Bakı Uşaq Teatrı yeni mövsümə başladı
Bu il Bakı Uşaq Teatrı həm uşaq, həm də böyüklər üçün 2 tamaşa ilə yeni mövsümünü açır. xural.com-a daxil olan məlumatda bildirilir ki, “Tıq-tıq xanım” tamaşası ilə öz balaca tamaşaçılarıyla görüşən teatr da Bakı Uşaq Teatrının müvəqqəti yerləşdiyi məkanda – Qaraçuxur qəsəbəsi Q.Abbasov adına mədəniyyət sarayında ( Aura şadlıq sarayının yanı) böyüklər üçün olan “ Günahsız Günahkarlar” tamaşası ilə çıxış edəcək.
Müasir dövrün qlobal problemlərindən olan insan alverinin tanıdılmasına həsr olunan tamaşa Azərbaycan Respublikası Gənclər və İdman Nazirliyinin sifarişi ilə hazırlanıb.
Əsərin müəllifi Arzu Soltan, tamaşanın quruluşçu rejissoru İntiqam Soltan, rəssam Sevda Məmmədova, bəstəkar Mahir İbrahim, rәqslәrin quruluşçusu Könül Şahbazovadır.
Tamaşa gənclər arasında məşhur olan mafiya oyunu üzərində qurulub. Gənclər yığışıb mafiya oynayırlar və özləri də bilmədən insan alveri ilə məşğul olan mafiyanın qurbanlarına çevrilirlər. Kimisi yüksək gəlirli iş adıyla, kimisi ailə qurmaq pərdəsiylə aldadılıb xaricə aparılaraq fiziki və cinsi istismara məruz qalır, kimisi orqan transplantasiyasının qurbanı olur. Bəs bütün bu oyunları quran kimdir? Mafiyanı kim idarə edir? Mafiyanı kim ifşa edə bilər? Gənclər insan alveri haqqında nələri bilməlidirlər?
Bütün bunlar GÜNAHSIZ GÜNAHKARLARda.
Yeni tamaşa, ağrılı mövzu, fərqli rejissor həlli.
Xatırladaq ki, Bakı Uşaq Teatrı maarifləndirici tamaşaların hazırlanmasında çoxillik təcrübəyə malikdir.
Qızılgül – Könül Şahbazova
Ana – İlhamə Əhmədova
Qurban – Rauf Hüseynli
Şikar – Niyaz Qasımov
Elmar – Cavanşir Məhərrəmov
Songül – Vüsalə Bəşirova
Gülnar – Xəyalə Meydanova
Şahmar – Şahin Kazımov
İnam – Ruslan Hüseynov
Jalə – Türkan Şahmarlı
Güllü – Günay Pirizadə