“AMAY Abdulla”nın məhkəməsi dalana dirəndi…

abdulla 1Bu gün Bakı Ağır Cinayətlər Məhkəməsində “AMAY” ticarət mərkəzinin həbsdə olan rəhbəri Abdulla Abdullayev, Heydər Rzayev, Mehman Məmmədxanlı, Elşən Novruzov, Vidadi Qurbanov və Nadejda İlyasovanın barəsində olan cinayət işi üzrə növbəti məhkəmə prosesi keçirilib.

XuralTAC-ın məhkəmə prosesində iştirak edən müxbiri xəbər verir ki, hakim Əfqan Hacıyevin sədrliyi ilə keçirilən prosesdə zərərçəkmiş şəxs qismində Mirhaşım Ağayev və Namiq Novruzov ifadə verdilər.

Onlar ifadələrində təqsirləndirilən şəxsləri tanımadıqlarını, ona qarşı heç bir tələb və şikayətlərinin olmadığını bildirdilər. O da məlum oldu ki, zərərçəkmiş statusunda olan hər iki şəxs ibtidai istintaq zamanı dindirilməyib.

Vəkil Osman Kazımov çıxış edərək bildirdi ki, ibtidai istintaq zamanı dindirilməyən şəxslərin zərərçəkənlərin siyahısında olması təəccüblüdür: “Bu da yəqin yeni qanundur, bizim xəbərimiz yoxdur”.

Ümumiyətlə, demək olar ki, Abdulla Abdullayevin məhkəməsi dalana dirənib. Hakimlər də bəzi hallarda çarəsizliklərini ifadə etməkdən çəkinmirlər. Hər prosesdə 2-3, bəzən 5-7 “zərərçəkən” gəlir və məlum olur ki, bu “zərərçəkən”lərin heç biri istintaqda dindirilməyib. 2-3 “zərərçəkən” dindirilən kimi məhkəmə prosesi təxirə salır və fasilə verir. Son məhkəmə prosesləri üst-üstə 15-20 dəqiqədən artıq keçirilmir. Saat 10.00-da təyin olunan proseslər 11.30-12.00 radələrində başlayır, təxminən 12.30-a qədər davam edir və məhkəmə “zərərçəkən”ləri bəhanə edərək fasiləyə çıxır və 10-15 dəqiqə çəkmir ki, qayıdır və növbəti prosesin vaxtını elan edib dağılır. Abdulla Abdullayev isə bu duruma kəskin etitaz edir və işi sürətləndirməyi tələb edir. Beləcə, məhkəmə prosesi müəmmalı templə yürüməkdə davam edir.

Bu gün də son günlərdəki durum davam etdi və bununla da məhkəmə prosesi aprelin 30-dək təxirə salındı.

Qeyd edək ki, Abdulla Abdullayev və digərləri Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə təqsirləndirilir.

Təqsirləndirilən şəxslərdən yalnız A.Abdullayev barəsində həbs-qətimkan tədbiri seçilib, digər şəxslər isə zamindədirlər.

A.Abdullayev ötən il aprelin 4-də həbs olunub. Onunla bağlı İqtisadiyyat və Sənaye Nazirliyi yanında Sahibkarlığa Kömək Milli Fondundan daxil olmuş material Baş Prokuror yanında Korrupsiyaya Qarşı Mübarizə Baş İdarəsində araşdırılıb.

A.Abdullayevin həbsi ilə bağlı Baş Prokurorluğun mətbuat xidmətinin zamanında yaydığı məlumata görə, ilkin araşdırma zamanı toplanmış sübutlar əsasında Cinayət Məcəlləsinin 179.3.2 (mənimsəmə və ya israf etmə) və 308.2-ci (vəzifə səlahiyyətlərindən sui-istifadə) maddələri ilə cinayət işi başlanıb.

İstintaq müəyyən edib ki, 2006-2008-ci illərdə “Birlikbank” ASC-nin Müşahidə Şurasının sədri işləmiş Abdulla Abdullayev vəzifə səlahiyyətlərindən sui-istifadə etməklə Sahibkarlığa Kömək Milli Fondunun xətti ilə kənd təsərrüfatı, eləcə də digər sahələrin inkişafına yönəldilməsi nəzərdə tutulan ümumilikdə 3 milyon 397 min manat məbləğində vəsaiti təyinatı üzrə istifadə etməyib.

İstintaqın gəldiyi qənaətə görə, vəsaiti ayrı-ayrı hüquqi şəxslərin müvəkkil bank olan “Birlikbank” ASC-də açdırdığı hesablaşma hesablarına köçürülməklə həmin vəsaiti faktiki rəhbəri olduğu “A.M.A.Y” MMC-nin Xətai rayonu ərazisində yerləşən binasının təmir-tikinti işlərinə xərcləyib. Özgənin külli miqdarda əmlakını mənimsəməsində şübhələr üçün ciddi əsaslar olduğundan A.Abdullayevə Cinayət Məcəlləsinin qeyd olunan maddələri üzrə ittiham elan edilib və barəsində məhkəmənin qərarı ilə həbs-qətimkan tədbiri seçilib.

Əlaqəli məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button