Rəşad Ramazanova təzyiqlər var
Siyasi və vicdan məhbusu Rəşad Ramazanovun həyat yoldaşı Könül Ramazanova onu ziyarət edib. 2 saylı Cəzaçəkmə Müəssisəsində saxlanılan Rəşad Ramazanov həyat yoldaşı vasitəsilə azadlığa çıxan bütün siyasi və vicdan məhbuslarını təbrik edib. O, ümid etdiyini bildirib ki, yaxın zamanlarda bütün digər siyasi məhbuslar da azadlığa qovuşacaq.
Könül xanımın xural.com-a verdiyi məlumata görə, Rəşad Ramazanov ona və ailəsinə yardımçı olan hər kəsi təbrik edib və salamlarını göndərib.
Aldığımız başqa bir xəbərdə isə Rəşad Ramazanova təzyiqlərin olduğu deyilir. Ona telefonla əlaqə saxlamaqda əngəl törədir, görüşlərini ləngidir, gündən-günə təzyiqlərini artırırlar.
Məsələ ilə bağlı Penitensiar Xidmətin mətbuat xidməti ilə əlaqə yaratmaq cəhdlərimiz alınmadı. Qurumun cavabını da dərc etməyə hazırıq.