Əfqan Muxtarlı Şüvəlana gətirilib
Həbsdəki jurnalist Əfqan Muxtarlının Şüvəlandakı 3 saylı İstintaq Təcridxanasına etap edildiyi bildirilir.
Ə.Muxtarlının Şüvəlandan cəzaçəkmə müəssisələrindən birinə göndəriləcəyi bildirilir.
Ə.Muxtarlı bunadək Şəkidəki penitensiar mərkəzdə saxlanırdı.
Jurnalist Ə.Muxtarlı ötən il mayın 29-da həbs olunub. Jurnalist Cinayət Məcəlləsinin (CM) 206 (qaçaqmalçılıq), 315 (hakimiyyət nümayəndəsinə zor tətbiq etmə) və 318-ci (dövlət sərhədini qanunsuz keçmə) maddələri ilə ittiham olunub. İddia olunur ki, Azərbaycan sərhədini qanunsuz keçən Ə.Muxtarlının üzərindən 10 min avro pul tapılıb. Onun sərhədi qanunsuz keçərkən hakimiyyət nümayəndəsinə zor tətbiq etdiyi də iddia olunur.
Jurnalist isə ittihamları qəbul etmir. Gürcüstandan zorla, döyülərək Azərbaycana təhvil verildiyini vurğulayıb.
Ə.Muxtarlı 2017-ci ilin yanvarında Balakən Rayon Məhkəməsinin hökmü ilə 6 il azadlıqdan məhrum olunub.
Şəki Apellyasiya Məhkəməsi həmin hökmü dəyişməyib.
Ə.Muxtarlı iki ildən çoxdur Gürcüstanda yaşayırdı. O, Azərbaycanda təqib olunduğunu bildirmişdi. Ə.Muxtarlı bir sıra araşdırma yazılarının da müəllifi idi.