Ölkəyə gətirilən ət gömrükdə hansı qiymətə qeyd olunur?
2015-ci ildə Azərbaycana mal, qoyun, donuz və keçi əti idxalı 14,3% artıb.
Bu barədə Dövlət Gömrük Komitəsi məlumat verib. Göstərici qiymət ifadəsində cəmi 12,9% artıb. İdxal edilən ətin 1 kq-ı $2,10-a bəyan edilir. Bu, 2014-cü ildəkindən $0,03 çoxdur.
2015-ci ildə Hindistandan Azərbaycana 2647,6 ton, Ukraynadan 1310 ton ət gətirilib. Hindistan mənşəli ətdən əsasən fast-fudlarda, Ukrayna ətindən McDonalds-larda istifadə edilir.
Ötən il Azərbaycana 71,8 min baş iri və xırda buynuzlu mal-qara idxal edilib. Bu, 2014-cü ildəkindən 120 min baş azdır. Onların idxalına $45 mln xərclənib. Qəribədir ki, ev heyvanlarının sayı azalsa da, onların xaricdə alınması xərcləri cəmi $ 2,2 mln azalıb.
2015-ci ildə xaricdə 12 670 baş cins mal-qara alınıb. Almaniyadan 5 190, Avstriyadan 1499, Macarıstandan 907, Rusiyadan 4252 baş iri buynuzlu mal-qara idxal edilib. Avropa inəkləri təxminən $3 000, Rusiya inəkləri $1125-a alınıb.
Turan.az
