Rauf Arifoğlu hakimiyyətyönümlü mediaholdinqlərin xanım patronlarını barışdırdı
Dünən Azərbaycan media sektorunda, az qala, sensasiya sayıla biləcək maraqlı hadisə yaşanıb: uzun illər bir-biriylə açıq-gizli rəqabət aparan, hətta küsülü olduqları deyilən iki böyük media-holdinqin başçısı – APA Holdinqin rəhbəri Vüsalə Mahirqızı ilə “Gündəlik Teleqraf” media qrupunun rəhbəri Aynur Camalqızı, nəhayət ki, barışıblar.
Xural.com strateq.az-a istinadən xəbər verir ki, bu nəcib təşəbbüsün müəllifi isə üçüncü bir media qrupunun başçısı – “Yeni Müsavat”ın rəhbəri Rauf Arifoğlu olub.
Məlumata görə, Rauf Arifoğlu Aynur Camalqızı ilə birgə APA İnformasiya Agentliyinin fəaliyyətə başlamasının 13-cü ildönümünü təbrik etmək məqsədiylə sözügedən holdinqin ofisinə gəliblər və Vüsalə Mahirqızını təbrik ediblər. Bu görüş haqda hər üç media rəhbəri birgə fotoşəkillərini “facebook” hesablarında qısa qeydlərlə və xoş ovqatla paylaşıblar da.
Musavat.com saytı isə Rauf Arifoğlu ilə Aynur Camalqızının APA Holdinqin əməkdaşları tərəfindən “hərarətlə” qarşılandıqlarını xüsusi vurğulayıb, hər üç baş redaktorun ölkə mediasının bir neçə önəmli problemləri ətrafında müzakirə apardıqlarını, hətta bu problemlərlə bağlı “ortaq və koordinasiyalı çalışmalara başlamaq” qərarına gəldiklərini də açıqlayıb.
Xatırladaq ki, uzun illər ölkə mediasında xüsusi yerə malik bu iki media-holdinqin xanım rəhbərləri – Vüsalə Mahirqızı və Aynur Camalqızı arasında sərin münasibətlər hökm sürüb. Hətta o həddədək ki, hər iki tərəf bir-birinin əleyhinə müntəzəm media hücumları da təşkil ediblər. İndi “Yeni Müsavat”ın rəhbəri Rauf Arifoğlunun hər iki şəxslə olan hörmətli münasibətindən faydalanaraq, onları bir araya gətirib barışdırması və hətta birgə əməkdaşlıq haqda razılığa gətirməsi nəcib təşəbbüs sayılmaqla yanaşı, həm də son vaxtlar media sektorunda yaranmış xoşagəlməz durumun diktə etdiyi şərait kimi də qiymətləndirilməkdədir…
Xural.com-a özəl mənbələrdən məlum olub ki, bu təşəbbüslə Rauf Arifoğlu bir müddət əvvəl də çıxış edib və o, Vüsalə Mahirqızına birlikdə Aynur Camalqızının ofisinə getməyi, arada olan umu-küsünü əməkdaşlıqla əvəzləməyi təklif edib. Ancaq Vüsalə Mahirqızı əsla və əsla Aynur Camalqızının ofisinə getmək təklifini qəbul etməyib, amma Aynur Camalqızının ofisinə gələcəyi və haqqındakı şayiələrə görə izahat verəcəyi təqdirdə, əməkdaşlığa hazır olduğunu bildirib. Rauf Arifoğlu təklifi qəbul edib və bir müddət gözləyib. Və bu, APA-nin 13 illiyi ilə bağlı ildönümü olub. Görünür, Aynur Camalqızı da şərtləri qəbul edib və lazım olan izahatları Vüsalə Mahirqızına verib. Hər bir halda hakimiyyətyönümlü mediaholdinqlərin rəhbərlərinin uzun sürən mətbu savaşı 2018-ci il üçün iqtidar cəbhəsinə də uğurlu perspektiv vəd etmirdi. Görünür, Rauf Arifoğlu da bu missiya üçün seçilmiş ən gözəl nümunələrdən biri kimi hakimiyyətə və media siyasətini icra edən dövlət məmuruna gərəkli olub.
Xural.com
