Azərbaycan Qazaxıstandakı hərbi təlimlərdə iştirak edir

Qazaxıstanın qərbində, Xəzər dənizi sahillərində Qazaxıstan, Azərbaycan, Qırğızıstan, Tacikistan və Özbəkistan silahlı qüvvələri birgə hərbi manevrlərə başlayıblar. Bu barədə Qazaxıstanın Müdafiə Nazirliyi iyulun 8-də məlumat yayıb.

“Birlik-2024” adlı təlimlər iyulun 17-dək Manqıstau vilayətinin Oymaşa poliqonunda, Toqmaq burnunun iki kilometrliyində keçirilir.

Təlimlərə beş ölkədən 4 minədək hərbçinin, 700-dək hərbi avadanlıq və texnikanın cəlb olunduğu xəbər verilir.

MDB-nin beş ölkəsi Rusiya və İranın iştirakı olmadan bu təlimlərin keçirilməsi haqda bu ilin aprelində razılaşıblar. Ondan öncə isə Qazaxıstan ordusu Rusiya və Özbəkistan hərbçiləri ilə təlimlər reallaşdırıb.

AzadlıqRadiosunun qazax xidmətinin yazdığına görə, ekspertlər Orta Asiya ölkələrinin Azərbaycanla hərbi təlim keçirməsinə xüsusi diqqət ayırırlar. Xarici nəşrlər sözügedən təlim düşərgəsinin Moskvada narahatlıqla qarşılandığını qeyd edib. Rusiya nəşrlərinin yazdığına görə, Rusiya və İranı təlimlərdə iştirakçı olmasalar da, müşahidəçi kimi dəvət etmək olardı.

Orta Asiya üzrə araşdırmaçı və jurnalist Brüs Pannier “BNE Intellinews” Avropa nəşrində yazıb ki, “Birlik-2024” təlimlərinin iştirakçı dövlətləri ümumi təhlükəsizlik problemlərini Rusiya, Çin və İran kimi böyük ölkələrin köməyi olmadan həll etməyə üstünlük verirlər.

AzadlıqRadiosu

Əlaqəli məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button