Əli İnsanov Nərgiz Yaqublunun məzarını ziyarət edib
Bu gün prezident İlham Əliyevin 16 mart tarixli əfv sərəncamı ilə azadlığa buraxılmış sabiq səhiyyə naziri Əli İnsanov keçmiş məhkum yoldaşları ilə bir araya gəlib. Bununla bağlı məlumatı vaxtilə Əli İnsanovla bir cəzaçəkmə müəssisəsində saxlanılmış jurnalist Pərviz Həşimli yayıb.
O, öz sosial şəbəkə hesabından yaydığı məlumatda bildirib ki, bu gün 13 saylı cəzaçəkmə müəssisəsindən azadlığa buraxılmış keçmiş məhkumlar Pərviz Həşimli, Tofiq Yaqublu, Fərəc Kərimli, İlkin Rüstəmzadə, Əbdul Əbilov sabiq nazirlə görüşüblər.
“AzPolitika.info”nun əldə etdiyi məlumata görə, Əli İnsanovun keçmiş məhkum yoldaşları ilə bir araya gəlməsinin səbəbi Müsavat Partiyası başqanının sabiq müavini Tofiq Yaqublunun qızı Nərgiz Yaqublunun məzarını ziyarət etməsi olub.
Xatırladaq ki, hepatit xəstəliyindən əziyyət çəkən Nərgiz Yaqublu atası Tofiq Yaqublu həbsdə olduğu dövrdə – 23 aprel 2015-ci ildə vəfat etmişdi. Həmin vaxt Tofiq Yaqublu sabiq nazir Əli İnsanovla eyni cəzaçəkmə müəssisəsində saxlanılırdı. Görünür, buna görə sabiq nazir keçmiş məhkum yoldaşının vaxtsız vəfat etmiş qızının məzarını ziyarət etməyi özü üçün mənəvi borc bilib.
Ziyarətdən sonra keçmiş məhkum yoldaşları Əli İnsanovla birlikdə şəkil də çəkdiriblər.
