Ötən il MTN 24 Vətən xainini zərərsizləşdirib
28.03.2012
Azərbaycan daxilində və xaricində müəyyən qüvvələr Azərbaycanın uğurlarına qısqanclıqla yanaşır və buna hər yolla mane olmağa çalışır. “Onların bəziləri gənclərimizi müəyyən istiqamətlərə çəkməyə cəhdlər göstərirlər. Lakin düzgün düşüncəli gənclərimiz heç vaxt bu təsirlərə uymurlar, əksinə, daim dövlətçilik mövqeyi nümayiş etdirirlər”. Bu barədə təhlükəsizlik naziri Eldar Mahmudov bu gün ölkənin təhlükəsizlik orqanlarının 93 illiyi münasibətilə keçirilən təntənəli yığıncaqda çıxış edərkən bildirib.
Nazir bildirib ki, ötən il terror-təxribat fəaliyyətlərinin qarşısının alınması, narkotik vasitələrin qanunsuz dövriyyəsi, qeyri-qanuni miqrasiya, insan alveri, mütəşəkkil cinayətkarlığın digər təzahürlərinə qarşı mübarizədə önəmli nəticələr əldə edilib.
Əks-kəşfiyyat və hərbi əks-kəşfiyyat tədbirləri nəticəsində casusluq etməklə dövlətə xəyanətdə təqsirli bilinən 24 nəfər ifşa olunub. Həmçinin Pakistan-Əfqanıstan ərazilərində koalisiya qüvvələrinə qarşı silahlı birləşmələrdə iştirak etmiş və beynəlxalq axtarışda olan 2 nəfər yaxalanıb, deyə nazir bildirib.
Nazir onların kimin xeyrinə casusluq etdiyini və hansı ölkənin vətəndaşları olduğunu bildirməyib.
Narkotik vasitələrin qanunsuz dövriyyəsi ilə məşğul olan 30-a yaxın transmilli mütəşəkkil cinayətkar dəstə zərərsizləşdirilib. Ümumilikdə 630 kiloqrama yaxın narkotik vasitə qanunsuz dövriyyədən çıxarılıb, 40 cinayət işi başlanıb, 137 nəfər məsuliyyətə cəlb olunub.
Qaçaqmalçılıq faktları üzrə 8 cinayət işi başlanıb, 13 nəfər məsuliyyətə cəlb olunub.
Saxta sənədlər, o cümlədən saxta qiymətli kağızlar hazırlama, nəzarətdənkənar beynəlxalq rabitə xidmətinin təşkili, külli miqdarda vergi ödənişlərindən yayınma və insanların etibarını qazanmaqla külli miqdarda pul vəsaitini mənimsəmə cinayətləri üzrə də 14 cinayət işi başlanıb, 23 nəfər cinayət məsuliyyətinə cəlb olunub.
CONTACT
