Azərbaycan, Rusiya və Ermənistan danışıqları bərpa etdilər
Bu barədə Rusiya hökuməti məlumat yayıb. Rusiya, Azərbaycan və Ermənistan baş nazir müavinlərindən ibarət üçtərəfli işçi qrupu yenidən işə başlayıb.
Moskvada keçirilən növbəti görüşdə Azərbaycan baş nazirinin müavini Şahin Mustafayev, onun ermənistanlı həmkarı Mqer Qriqoryan və Rusiya Federasiyası baş nazirinin müavini Aleksey Overçuk iştirak ediblər. Məlumatda deyilir ki, “Avqustun 17-də Moskvada keçirilən görüşdə tərəflər Cənubi Qafqaz regionunda nəqliyyat kommunikasiyalarının bərpasının perspektivləri və Azərbaycan prezidenti, Ermənistan baş naziri və Rusiya prezidentinin 2021-ci il yanvarın 11-də imzaladıqları Bəyanatın yerinə yetirilməsi məsələləri müzakirə olunub”
Qeyd edək ki, Şahin Mustafayev 2 ay əvvəl bildirib ki, Ermənistanda yeni hökumət formalaşandan sonra İşçi qrupu fəaliyyətini davam etdirəcək.
Xatırladaq ki, bu ilin yanvarın 11-də Moskvada Azərbaycan, Rusiya və Ermənistan liderlərinin görüşünün yekunları ilə bağlı baş nazirlərin müavinlərindən ibarət Üçtərəfli İşçi qrupun yaradılması qərara alınıb.
