Murad Ədilova 6 il həbs cəzası verildi
Daha bir AXCP fəalı sifarişlə həbsə göndərildi; Əli Kərimli bunu “İkiqat vicdansızlıq” adlandırdı
«Mən bəşəriyyəti zülm və ədalətsizlikdən xilas edən bir məfkurə ordusunun əsgəriyəm. Mən də, qardaşım Natiq də Xalq Cəbhəsinin əsgərləriyik…»
AXCP fəalı haqq-ədalət uğrunda mübarizədən geri çəkilməyəcəyini bəyan etdi
Azərbaycan Xalq Cəbhəsi Partiyasının (AXCP) şərlənərək həbs olunan daha bir fəalı Murad Ədilovun məhkəməsi yekunlaşıb. Dünən Lənkəran Ağır Cinayətlər Məhkəməsində hakim Elşad Əliyevin sədrliyilə çıxarılan hökmə əsasən, Murad Ədilov 6 il azadlıqdan məhrum edilib. Amma hökm elan olunmamışdan əvvəl məhkəmə iclasında bir sıra məsələlər baş verib.
Hakim Elşad Əliyev əvvəlcə Baş Narkotiklə Mübarizə Idarəsinə göndərilmiş sorğulara verilən cavabları elan edib. Məsələn, guya, Murad Ədilovdan tapıldığı iddia edilən narkotikin mənbəyilə bağlı sorğuya cavabda bildirilib ki, 15 fevral 2015-ci ildə narkotikin mənbəyilə bağlı cinayət işinin icraatı dayandırılıb.
Bundan başqa, Murad Ədilovun vəkilləri onun həbsinin ilk günlərində müdafiəçi kimi bir sıra sənədlərə imza atmış Səxavət Məmmədlinin dindirilməsini istəyirdilər. Çünki dövlət tərəfindən ayrılmış bu vəkil əslində müdafiəçi qismində iştirak etməyib, əksinə, polislərin mənafeyinə uyğun addımlar atıb, sənədlər imzalayıb. O, 11 avqust 2014-cü ildə Murad Ədilovun üzərinə baxış keçirilməsi və maddi sübutun götürülməsi barədə əməliyyat tədbirində iştirak etmədiyi halda, bu haqda protokola imza atıb. Murad Ədilovun müdafiəçiləri də onun iştirak etmədiyi əməliyyat tədbirinin protokoluna hansı səbəbdən imza atmasını dəqiqləşdirmək üçün məhkmədə dindirilməsinə dair vəsatət vermişdilər.
Lakin Səxavət Məmmədli bu dəfə də məhkəməyə gəlməyib. Onun, eləcə də Vəkillər Kollegiyasının sədri Azər Tağıyevin məhkəməyə göndərdiyi məktubda bildirilir ki, vəkilin dindirilməsi qanunla qadağandır.
Vəkil bildirib ki, hal şahidinin narkoman kimi qeydiyyatda olması faktı onun polislə qeyri-rəsmi əməkdaşlıq etməsinin və ondan asılı olmasının təsdiqidir.
Bundan sonra iş materiallarındakı sənədlərin tədqiqi mərhələsi başlanıb, hakim onları elan edib.
Ardınca da iş üzrə məhkəmə istintaqının yekunlaşdığı bilrilib və çıxış üçün söz dövlət ittihamçısına verilib. Prokuror çıxışında ittihamın məhkəmədə də sübuta yetirildiyini elan edərək, Murad Ədilovun 7 il azadlıqdam məhrum edilməsini istəyib.
Dövlət ittihamçısının çıxışında yalnız polis ifadələrinə istinad etməsi müdafiə tərəfinin narazılığına səbəb olub. Vəkil Yalçın Imanov bildirib ki, bu iş üzrə məhkəməyə qədər də çoxsaylı qanun pozuntularına yol verilib. Vəkil ibtidai istintaq zamanı yol verilən həmin qanunsuzluqların nədən ibarət olduğunu da açıqlayıb, o haqda ətraflı məlumat verib. Murad Ədilova qarşı irəli sürülmüş ittihamın məhkəmədə təsdiqini tapmadığını, onun əməlində cinayət tərkibi olmadığını deyən Yalçın Imanov müvəkkilinə bəraət verilməsini istəyib.
Vəkil onu da qeyd edib ki, Murad Ədilov işgəncəyə, qeyri-insani rəftara məruz qalıb, məhkəmə ona münasibətdə bu hüquq pozuntusunu tanımalı, onun cibinə və evinə narkotik vasitəni atmış, həmçinin Sabirabad Rayon Polis Şöbəsində onu bir saat müddətində dayanmadan döymüş, həyat yoldaşı və anası – Tahirə Ədilova və Təravət Ədilovaya hədə-qorxu və təhdid altında izahat, ərizə yazdırmış polis əməkdaşları barəsində xüsusi qərar çıxarılmasını xahiş edib.
Bundan sonra Murad Ədilov özü məhkəmədə son sözünü deyib. Ilk növbədə o, özünün və ailəsinin heç zaman narkotiklə əlaqəsi olmadığını vurğulayıb. Başına gətirilənlərin isə həm özünün siyasi fəaliyyəti, həm də qardaşı Natiq Ədilovun “Azadlıq” qəzetində və “Azərbaycan Saatı” proqramındakı tənqidi çıxışları ilə bağlı olduğunu bildirib. Buna baxmayaraq, Murad Ədilov özünün və ailəsinin haqq-ədalət uğrunda mübarizədən geri çəkilməyəcəyini dilə gətirib.
Murad Ədilov eyni zamanda, hakimləri ədalətli qərar çıxarmağa çağırıb: “Mənim üç övladım var, böyük övladım bu il birinci sinfə gedəcək. Mən atamı vaxtsız itirmişəm. Istəmirəm ki, övladlarım ata nəvazişindən kənar qalsın. Türk yazarı Rəşad Nuri Güntəkinin “Damğa” əsərində belə bir epizod var: “Mən bəşəriyyəti zülm və ədalətsizlikdən xilas edən bir məfkurə ordusunun əsgəriyəm. Mən də, qardaşım Natiq də Xalq Cəbhəsinin əsgərləriyik. Xahiş edirəm, mənə damğa vurmayasınız, barəmdə ədalətli qərar qəbul edəsiniz. Unutmayın, axirətdə birinci hakimlər sorğu-suala cəlb olunur. Çalışın, yaddaşlarda ədalət və humanizmi üstün tutan bir hakim kimi qalasınız”.
Murad Ədilovun son sözündən sonra müşavirəyə gedən hakimlər isə qayıdıb gözlənilən ədalətsiz hokum elan ediblər
***
Murad Ədilov haqqında çıxrılan sifarişli məhkəmə qərarına AXCP sədri Əli Kərimli də münasibət bildirib:
