6 özəl klinikanın fəaliyyəti dayandırıldı
Səhiyyə Nazirliyi özəl tibb müəssisələrində yoxlamalar apardı
xural.com-un Səhiyyə Nazirliyi mətbuat xidmətinin məlumatına əsaslanaraq xəbər verir ki, Nazirlik dövlət tibb müəssisələrində olduğu kimi, özəl tibbi xidmətin keyfiyyətinin yaxşılaşdırılması istiqamətində həyata keçirdiyi mütəmadi yoxlama tədbirləri nəticəsində6 özəl tibb müəssisəsinin fəaliyyəti dayandırılıb.
Belə ki özəl tibb müəssisələri tərəfindən göstərilən tibbi xidmətin keyfiyyətinin yaxşılaşdırılması və qanunsuz tibbi xidmətlərin göstərilməsinin vaxtında qarşısının alınması istiqamətində keçirilən yoxlamalar zamanı bəzi özəl tibb müəssisələrində qanun pozuntuları aşkar olunub və bir sıra sahibkarlıq subyektləri barəsində inzibati-məcburedici tədbirlər görülüb.
2015-ci ilin birinci yarım illiyində aparılmış yoxlamalar nəticəsində altı özəl tibb müəssisəsinin (“VİP Dental” MMC, “Loğman Klinikası” MMC, “İnvitro” MMC, “Starmed” MMC, “Faiq-96” Müəssisəsi, “Nihat Klinikası” MMC) fəaliyyəti (müəyyən olunan tarixədək) dayandırılıb.
Üç özəl tibb müəssisəsinə (“Zaman Tibb Mərkəzi” MMC, “Assmed” MMC, “Medservis” Özəl Tibb Mərkəzi) verilmiş xüsusi razılığın (lisenziyanın) əlavəsindən stasionar xidmət tam çıxarılaraq yalnız poliklinik xidmət saxlanılıb.
Lisenziya olmadan və ya lisenziyadan kənar fəaliyyət göstərdiklərinə görə 28 özəl tibb müəssisələri və tibbi xidmət göstərən fiziki şəxslər barəsində Azərbaycan Respublikası İnzibati Xətalar Məcəlləsinin müvafiq olaraq 64.1-ci və 65-3.1-ci maddələrinə uyğun olaraq cərimə tətbiq edilib.