Cəbhəçilər Müsavat Partiyası ilə “Yeni Müsavat” qəzetinin ayrı olduğunu yaxşı bilirlər
05.07.2013
Müsavat Partiyasının üzvü, “Yeni Müsavat” qəzetinin redaktoru Azər Ayxanla AXCP sədrinin müavini Nurəddin Məmmədli arasında qalmaqal yaşanıb.
Avropa.info xəbər verir ki, A.Ayxanın son yazısına cavab olaraq Əli Kərimlinin müavini Nurəddin Məmmədli bildirib ki, AXCP funskionerləri uzun müddətdir “Yeni Müsavat” qəzetinə hər-hansı bir açıqlama verməkdən imtina edirdilər: “Bizim partiya bu boykot qərarını aradan qaldırsa da, mən onlarla razılaşmadım və bu qəzetə açıqlama verməkdən hər zaman imtina etmişəm. Mənim “Yeni Müsavat” qəzetinə qarşı bu cür davranışım təsadüfi deyil. Bu gün “Yeni Müsavat” qəzeti müstəqilliyini tam itirib və hakimiyyətin bir strukturu kimi fəaliyyət göstərməkdədir”.
A.Ayxan isə öz “Facebook” profilində daha sərt cavabla çıxış edib. Onun fikrincə, Nurəddin Məmmədli kimi bir adamın müxalifətçilikdən, əqidədən, haqdan, ədalətdən danışmağa haqqı yoxdur: “Nurəddin Məmmədli öz liderini, partiya sədrini 500 dollarlıq maaşa satıb aradan çıxan birisidir. 2003-cü ildə Sərdar Cəlaloğlunu türmədə ola-ola Nurəddin Məmmədli bütün mənəvi hədləri aşaraq, ADP-dən AXCP-yə gəldi. Bunun da bircə səbəbi var idi: seçkidən sonra Rəsul Quliyev buna verdiyi aylıq məvacibi dayandırmışdı. Bu 500 dollarlıq siyasətmuzdur da ilk fürsətdəcə aradan çıxdı…
Sabah Əli Kərimli bunun maaşını kəssin, görün, nə biabırçılıqlar edir. Bu adama heç AXCP-də də hörmət qoymurlar, bildiyim qədər. Lağ-lağı, “prikol” hədəfidir partiyada. Kim kefini durultmaq istəsə, onu ələ salıb əylənir. Ayıbına kor ol, barı sən danışma, ay 500 dollarlıq”.
