cərrahi əməliyyatlar olunub”.
Sonra seçicilər çıxış edərək məmnuniyyətlə qeyd ediblər ki, bu illər ərzində Əhliman Əmiraslanov həmişə seçicilərinin dərdinə şərik olub. Mütəmadi olaraq seçiciləri ilə görüşlər keçirib, insanları narahat edən məsələlərin həllində onlara yaxından kömək göstərib. Görüşə toplaşanlar vurğulayıblar ki, Ə.Əmiraslanov dəfələrlə ağır xəstəliyi olan seçicilərin cərrahi əməliyyatını təşkil edib, aztəminatlı ailələrə köməyini əsrigəməyib.
Görüşdə seçicilərin mövqeyi eyni olub – onlar birmənalı olaraq qarşıdan gələn parlament seçkilərində də öz deputatları Əhliman Əmiraslanova səs verəcəklərini deyərək ona uğurlar arzulayıblar.
xural.com