“TV Musa” ölkədən qaçıb – Əli Əsədov qürub edir

Prezidentin iqtisadi məsələlər üzrə köməkçisi Əli Əsədovun ortağı Musa Süleymanovun Beynəlxalq Bankdan 100 milyondan artıq kredit götürüb qaytarmadığı üçün saxlanıldığı bildirilir.

İş adamı, Tovuzun “Turan” komandasının keçmiş prezidenti Musa Süleymanov (ləqəbi “TV Musa”) haqda redaksiyamıza ilginc xəbər daxil olub. Xəbərdə bildirilir ki, o, hüquq-mühafizə orqanları tərəfindən saxlanılıb. Buna səbəb iş adamının Beynəlxalq Bankdan götürdüyü, lakin qaytarmadığı külli miqdarda kreditlər olub.

Xəbəri musavat.com-a verən mənbənin bildidiyinə görə, Musa Süleymanov may ayında həbslər zamanı saxlanılıb. Bir neçə gün “içəridə” yatdıqdan sonra, onu şərtlə azad ediblər. “TV Musa”nın saxlanılması mətbuatdan böyük səylər nəticəsində gizlədilib. Həm də o vaxt kifayət qədər tanınmış, məşhur biznesmen həbs olunduğu üçün Musa Süleymanovun həbsi diqqətdən kənar qalıb.

Mənbə bildirir ki, Musa Süleymanov Beynəlxalq Bankdan 100 milyondan artıq kredit götürüb, amma qaytarmayıb. Ona görə də onu da saxlayıb, ifadəsini alıblar. Əldə etdiyimiz bilgilərdə deyilir ki, hazırda iş adamının maliyyə vəziyyəti həddən artıq ağırdı. O, iflas həddindədir. Bu üzdən də ən xırda borclarını belə verməkdən imtina edir. Mənbəmizin iddiasına görə, iş adamı hər kəsdən qaçır, telefonlara çıxmır. Onun ölkədən qaçdığı haqda da söz-söhbət gəzir.

Musa Süleymanov haqda məlumatları dəqiqləşdirib oxuculara daha müfəssəl məlumat verməyə çalışacağıq.

Xatırladaq ki, Musa Süleymanov prezidentin iqtisadi məsələlər üzrə köməkçisi Əli Əsədovla yaxındır. Onların şərikli bizneslərinin olması haqda mətbuatda məlumatlar gedib. Musa Süleymanov Əli Əsədovun bir sıra iri layihələrini icra edir. Bulvarda aparılan tikinti işlərini, Dövlət Bayraq meydanının qurulmasını və Fontanlar bağının təmirini prezidentin köməkçisi Əli Əsədovla Musa Süleymanova məxsus şirkətlər həyata keçirib.

Bir vaxtlar mətbuat yazırdı ki, Musa Süleymanov Gürcüstanda tikinti biznesi ilə məşğuldur. Onun ermənilərlə ortaq layihələrdə iştirakına dair müəyyən məlumatlar da yayılmışdı.

Musavat.com Musa Süleymanova zəng edərək xəbəri dəqiqləşdirmək istəsə də, iş adamı ilə əlaqə saxlamaq mümkün olmayıb.

xural.com mövzuya dair ilginc informasiyalar əldə edib. Əli Əsədovla uzun müddətdir birgə fəaliyyət göstərən, sabiq iqtisadi inkişaf naziri Fərhad Əliyevin tutulmasından dərhal sonra Əli Əsədovun çətirinin altına girən Musa Süleymanovun götürdüyü 100 milyon dollarlıq kreditin əhəmiyyətli məbləğinə özünə və ortağına Mərdəkan və Şüvəlanda villalar inşa etdirdiyi bildirilir. Maraqlıdır ki, informasiyanın dərc olunduğu saytların bəziləri bir müddətdən sonra xəbəri saytlarından “təmizləyiblər”. Beləcə, olanların həqiqət olduğuna dair ciddi şübhələr yaranıb.

Musa Süleymanovun Dövlət Bayrağı Meydanı ilə və onun işdən azad olunan, sonra da həbsxanaya göndərilən sədri ilə də biznes əlaqələri olub. Hər ikisi Əli Əsədovun adamıdır və görünür, bu, təkcə Musanın vurulması deyil, həm də Əli Əsədovun günəşinin qürub etməsidir.

Əli Əsədovun günəşi isə çox parlaq bərq vururdu. Görünür, çox qamaşdırıb gözləri…