Aslan İsmayılov İlham Rəhimova üzrxahlıq etdi
“Viza” Hüquq firmasının təsisçisi, vəkil Aslan İsmayılov bir qədər əvvəl Qarabağda aparılan hərbi əməliyyatlarla bağlı azərbaycanlı ziyalıların, nüfuzlu şəxslərin, iş adamlarının mövqe sərgiləməməsinə etiraz əlaməti olaraq, öz facebook səhifəsində status paylaşıb.
Xural.com-un məlumatına görə, həmin statusda o, “Rüstəm İbrahimbəyov, Tahir Salahov, İlham Rəhimov, Vahid Ələkbərov, Araz Ağalarov, İsgəndər Xəlilov və digəriləri, haradasınız, niyə səsiniz çıxmır? Səsiniz ancaq Azərbaycandan nə isə umandamı çıxacaq?! Əgər Vətənin bu günkü dar durumunda da susacaqsınızsa, deməli var dövlət Sizin üçün Vətəndən daha önəmlidir!” -yazaraq, fikrini ifadə edib. Bu gün isə A.İsmayılov öz Facebook səhifəsində bir həftə əvvəl yazdığı statusa şərh verərək, adı çəkilən şəxslərdən biri – tanınmış iş adamı, hüquqşünas, professor İlham Rəhimova üzrxahlıq edib:
“Bu günə qədər kiminsə haqqında bilərəkdən haqsızlıq etməmişəm və etmərəm. Bu adlar arasında uzun illər tanıdığım və bəziləri ilə bu günə qədər yaxşı münasibətlərim olanlar da var. Hadisələrin Vətənim üçün ciddiliyi münasibətlərdən asılı olmayaraq bu yazıya səbəb olmuşdur. Bu gün də haqlı olduğum qənaətindəyəm. Çünki İlham Rəhimovdan savayı bu hadisələrə adı çəkilənlərdən heç kim münasibət bildirməyib. Sadəcə, professor İlham Rəhimov haqqında bilməyərəkdən haqsızlıq etdiyimi etiraf edirəm. Ancaq bu gün sırf təsadüf nəticəsində yazımdan 12 dəqiqə əvvəl professor İlham Rəhimovun “Yeni Musavat” qəzetində məhz Qarabağ hadisələri ilə bağlı çox dəyərli müsahibəsinin olduğunu öyrəndim. İlham Rəhimov Rüstəm İbrahimbəyovdan fərqli olaraq heç vaxt “millət xilaskarı” kimi təqdim olunmasa da, Vətənin dar günündə Rusiya hakimiyyət rəhbərliyi ilə çox yaxın münasibətlərinin olmasına baxmayaraq həqiqətən bu Vətənin oğlu olduğunu, Vətənini hər şeydən üstün tutduğunu, Qarabağın nəinki bu günü, gələcəyi ilə bağlı da narahat olduğunu bu qısa müsahibədə çox konkret şəkildə bildirib. Buna görə də bu məsələdə sırf İlham Rəhimova qarşı haqsızlıq etdiyimə görə üzr istəyib müsahibəsinin əhəmiyyətinə görə tanış olmanız üçün paylaşıram”.
Xural.com
