Əvəz Zeynallı məhkəmə heyətinə etirazını bildirib.

13.02.2014

Fevralın 13-də Bakı Apellyasiya Məhkəməsində hakim Cəmilə Səfiyevanın sədrliyi ilə “Xural” qəzetinin həbsdə olan baş redaktoru Əvəz Zeynallının şikayəti üzrə məhkəmə prosesi davam edib.

Xatırladaq ki, Əvəz Zeynallı Mətbuat Şurasına qarşı qaldırdığı iddia ilə bağlı Nərimanov Rayon Məhkəməsinin çıxardığı qərardan apellyasiya şikayəti edib. Məhkəmə “xəbərdarlığın ləğv edilməsi, xüsusi rəyin etibarsız hesab edilməsi, iclas protokolunun hissəvi etibarsız hesab olunması, işgüzar nüfuza vurulmuş zərərin tutularaq ödənilməsi, cavabdeh qurumun vəzifəli şəxsləri barədə xüsusi qərardad qəbul edilməsi, təkzib verməklə üzr istənilməsi tələbi”nə baxır.

Cavabdeh tərəf olan Mətbuat Şurasının nümayəndəsi, eləcə də iddiaçı tərəfin vəkili E.Sadıqov məhkəmədə iştirak etməyib.   Əvəz Zeynallı məhkəmə iclasına gətirilərkən “şüşə kabinə”yə salınmasına qəti etirazını bildirib və xatırladıb ki, iclasda mülki işə baxıldığından onun kabinədə dayanmasına ehtiyac yoxdur. Ə.Zeynallının vəsatəti qəbul olunub və o məhkəmə zalında əyləşdirilib. Bundan sonra Ə.Zeynallı məhkəmə heyətinə etirazını bildirib. 10 dəqiqəlik fasilə zamanı Ə.Zeynallı etirazını yazılı şəkildə təqdim edib. Hakim C.Səfiyeva bu vəsatətə Apellyasiya Məhkəməsinin sədrilə razılaşdıqdan sonra məlumat veriləcəyini deyib. Bununla yanaşı məhkəməni davam etdirmək istəyən hakimi Ə.Zeynallı qanunlara hörmətlə yanaşmağı tövsiyə edib və vəsatətə baxılmayana qədər məhkəmə iclasının davam etdirilməsinin qanunsuz olduğunu deyib.

Məhkəmə iclası 14 fevral 2014-cü il saat 14:30-a qədər təxirə salınıb.

Məlumat üçün bildirək ki, Mətbuat Şurası 2011-ci ildə “Xural”ı “reket qəzet” elan edib və qəzetin adını “qara siyahı”ya salıb. Əvəz Zeynallı Şuranın bu qərarının qanunsuz hesab olunması, Mətbuat Şurasının səlahiyyətlərini aşmaqda təqsirli bilinərək xüsusi qərardad çıxarılması üçün Nərimanov Rayon Məhkəməsinə müraciət edib. Məhkəmə iddianı təmin etməyib. Əvəz Zeynallı Apellyasiya şikayəti verib. Bakı Apellyasiya Məhkəməsinin hakimi Cəmilə Səfiyeva Bakı Apellyasiya Məhkəməsinin hakimi Cəmilə Səfiyeva Məlumat üçün bidirək ki, Prezident Administrasiyasının rəhbəri Ramiz Mehdiyevin “Xural” qəzetinə qarşı məhkəmədə iddia qaldırmasından sonra Mətbuat Şurası qəzeti “reket qəzet” elan edib və gündəlik nəşrə başlayan qəzetin fəaliyyətini dayandırmaq üçün onu “qara siyahıya” saldığını bəyan edib. Baş redaktor isə həbsindən 1 ay əvvəl baş verən bu hadisəni “siyasi sifariş” kimi dəyərləndirib və Mətbuat Şurası haqqında məhkəmə qarşısında iddia qaldırıb. Ə.Zeynallı onu da bildirib ki, Azərbaycan məhkəmələri işə ədalətli baxmadığı təqdirdə, onu Avropa Məhkəməsinə qədər aparmaq niyyətindədir. Yanvarın 16-da Apellyasiya Məhkəməsində keçirilən iclasda jurnalistin vəkili Elçin Sadıqovun Əvəz Zeynallının Bakı Apellyasiya Məhkəməsinə gətirilməsi üçün qaldırdığı vəsatət təmin olunub. QEYD: Əvəz Zeynallı 2011-ci ilin oktyabr ayında Milli Məclisin sabiq deputatı, hazırda özü haqqında AR CM-nin 178-ci maddəsilə – Dələduzluq – cinayət işi qaldırılan Gülər Əhmədovanın əsassız, fakt və dəlil-sübutsuz şikayəti ilə həbs edilib. 2012-ci il martın 12-də Bakı Ağır Cinayətlər Məhkəməsinin hökmü ilə Ə. Zeynallının 1 il müddətinə peşə fəaliyyətilə məşğul olmaq hüququ məhdudlaşdırılıb və 9 il müddətinə azadlıqdan məhrum edilib. Ali instansiya məhkəməsi baş redaktorun aşağı instansiya məhkəmələrindən olan şikayətini təmin etməyib. Bir çox beynəlxalq və yerli hüquq müdafiə təşkilatları, o cümlədən Amnesty International, Human Rights Watch, Freedom House, Human Rights House Foundation, Senzura İndeksi təşkilatları “Xural” qəzetinin baş redaktoru Əvəz Zeynallını “vicdan məhbusu” olaraq tanıyır və onun həbsinin peşə fəaliyyətilə əlaqədar siyasi motivlər əsasında həyata keçirildiyini bəyan edərək, hakimiyyətə onun tezliklə azadlığa buraxılmasını tövsiv edir.

XuralTAC