Dünya son 10 ilin ən soyuq qışını gözləyir. Bu barədə ABŞ Milli Okean və Atmosfer Agentliyi məlumat yayıb.

Agentliyin apardığı müşahidələr nəticəsində bəlli olub ki, axırıncı dəfə 1997-1998-ci ildə müşahidə olunan “Super El Nino” qasırğası bu qış da özünü göstərəcək. İntensiv qar, qasırğa, sel, torpaq sürüşməsi və quraqlığa səbəb olan “El Nino” bu qış dünyanın qütblərində pik həddə çatacaq. Xüsusilə yanvar və fevral aylarında dondurucu soyuqlar gözlənilir.

Milli Ekoloji Proqnozlaşdırma Mərkəzinin prezidenti Telman Zeynalovun fikrincə, bu qış sərt deyil, soyuq keçəcək: “Qış sərt keçməyəcək, qışımız soyuq keçəcək. Keçən il oktyabr ayında yağıntılar yağmırdı, amma hava çox soyuq idi. Bu, oktyabrın 25-dən başlamışdı. Bu il isə oktyabrın 5-dən başlayıb, yəni qabaqlayıb. Gördüyünüz kimi, havalar soyuq keçir. Oktyabrın axırıdır, hələ də yağışlar səngimir; dağlara qar yağır, yerə isə yağış tökür, sürüşmələr baş verir. Xaricilər deyəndə ki Azərbaycanda hava həddən artıq sərt keçəcək, 30 dərəcə şaxta olacaq – tamamilə cəfəngiyyatdır, buna inanmayın. Əgər Bakıda 3-5 dərəcə şaxta olacaqsa, Bakı küləyi onu 15 dərəcəyə qaldıracaq. Son ilə qədər Azərbaycanda yayın quraqlı, qışın isə mülayim keçməyinin səbəblərindən biri cənub küləklərinin əsməsi idi. Yayı da, qışı da bizdə əsasən cənub küləkləri əsirdi, ona görə də bizdə mülayim hava şəraiti var idi”.

Qeyd etmək lazımdır ki, son vaxtlar əhali arasında yayılan “dəhşətli” proqnozlar tək qışla bağlı deyil. Azərbaycanda güclü zəlzələnin, eləcə də ciddi torpaq sürüşmələrinin baş verəcəyi haqda da xəbərlər yayılmışdı. Bəs bütün bu proqnozlar nə dərəcədə reallığa uyğundur?

Telman Zeynalovun fikrincə, son günlər yayılan bu söhbətlər cəfəngiyyatdan artıq bir şey deyil: “İqlim dəyişikləri ilə əlaqədar həddən artıq çox pessimist və qorxuducu məlumatlar yayılır. Amma indiyədək heç bir elm – hidrologiya, geologiya, metrologiya və ya başqası bir həftə əvvəl proqnoz verə bilməz ki, dünyada nələr baş verəcək. Bu – cəfəngiyyatdır”.

Qeyd edək ki, ekspert yayılan dezinformasiyalar səbəbindən əhalini təşvişə düşməməyə çağırıb (sputnik.az).