ABŞ Dövlət Departamenti Fərid Mehralızadənin həbsindən narahatlığını bildirib

Yayımlandı: 6 İyun 2024 14:04

Metyu Miller Azərbaycan hökumətinə çağırış edib

ABŞ Dövlət Departamenti Azərbaycanda həbs edilən iqtisadçı Fərid Mehralızadənin həbsindən narahat olması ilə bağlı açıqlama yayıb.

Departament açıqlamada Azərbaycanda haqsız yerə həbs edilən bütün məhbusları azad etməyə çağırıb.

“Haqsız olaraq tutulan bütün şəxsləri dərhal azad etmək, insan hüquqlarına və əsas azadlıqlarına hörmət etmək lazımdır”, – çağırışda bir daha bildirilib.

“Tanınmış iqtisadi şərhçi və jurnalist Fərid Mehralızadə “AbzasMedia” nəşrinin işi üzrə hökumətin davam edən repressiyaları çərçivəsində ötən həftənin sonu saxlanılıb. Baxmayaraq ki, o və xəbər nəşri hər hansı əlaqələrinin olmadığını bildirir”.

Brifinqdə çıxış edən Dövlət Departamentinin nümayəndəsi Metyu Miller bildirib ki, Azərbaycan vətəndaş cəmiyyəti üzvlərinin davam edən həbslərindən çox narahatdır.

Metyu Miller. ABŞ DD-in saytından screenshot

Bildirib ki, ifadə azadlığı da daxil olmaqla, öz əsas azadlıqlarından istifadə edənlər buna görə həbs olunmamalıdırlar.

“Biz Azərbaycan hökumətini haqsız saxlanılan bütün şəxsləri dərhal azad etməyə və hər kəs üçün insan hüquqlarına və əsas azadlıqlara hörmət etməyə çağırırıq”, – Metyu Miller bildirib.

Ötən ilin sonundan başlayaraq Azərbaycanda 10-dan artıq jurnalist və bir o qədər vətəndaş cəmiyyəti fəalı həbs edilib. Onlardan çoxu qaçaqmalçılıq ittihamı ilə günahlandırılır. Lakin özləri həbslərini siyasi fəaliyyətləri ilə əlaqələndirirlər.

Meydan TV

Əlaqəli məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button