Təhsilimiz təkmilləşir
Babalıq
Yetkililər dur demədən əlləşir,
Təhsilimiz get-gedə təkmilləşir!
Birisi deyir, son nəticə nəhs deyil,
Birisi deyir, nəhs o yana, bəs deyil,
Birisi deyir, test özü bir test deyil,
TQDK Nazirlik ilə dilləşir,
Təhsilimiz get-gedə təkmilləşir!
Yüz pedaqoq ildə alır beş mini,
Heç bu işin formatı açmır məni,
Hər “yüz”ə bir əlaçı yoxdur yəni?
Gəl, bu həsir, gəl, bu da Məmmədnəsir,
Təhsilimiz get-gedə təkmilləşir!
Biz də dedik, kurikulum getdi xod,
Sarsaq oyunmuş ki bu intermetod!
Dərsi dedin, bitdi oyun: şot–raşot!
Son nəticə: bal gəlir əksik düşür,
Təhsilimiz get-gedə təkmilləşir!
Müəllim olan çatdımı altmış beşə,
Zər, domino çırtmağı etsin peşə,
Məmur üçün varmı bu cür əndişə?
Ta yüzəcən əlləri milyon kəsir,
Təhsilimiz get-gedə təkmilləşir!
Köhnə kələş məktəbə şefdir yenə,
İmanı lax, vicdanı kifdir yenə,
Müavin işə pulla giribdir yenə,
Axmasa su, həm qoxur, həm lilləşir,
Təhsilimiz get-gedə təkmilləşir!
Dərs yükünə norma nədir, həd nədir?
Norma bir stavkadır, ay müqtədir,
Qoy o durub, haqqa izafət gətir…
Mürdə yuyur, suç ki yumur mürdəşir,
Təhsilimiz bəs belə təkmilləşir?
Get xəbər al: harda açıq dərs gedir,
Müəllim, uşaq düz iki ay məşq edir,
Pərdələnir, forma mahiyyət gedir,
Sonra yalandan salırıq hay-həşir:
Təhsilimiz guya ki təkmilləşir!
Xural” qəzeti,
İl: 9, sayı: 027 (435), 17 – 23 iyul 2011-ci il