“Memar Əcəmi” stansiyasının giriş və çıxış yeri dəyişdirilib
Bakı Metropoliteninin “Memar Əcəmi” stansiyasının giriş və çıxış yeri dəyişdirilib.
Bu barədə “Bakı Metropoliteni” QSC-nin ictimaiyyətlə əlaqələr və mətbuat xidmətinin rəhbəri Nəsimi Paşayev azertag.az-a deyib.
Onun sözlərinə görə, bu dəyişiklik stansiyada sərnişinlərin hərəkətini nizamlamaq məqsədilə edilib. “Bənövşəyi xətt”in ilk iki stansiyası olan “Memar Əcəmi-2” və “Avtovağzal” metro stansiyaları istismara verildikdən sonra “Memar Əcəmi” ilə birlikdə bu üç stansiyanın sərnişinlərinin hərəkətində toqquşma yaranmaması üçün bu gündən “Memar Əcəmi”nin giriş və çıxış yeri dəyişdirilib.
Qeyd edək ki, “Memar Əcəmi” metro stansiyası açılacaq iki yeni stansiya üçün keçid olacaq. “Avtovağzal” və “Memar Əcəmi-2” metro stansiyalarının açılışı 2016-cı ilin birinci yarısında nəzərdə tutulub.
