Gözəl Bayramlının çantasından 12 min dollar çıxıb-RƏSMİ AÇIQLAMA
Dövlət Sərhəd Xidməti AXCP sədrinin müavini Gözəl Bayramlının sərhəddə saxlanılması ilə bağlı açıqlama yayıb.
BakuPost.az qurumun saytına istinadən xəbər verir ki, məlumatda bildirilənə görə, 25 may 2017-ci il tarixdə, saat 22 radələrində Azərbaycan Respublikasının vətəndaşı Bayramova Gözəl Oruc qızı Gürcüstandan Azərbaycan ərazisinə keçərkən Qazax rayonunun Şıxlı sərhəd nəzarət buraxılış məntəqəsində Dövlət Gömrük Komitəsinin əməkdaşları ilə birgə keçirilmiş tədbirlər nəticəsində saxlanılıb.
Belə ki, G.Bayramova özünü şübhəli apardığına görə əl yükünə baxış keçirilərkən bəyan edilməmiş 12 min ABŞ dolları məbləğində pul vəsaiti aşkar olunaraq götürülüb.
Faktla bağlı Dövlət Sərhəd Xidmətinin İstintaq və Təhqiqat İdarəsində Cinayət Məcəlləsinin 206.1-ci (qaçaqmalçılıq) maddəsi ilə cinayət işi başlanılıb.
İlkin araşdırmalarla G.Bayramovanın 24 may 2017-ci il tarixdə Azərbaycandan Gürcüstana gedərkən üzərində bəyan edilməli olan nağd pul vəsaiti olması müəyyən edilməyib.
Hazırda cinayət işi üzrə zəruri istintaq tədbirləri davam etdirilir.
