İlham Əliyev: “Azərbaycanda əsas azadlıqlar təmin edilib…”
Brüsseldə Avropa Birliyi liderləri ilə görüşən Azərbaycan prezidenti İlham Əliyev iyunun 21-də keçirilən mətbuat konfransında AzadlıqRadiosunun Brüssel müxbirinin sualına cavab verib.
“Azadlıq” radiosunun müxbiri prezident İlham Əliyevdən soruşub:
İLHAM ƏLİYEV İLQAR MƏMMƏDOVU ÖZÜNƏ RƏQİB SAYMIR?
Azərbaycan prezidenti suala cavabını siyasi rəqiblərindən heç birinin həbsdə olmadığını deməklə başlayıb:
İkincisi, Azərbaycanda heç bir siyasi məhbus yoxdur. Avropa Şurası Parlament Assambleyasının bu ilin yanvarında keçirilən və Azərbaycanda siyasi məhbuslar haqda hesabatın rədd edildiyi sessiyasından sonrakı şərhləri oxusanız görərsiz ki, bu məsələ bizim üçün qapanıb.
Azərbaycanda kimsə siyasi səbəblərlə həbs edilmir, toplaşma və media azadlığı tam təmin edilir.
Qeyd edək ki, prezidentliyə namizədliyi irəli sürülmüş «REAL» Hərəkatının rəhbəri İlqar Məmmədov hazırda həbsdədir.
O, bu il yanvarın 23-24-də İsmayıllıda baş vermiş aksiyalar zamanı ictimai qaydanı pozmaqda və vətəndaşları iğtişaşlara təhrik etməkdə təqsirləndirilir.
Yerli və beynəlxalq hüquq müdafiə təşkilatları hesab edir ki, İlqar Məmmədov siyasi fəaliyyətinə görə həbs edilib.
AZƏRBAYCAN PREZİDENTİ ÖLKƏDƏ TAM AZADLIQ OLDUĞUNU DEYİR
Prezident İlham Əliyev həmçinin qeyd edib ki, Azərbaycanda əsas azadlıqlar təmin edilib:
– Bizdə internet azaddır, internet istifadəçilərin sayı isə 70%-dən çoxdur. Heç bir senzura yoxdur.
10 ildən çoxdur ki, biz Avropa Şurasının üzvüyük və gələn il quruma sədrlik edəcəyik. Biz demokratiyanın inkişafı, insan haqları və bütün azadlıqlar ilə bağlı öhdəlikləri tam olaraq yerinə yetirəcəyik.
Odur ki, sizin sualınızdakı iddialar ya yanlış məlumatlandırılmanızdan qaynaqlanır, ya da önyarğılar və əsassız şaiyələrdən.
Azərbaycan demokratik ölkədir, sürətlə inkişaf edir və siyasi islahatlar həyata keçirir, Avropa Şurası və Avropa Birliyi ilə sıx əməkdaşlıq edir.
Prezident seçkiləri ilə bağlı narahatlığa gəldikdə isə deməliyəm ki, seçkilər və təşviqat kampaniyası hələ başlamayıb. Azərbaycan Avropa qurumlarından müşahidəçilər dəvət edəcək və namizədlərə bütün imkanları yaradacaq ki, öz platformalarını açıqlaya bilsinlər və özlərini xalqa tanıtsınlar.
Prezident İlham Əliyevin Brüsselə səfəri iyunun 21-də başlayıb. O, Avropa Şurasının prezidenti və Avropa Komissiyasının rəhbəri ilə görüşüb. Rəsmi məlumata görə görüşlərdə enerji təhlükəsizliyi, regional sabitlik və Azərbaycanda əsas azadlıqların vəziyyəti müzakirə edilib.
BARROSO-DAN ƏLİYEVƏ DƏSTƏK
AzadlıqRadiosunun əməkdaşı Avropa Komissiyasının prezidentindən də soruşub ki, demokratiya və insan haqları sahəsində göstəriciləri Azərbaycanın Avropa Birliyi ilə assosiasiya razılaşması imzalamasına imkan verirmi?
Bu suala Jose Manuel Barroso-nun cavabı:
Ölkədə çox, həm də çox böyük irəliləyişlər var. Bu o demək deyil ki, bizim fikrimizcə, bütün standartlara əməl edilib. Bizim prezident İlham Əliyev və Azərbaycandakı başqa tərəfdaşlarımızla çox yaxşı fikir mübadiləmiz var.
AVROPA KOMİSSİYASININ RƏHBƏRİ DEYİR Kİ, PROBLEMLƏR VAR VƏ MÜZAKİRƏ EDİLİR
Avropa Komissiyasının prezidenti deyir ki, ən doğrusu problemlərə pozitiv yanaşma, hər iki tərəfdən açıq müzakirələrlə bütün demokratik islahatların dəstəklənməsidir
İnanıram ki, vətəndaş cəmiyyətində inkişaf olmadan müasirləşməyə də nail olmaq mümkün deyil. Bu məsələlər Azərbaycan və əlbəttə, başqa tərəfdaşlarımızla daimi dialoq mövzusudur.
Hər bir ölkənin öz tarixi, coğrafiyası, qarşılaşdığı problemlərə uyğun olaraq xüsusi şəraiti var. Bu baxımdan, hesab edirəm ki, sualınızda səslənən problemlərin həllində də ən yaxşı yol əməkdaşlıqdır. Belə tərəfdaşlığı da Azərbaycanla davam etdiririk. Bu problemlər bizim azərbaycanlı dostlarımızla müzakirələrdə də əsas yerləri tutur. Eyni məsələləri bu gün prezident İlham Əliyevlə də müzakirə etdim.