Mövsüm Səmədov “kars”a salınıb
Azərbaycan İslam Partiyasının həbsdə olan lideri Mövsüm Səmədov cərimə kamerasına (“kars”a) salınıb. Bu barədə AzadlıqRadiosu-na vəkili Yalçın İmanov məlumat verib.
Müdafiəçi bildirib ki, Mövsüm Səmədovun həbsxana rejimində saxlanma müddəti noyabrın 28-də başa çatıb. Ona görə də noyabrın 29-da Qobustandakı qapalı rejimli həbsxanadan əvvəllər saxlanıldığı 12 saylı cəzaçəkmə müəssisəsinə köçürülüb.
“Cəzaçəkmə müəssisəsinə gələn kimi onu cəzalandıraraq 15 günlük cərimə kamerasına salınıb. Hələlik, özü ilə görüşə bilməmişəm. Çünki görüşə icazə verən məktubum ancaq Qobustan həbsxanası üçün nəzərdə tutulmuşdu. Qısa müddətdə bu məsələni həll edib, görüşməyə çalışacam. Amma hər bir halda, şəxs gələn kimi onun “karsa” salınması yolverilməzdi”, – Yalçın İmanov bildirib.
M.Səmədov 12 il həbs cəzası alıb. Avropa İnsan Hüquqları Məhkəməsi onun işi üzrə kommunikasiyaya başlayıb.
2014-cü il oktyabrın 9-da Qaradağ Rayon Məhkəməsinin qərarı ilə M.Səmədovu 12 saylı cəzaçəkmə müəssisəsindən 2 ilini həbsxana rejimində keçirməsi üçün Qobustana köçürüblər. Şərtlərin sərtləşdirilməsi M.Səmədovun intizamı pozması ilə əsaslandırılıb. Lakin bəzi məlumatlara görə, əsl səbəb Mövsüm Səmədovun məhbuslar arasında populyarlığının artması olub. Mövsüm Səmədov Azərbaycan hakimiyyətini korrupsiya və dindarların hüquqlarının pozulmasına görə kəskin tənqid edirdi.
Bu ilin avqustunda o, konstitusiyaya dəyişikliklərə etiraz olaraq, Qobustan həbsxanasında aclıq aksiyası keçirirdi.
Partiya sədri cəzaçəkmə müəssisəsinə gələn kimi “karsa” salınıb.
