GÜNDƏM

GÜNDƏM  / XuralTAC

Generalın adının hallandığı ölüm hadisəsi-ŞOK FAKTLAR

Xural Yazıldığı tarix 5 May 2019

Artıq bir müddətdir ki, Hüseynov Bəybala Qaraş oğlunun 1988-ci il təvəllüdlü övladı Emin Hüseynovun müəmmalı ölümü və baş verən faciə ilə bağlı lazımi araşdırmaların aparılmaması yöndə məlumatlar, bir çox media qurumlarının gündəmini zəbt edən mövzulardan birinə çevrilib. 

Düzdür, ilk dəfə bu yöndə məlumatlar tanınmış hüquq müdafiəçisi Oqtay Gülalıyev tərəfindən geniş ictimaiyyətin diqqətinə çatdırılmışdı. Yəni, ötən açıqlamalarda da bildirilmişdi ki, Bakı şəhəri, Səbail rayonu, Badamdar qəsəbəsi, T.Məmmədov küçəsi, ev-18, mənzil-11 ünvanda yaşayan iş adamı Hüseynov Bəybala Qaraş oğlu, 1988-ci il təvəllüdlü övladı Emin Hüseynovu 200 000 dollar pulun müqabilində, ilk əvvəl Azərbaycan Respublikasının Baş Prokurorluğu Yanında Korrupsiyaya qarşı Mübarizə Baş idarəsinə işə düzəltdirir, (ilkin olaraq kargüzar, məsləhətçi, 1(bir) il sonra isə rütbə verilərək müstəntiq vəzifəsinə təyin olunacağına söz verilmiş) 18 avqust 2017-ci il tarixdə isə, Emin Hüseynov növbəti məzuniyyəti dövründə Türkiyə Respublikasının Antalya şəhərində istirahət edərkən zəhərləndirilərək öldürülür. Düzdür, bu günə kimi baş verən müəmmalı ölüm faktı ilə bağlı Bəybala Hüseynovun ünvanladığı müraciətlər əsasında ictimaiyyət müəyyən qədər məlumatlandırılıb.

Adı çəkilən şəxs ünvanladığı başqa bir müraciətində isə qeyd edir ki, “Dəfn mərasiminin üçüncü günü idi. Məhəmməd Musayev məni vaxtilə onunla tələbə yoldaşı olmuş, hal-hazırda isə Ağdaş MRX-nın baş həkimi vəzifəsini daşıyan Nuru həkimin yanında əyləşməyə məcbur etdi. Az sonra hiss etdim ki, bu əvvəlcədən hazırlanmış bir plandır.

“Nuru həkimin yanında əyləşməyə məcbur edilməyim də ortaya çoxsaylı suallar çıxarır”

Yəni, Nuru həkim yarım saatdan sonra mənə “sən bu işin başını burax, oğlun öz əcəli ilə ölüb, normal ölüm belə olur” dedi. O halda öz-özümə fikirləşdim ki, bu şəxsin heç nədən xəbəri olmadığı halda, görəsən onu belə bir formada danışmağa kim vadar edir. Onu da bildirim ki, Məhəmməd Musayevin qardaşı Nemət Musayev də, bu şəxslə birlikdə bütün şübhələri gizlətməyə çalışdı və bu gün də bu yöndə addımlarını atmaqdadırlar. Oğluma məxsus mobil telefonun dənizə atılmasına, ikinci telefonundakı yaddaşın silinməsinə münasibət bildirərkən o, “Mən məsələni ciddi şəkildə araşdırdım, bu normal haldır.

Burada şübhəli heç nə yoxdur, oğlun yeməkdən də zəhərlənə bilər” dedi. Bu gün Masallı rayon Məhkəməsinin hakimi bilməlidir ki, dünyasını dəyişən şəxsə məxsus telefonun oğurlanaraq dənizə atılması, ikinci telefonun yaddaşındakı qeydlərin silinməsi, əslində baş verən cinayət hadisəsi ilə bağlı lazım olan dəlil və sübutları gizlətməyin özü də bir cinayət əməlidir. Nemət Musayev haqqında şübhələr olduqca çoxdur və onların hamısını istintaq zamanı açıqlayacağam. O, bir hakim olaraq bunları gözəl bilir, amma belə bir işlərə münasibəti olduqca şübhəlidir. Oğlumun dostu Nicat Rzayev onun şəxsi əşyalarını gətirmək üçün iş yerinə gedir. Onun danışdığına görə, Eminin əşyalarını Şərafət adlı şöbə müdirinin katibəsi öz kabinetinə aparıbmış.

O, Nicatı gördükdə şöbədə olan başqa bir qadın işçi ilə birlikdə ağlamağa başlayır və “Allah bunlara lənət eləsin, heyf Emin Hüseynovdan! İdarəyə Emin kimi oğul gəlməmişdi, yəqin ki, bundan sonra da gəlməyəcək” deyir. Nicatın sözlərinə görə “bilmədim ki, həmin qadınlar idarəni Eminin ölümündə günahlandırırdılar, yoxsa, o, məzuniyyətdə olarkən kabinetini boşaltdıqlarına görə, məyus olmuşdular. Eminin əşyalarını onların özləri idarədən çıxartdılar”.

“Ekspertizalar oğlumun zəhərləndirilməklə öldürüldüyünü təsdiq edir” 

Mən bu yöndə də müəyyən araşdırmalar aparmağa başlamışdım. Hər kəsi müşahidə edirdim və şübhələrimi də gizlətməyə çalışırdım. Türkiyə xəstəxanalarından oğlumun zəhərlənməsinə dair qan təhlillərini əldə etdikdən sonra, Məhkəmə-Tibbi Ekspertizalarına müraciət etdim və Eminin zəhərləndirilməklə öldürülməsinə dair rəylər də aldım. Bundan sonra müəyyən məsələlərə aydınlıq gətirmək məqsədilə Əli Nağıyevə zəng edib onun yanına getdim. Məni çox yüksək səviyyədə qarşıladı və ona oğlumun ölümü ilə bağlı gəldiyimi bildirdim. Çox keçmədi ki, o, Kamran Əliyevə zəng etdi və “Bəybala Hüseynov buradadır, yanına gəlirik” dedi. Hər ikimiz Kamran Əliyevin kabinetinə getdik və o, bizi öz kabinetində çox narahat və həyəcanlı şəkildə qarşılayıb otaqda vargəl də etməyə başladı. Hər üçümüz stolun ayaq hissəsində oturub söhbətə başladıq. O halda mən Kamran Əliyevə- oğlumu zəhərləyərək öldürüblər, bilmədiyim sözü heç vaxt danışmaram dedim. O, isə cavabında çox titrək bir səslə “yəqin ki, bizdən şübhələnməzsən, eləmi” -dedi. Cavabımda, deyə bilmərəm, bildiyim odur ki, oğlum Bakıdan olunmuş zənglə və planlı şəkildə öldürülüb.

“Üçümüzün etdiyimiz söhbət zamanı oğlumun sifarişlə öldürüldüyünü açıqladım”

Ümumi söhbətimiz zamanı özümü elə göstərirdim ki, guya mən onlardan kömək istəyirəm, amma hər kəsi müşahidə edirdim. Az sonra Əli Nağıyev “gedək mənim kabinetimə, sənə köməklik edərik” dedi və biz onun kabinetinə getdik. O halda o, mənə “Bəybala, oğlun xəstə idi, öldü”-dedi. Cavabımda bildirdim ki, oğlum ölən dəqiqəyə qədər onun sağlamlığı haqda xəstəxananın verdiyi arayışlar var, həmin arayışlar da məndədir. Həkimlərin bildirdiyinə görə o, tam sağlam olub, ani müddət ərzində dünyasını dəyişməsinə, məhz ona kənardan verilən zəhərli maddənin təsiri olur. Elə ki, biz onun iş otağına daxil olduq, o halda Əli Nağıyev üç nəfər işçisini- Şərafət, Bəyəli və Emin adlı şəxsləri otağına cağırdı.

“Əli Nağıyevin işçisi məlumatlı olsa da, nədənsə o, susmağa üstünlük verdi”

Hansı ki, oğlum ilk dəfə onu izləyənlər haqda məlumatları Şərafətə bildirmişdi və heç bir yerdə qeydiyyatda olmayan dövlət nişanlı avtomobillərin nömrəsini, həmçinin onu izləyənlərin şəkillərini ona vermişdi. Bu haqda o, tam məlumatlı idi. Buna baxmayaraq həmin vaxtlarda Şərafət oğlumu sakitləşdirir və ona “sən işinlə məşğul ol, biz həll edərik” deyir. Həmin gün Şərafət Əli Nağıyevin otağında “Bəybalaya kömək lazımdır”-dedikdə, Əli Nağıyev bildirdi ki, “bunun üçün öncə ottopsi götürmək lazımdır” cavabını verdi. Mən isə cavab verdim ki, ottopsi yoxdur, biopsi var. O zaman Şərafət bildirdi ki, “Bəybala ərizə yazsın, biz də şübhəli adamların ifadəsini alaq” dedikdə, Əli Nağıyev ərizə yazılmasını, qeydə alınmasını istəmədi və “biz qeyri-rəsmi köməklik edərik”-dedi. Oğlumun təhdid olunması ilə bağlı məlumatlı olan Şərafət heçnə danışmadı, hansı ki, bir ay əvvəl belə bir hal baş vermişdi. Yəni, o, görüşümüz zamanı bununla bağlı dilinə bir söz gətirib danışmadı. Belə bir halın varlığı, onun da bu işdə şübhəli olması anlamına əsas verir. Onlar özlərini elə aparırdılar ki, guya oğlumun mobil telefonu itib. Az sonra onlar məni otaqdan çıxartdılar və içəridə nə danışdılarsa, çox keçmədi ki, Bəyəli məni öz otağına dəvət etdi. O, oğlumun ölüm anındakı videoyazını izlədi və mənə “nə olsun ki, oğlunun telefonunu dənizə atıblar. Nə olsun ki, gəlin telefonda olan bütün məlumatları silib, indi ölümü onun ayağınamı yazaq” dedikdə sual etdim. Sən kimsən ki, kiminsə adına ölüm işi yazasan? Sən yalnız həmin şəxslərdən soruşa bilərsən ki, telefonu dənizə atmağa və telefondakı məlumatları silməyə onları kim vadar edir. Bu işi açmaq üçün istintaq qrupu lazımdır. O, nədənsə kabinetində qəsdən vaxtımı almağa çalışdı və mən nəsə getmək istədikdə, dəfələrlə videoyazını izlədi, arabir ona zəng edirdilər, o da, “oldu, oldu” deyə cavab verirdi.

Müəmmalı ölüm hadisəsi ilə bağlı əsl həqiqətlər, aparılan istintaq zamanı aşkara çıxarıla bilər

Sonda vaxt qazanmaq üçün kompyuterdə işin bütün sirrlərini açıb kimləri necə izlədiklərini mənə göstərdi. Az sonra kimsə ona zəng etdi və həmin zəngdən sonra o, mənə “gedə bilərsən” dedi. Mən tez oradan çıxmağa tələssəm də, hansısa səbəbə görə içimdə bir şübhə baş qaldırmışdı. Oradan çıxarkən iki gəncin şübhəli şəkildə arxamca gəldiklərini gördüm. O halda tez maşınıma oturub geri döndüm və bir daha onları görmədim. Bəyəlinin hansı səbəbə görə, məni gecikdirməsinin səbəbini başa düşdüm və ondan sonra özümü qorumağa başladım. Bəzi məlumatları əldə etmək üçün, hətta “oğluma səni izləyirlər” -deyən dayanacaq gözətçi ilə görüşməyə getdim və ondan hadisənin necə olduğunu da soruşdum.

Gözətçinin dayanacaqdan uzaqlaşdırılması da, bir çox şübhələrin baş qaldırmasına əsas verir

Cavabında o, mənə “oğluna hər şeyi demişəm” cavabını verdi. Elə ki, bir daha o, “sən oğlundan soruş” dedikdə, ona oğlumu zəhərləyib öldürdülər deyə cavab verdim. Həmin anlarda Eminin iş yoldaşı olan Bəyəli mənim onunla danışdığımı gördü və bizi heç görməmiş kimi yanımızdan ötüb keçdi. Az sonra o, dayanacaqdan maşınını götürüb getdi. Bir həftə sonra təkrar gözətçini görmək məqsədilə dayanacağa getdim, artıq o, orada yox idi. Çünki, onu işindən uzaqlaşdırmışdılar. Mən çox çətinliklə olsa da gözətçinin telefonunu tapdım və hansı səbəbə görə işdən getməsini ondan soruşdum. Cavabında o, “mən də bilmirəm, icarəni bir gündə ikiqat qaldırdılar, ona görə də məcbur olub getdim” dedi. Mən onun telefon nömrəsini götürdüm ki, lazım olarsa istintaqa verim, çünki hər şey ilkin olaraq oradan başlamışdır. Ardı olacaq, bizi izləyin.

P.S. Onu da bildirək ki, bu məsələ ilə bağlı Bəybala Hüseynov Baş Prokurorluğa çağırılıb və o, 3 aprel 2019-cu il tarixdə saat 11:00-da Baş Prokurorun 1-ci müavini cənab Rüstəm Usubovun qəbulunda olub. Yəni, müəmmalı ölüm faciəsi adı çəkilən vəzifə sahibinin də diqqətinə çatdırılsa belə, ötən müddət ərzindən bugünə kimi heç bir araşdırma işləri aparılmayıb. Belə bir susqunluq halı yaşandıqca, hər kəsdə müəyyən şübhələr də baş qaldırır. Yəni, belə bir ehtimal hissi formalaşır ki, ölüm faktı ilə bağlı sifariş yüksək çinli vəzifə sahibləri tərəfindən verildiyindən, baş vermiş faciəli olayla bağlı araşdırma işinə başlanılmır. Bəybala Hüseynov şübhəli qaldığı üçün, o, fikirlərini redaksiyamıza bu yöndə çatdırdı.

GundemXeber.Az

GÜNDƏM  / XuralTAC

RATİ mətbuatı bir yerə toplayır

Xural Yazıldığı tarix 3 May 2019

Mayın 3-də Ümumdünya Mətbuat Azadlığı Günü Reportyorların Azadlığı və Təhlükəsizliyi İnstitutu Azərbaycanda Mətbuat Azadlığı mövzusunda dəyirmi masa keçirir.

Bu il YUNESKO-nun himayəsi altında keçirilən Ümumdünya Mətbuat Azadlığı Günü – “Kütləvi informasiya vasitələri demokratiya uğrunda: dezinformasiya dövründə jurnalistika və seçkilər” mövzusunda keçirilir.
Bu, həmçinin 2019-cu ildə bələdiyyə, 2020-ci ildə isə parılament seçkilərinin keçiriləcəyi Azərbaycan üçün də aktual mövzudur.

Tədbir zamanı həmçinin jurnalistlərin təhlükəsizliyi və təqib edilməsi ilə bağlı situasiya, informasiyanın əldə edilməsi problemi, internet senzurası, diffamasiya, KİV-lərin obyektivliyi və müstəqilliyi, KİV-lərin iqtisadi durumu, ictimai teleradio yayım sahəsindəki situasiya, jurnalistika etikasının vəziyyəti, seçki öncəsi KİV-lərin işi və Azərbaycanın media məkanının bir sıra aktual problemləri müzakirə ediləcək.

Tədbirdə spiker qismində aparıcı media ekspertlərinin və Azərbaycanın jurnalist cəmiyyəti nümayəndələrinin çıxış  edəcəyi gözlənilir.

Dəyirmi masa cümə günü, mayın 3-də saat 11-dən 13-dək Hilton otelində  (YAGUT zalı), Azadlıq prospekti 1B, Bakı, Azərbaycan ünvanında  keçiriləcək.

Tədbirə dəvətnaməni RATİ sədri, keçmiş vicdan məhbusu Mehman Hüseynov imzalayıb.

Xural.com

GÜNDƏM  / XuralTAC

Əli İnsanov siyasi təşkilat yaradır

Xural Yazıldığı tarix 2 May 2019

Prezident İlham Əliyevin imzaladığı əfv sərəncamı ilə 14 illik həbsdən sonra azadlığa çıxan sabiq səhiyyə naziri Əli İnsanov, nəhayət ki, mediaya ilk geniş müsahibəsini verib və sensasion fikirlər səsləndirib.

Xural.com xəbər verir ki, “Amerikanın Səsi” radiosunun müxbiri Tapdıq Fərhadoğluna danışan Əli İnsanov bu müsahibəsində artıq yeni müxalif siyasi partiya yaradacağını elan edib.

Əli İnsanov deyib: “Mən siyasətdən uzaqlaşmamışam və yeni bir siyasi qurum yaratmaq fikrindəyəm. Çünki bu saat, Azərbaycanın bugünkü mövcud durumu bunu çox ciddi tələb edir… Azərbaycanda sərbəst fəaliyyət göstərmək, azadlıq, demək olar ki, yox dərəcəsindədir. Mən həbsxanadan çıxandan dərhal sonra 4-5 maşın mənim evimin ətrafında növbə çəkir. Onlar məni bir yana çıxanda, hətta qəbiristanlığa gedəndə belə, müşayiət edirlər. Sonra mənimlə geri qayıdırlar və 24 saat müşahidədəyəm. Yəni faktiki ev dustaqlığındayam. Mənim yanıma gələn insanlar çağırılır, təhdid olunur, qorxudulur – prokurorluqda, polisdə. Belə bir vəziyyətdə, əlbəttə ki, mənim geniş təmas qurmaq imkanım məhdudlaşır. Buna baxmayaraq, bizim Azərbaycanda mövcud olan qurumda mübarizə aparmaq əzmimizi sındıra bilmir. Odur ki, heç şübhə etmirəm ki, yaxın zamanlarda biz istədiyimiz siyasi qurumu yaratmalıyıq və mübarizəyə başlamalıyıq. Mübarizənin məqsədi Azərbaycanda insan azadlığı, insan haqlarının bərpa olunması, tapdanmış haqların insanlara qaytarılması, ədalətin ölkədə bərqərar olması, ölkəmizi məcburu tərk etmiş çox dəyərli vətəndaşlarımızın ölkəyə qayıtması, həbsxanada olan bütün siyasi məhbusların azad olunması, şərlənib həbsxanaya salınmış çox dəyərli vətəndaşlarımızın azadlığa çıxmasıdır… Ən böyük arzularımızdan biri Azərbaycan xalqına firavan həyat bəxş etməkdir. Azərbaycan sərvətləri ilə hər bir vətəndaşı varlı bir insan çevirə bilər. Marqaret Tetçer deyirdi ki, “varlı ingilis vətəndaşı, varlı İngiltərə deməkdir”. Mən güman edirəm ki, biz buna nail ola bilərik. Bizim yaradacağımız siyasi qurum müxalifyönlü, qərbyönlü olacaq”.

Sabiq nazir deyib ki, yaxın aylarda hazırlıq prosesini başa çatdırıb, yaradacaqları qurumu elan edəcəklər və hökumətin təzyiqlərinə baxmayaraq, geri çəkilməyəcəklər: “Bunlar “dəvəni zınqırovla” qorxutmaq istəyirlər. Bu da mümkün deyil… Mən buradan bəyan edirəm: mən kəfən boynumda çıxmışam bu yola. Məni qorxutmaq mümkün deyil. Nə olur-olsun, biz siyasi qurumumuzu yaradacağıq. Xalqımla birlikdə zəfər gününə qədər birlikdə olacağıq”.

Milli Şura ilə əməkdaşlıq imkanlarına toxunan Əli İnsanov deyib ki, əvvəlcə öz qurumlarını yaratmaq, sonra digər siyasi təşkilatlarla əməkdaşlıq etmək niyyətindədirlər: “Mən həbsxanadan çıxan kimi, bir fikir söyləmişdim. İndi onun davamı olaraq demək istəyirəm ki, Azərbaycanda çoxlu siyasi qurumlar fəaliyyət göstərir. Mən istəyirəm ki, onların hər biri daha güclü olsun. Biz də bir qurum yaradacağıq. Birləşmək şərt deyil. Əməkdaşlıq eləmək lazımdır. Ona görə də mən Milli Şura və digər qurumlarla əməkdaşlıq etməyə hazıram. Sadəcə, biz də öz qurumumuzu yaradaq, sonra kollektiv şəkildə əməkdaşlığa başlayaq”.

Əli İnsanov Qarabağ məsələsinin həlli ilə bağlı da maraqlı fikirlər səsləndirib və problemin ancaq sülh yoluyla həll oluna biləcəyini vurğulayıb: “…Bütövlükdə Qarabağ məsələsinin həllində iki problem həll olunmalıdır. Birinci problem ondan ibarətdir ki, biz Azərbaycanda elə xoşagələn, elə gözəgəlimli, elə bir gözəl açıq, demokratik cəmiyyət qurmalıyıq ki, ermənilər – bizim Qarabağdakı vətəndaşlarımız Azərbaycanın tərkibində qalmaqda maraqlı olsunlar. Ermənilərin belə bir atalar məsəli var: “Çörək haradadır, orada qal”. Azərbaycanda gözəl şərait olsa, yaşamaq üçün münbit şərait yaradılsa, ermənilər bizim başımızın üzərindən niyə dünyaya səpələnsinlər? Biz bunu Azərbaycanda yaratmalıyıq. Hədə-qorxu ritorikasını qurtarmaq lazımdır. Bu iki xalqın günahı yoxdur ki, indiki münaqişə bu vəziyyətə gəlib çıxıb. Bu xalqların barışığına getmək lazımdır. Problem ancaq və ancaq sülh yolu ilə həll oluna bilər.

Ona görə də, ikinci məsələ, Azərbaycanı etibarlı tərəfkeş kimi təqdim etmək lazımdır. Beynəlxalq qurumlar Qarabağ məsələsinin həll olunmasında Azərbaycan tərəfinə inanmırlar. Azərbaycanın xarici və daxili siyasəti alverdən başqa bir şey deyil və çoxu yalandır. Necə ola bilər? Biz konvensiyalara imza atırıq, sonra onu yerinə yetirmirik. Neçə nəfər Avropa İnsan Haqları Məhkəməsində, – mən qarışıq, – müsbət nəticə almışıq, qalib gəlmişik. Buna məhəl qoymadılar və dedilər ki, bu, Azərbaycanın daxili işidir, biz o qərarları qəbul etmirik. Axı, sən imza atdığın konvensiyanı belə tapdalayırsansa, beynəlxalq qurumlar Azərbaycana necə inana bilər? Onlar necə təkilf edə bilər ki, Qarabağ erməniləri, Azərbaycan gözəl bir ölkədir, gəlin, burada bunlarla bir yerdə yaşayın. Əgər yetmiş yaşında akademikin cibinə narkotik atıb, ona yeddi il cəza kəsirlərsə, hansı erməni bu ölkədə qalmaq istəyər? Ona görə də biz Qarabağın həlli üçün səbəblərin çoxunu özümüzdə axtarmalıyıq. Biz elə xoşagəlimli olmalıyıq ki, həm ermənilər – bizim vətəndaşlar burada qalıb yaşamaq istəsinlər, həm beynəlxalq təşkilatlar bizə inansınlar, etibar etsinlər və bizim mövqeyimizi dəstəkləsinlər”.

Müsahibəsində Əli İnsanov Azərbayanın Qərblə, Avropa ilə münasibətlərinə də toxunub və deyib ki, əgər prezident İlham Əliyev Azərbaycanı Avropaya aparsa, onu dəstəkləyər: “…Biz Avropaya inteqrasiya etməliyik. Azərbaycanın yeganə yolu Avroatlantik məkandır. Biz Avropa sərhədlərində, həqiqətən, Avropa İttifaqı sərhədlərində yaşasaq, o coğrafiyaya düşə bilsək, Azərbaycanın suverenliyi də, təhlükəsizliyi də təmin oluna bilər. Biz rahat yaşayarıq. Bu, mütləqdir. Ona görə də Avropaya inteqrasiya üçün, mən güman edirəm ki, əgər İlham Əliyev bu gün referendum elan etsə ki, mən Azərbaycanı Avropaya aparıram, mən onu dəstəkləyərəm.”

GÜNDƏM  / XuralTAC

Abidin Fərzəliyevin “gəzən kababxana”ları… FOTO

Xural Yazıldığı tarix 2 May 2019

Nərimanov rayon İcra Hakimiyyətinin qərarını əlində əsas tutaraq Nərimanov parkı ətrafında “iaşə obyekti” adı altında kababxanaların sayı durmadan artır. 

Yeni bir obyekt isə Uşaq Stomatoloji Mərkəzinin qarşısında yerləşdirilib. Əvvəlcə avtobus kimi “gəzən obyekt” şəklində tibb müəssisəsinin qarşısında yerləşdirilən kababxana həm sakinlər, həm də Mərkəzin əməkdaşları tərəfindən narazılıqla qarşılanıb. Beləki əvvəlcə avtobus yerləşdiriləndən sonra arxasında olan “qazon” hissə də sonradan dəmir konstuksiya ilə qaynaqlanaraq ətrafı hasara alınıb, gediş gəlişin qarşısını bağlayır.

“Əgər sabah Uşaq Stomatoloji Mərkəzində yanğın hadisəsi baş verərsə, bunun qarşısını almaq mümkün olmayacaq, çünki ölkədə yeganə olan Uşaq Stomatoloji Mərkəzi hər tərəfdən Abidin Fərzəliyevin obyektləri ilə əhatə olunub. Digər tərəfdən qarşıdan yay gəlir və kabab iyindən, ucuz ərzaq məhsullarının qoxusundan pəncərələri açmaq mümkün deyil”, – deyə Mərkəzin əməkdaşları ürəkyanğısı ilə narazılıqlarını bildirirlər. 

Mərkəzin əməkdaşlarının sözlərinə görə, bu narazılıqları haqqında dəfələrlə İcra Hakimiyyətinin müvafiq şöbələrinə telefonla müraciət olunub. Lakin onlar heç bir tədbir görməyiblər. Bundan sonra Fövqəladə Hallar Nazirliyinin 112 saylı qaynar xəttinə zəng vurularaq, bu haqda xəbərdarlıq edilib. FHN polisə müraciət etməyi vətəndaşlara məsləhət görüb. “Polisə hansı səbəbdən zəng vuracağımızı belə anlamadıq. Bəyəm bu hadisələr polisin gözü qarşısında baş vermir ki? Burada tum satana belə qadağa qoyulur, bu boyda obyekt qurulur, polis, icra hakimiyyəti bundan xəbərsizdir? Hamısının da xəbəri var, çünki daha bir aylıq qazanc yerləri yaradılır. Vətəndaşı saya salan kimdir? Ona görə də ölkədə hakim qurumlara qarşı vətəndaşlarda narazılıq yaranır. Nəticədə də bütün qəbahətlər prezidentin ayağına yazılır. Bunlara bir “dur!” deyən tapılacaqmı?”, – deyən mənbəmiz onu da qeyd etdi ki, bu obyekt üçün elektrik cərəyanı Nərimanov metrostansiyasından götürüldüyü üçün heç bir təhlükəsizlik qaydalarına uyğun olmadan qalın məftillər vasitəsilə çəkilib. Yəni bu qanunsuzluğa Metropoliten də alət olub.

Xural.com-a daxil olan məlumatlara görə “gəzən kababxana” Nərimanov rayon icra hakimiyyətinin başçısı Abidin Fərzəliyevin növbəti obyektlərindəndir. Ona görə də kimsə “kababxana”ya gözün üstə qaşın var deyə bilmir.

Xural.com məlumatı araşdırmağa davam edəcək.

xural.com

GÜNDƏM  / XuralTAC

Ekspert şok fakt açıqladı: “Azərbaycandan Gürcüstana 20.000 hektar torpaq verilib”

Xural Yazıldığı tarix 1 May 2019

Təhlükəsizlik eksperti İlham İsmayıl maraqlı və sensasion fakt açıqlayıb. O, 1938-ci ildə Azərbaycandan Gürcüstana 20.000 hektar torpaq verildiyini və onun geri qaytarılmadığını yazıb. Xural.com İlham İsmayılın statusunu təqdim edir:

“Mən 8 il keçmiş Xanlar rayonu ərazisində DTK-nın əks-kəşfiyyat tədbirlərini həyata keçirən zabit olmuşam. Yəni rayonun kuratoru olmuşam. Xanlar rayonu indiki Samux rayonu ilə bir yerdəydi. Samux bölgəsi Gücüstanla həmsərhəddi, təxminən 66 kilometr məsafədə. Sərhəd bölgəsi haqqında keçmiş materiallarda göstərilirdi ki, 1938-ci ildə hələ Mingəçevir SES tikilməzdən əvvəl, Alazan çayının vadisində Azərbaycana məxsus 20 min hektardan çox əkinə yararlı ərazi 10 il müddətinə Gürcüstana icarəyə verilib. 80-ci illər olmasına baxmayaraq, hələ icarəyə verilən 20 min hektardan çox ərazi geri qaytarılmadığı və xalqlar dostluğunun nümunəsi kimi qeyd edilirdi. Bu ərazi hələ də geri qaytarılmayıb. Zurabişvilinin həyasızcasına Azərbaycana torpaq tələbinə qarşı Azərbaycan dövləti əks tələblə çıxış etməlidir.
İkincisi, Borçalıda muxtariyyət tələbi ilə millətçi qrupların çıxışlarını gündəmə gətirmək lazımdır. Belə dəstələr yoxsa yaratmaq lazımdır.”

Xural.com

GÜNDƏM  / XuralTAC

“Meydan TV”nin yeni direktorunun kimliyi bilindi-FOTO

Xural Yazıldığı tarix 29 Aprel 2019

Xəbər verdiyimiz kimi, “Meydan TV”nin direktoru Emin Milli vəzifəsindən istefa verib, internet kanalından ayrılıb.

Bakupost.az xəbər verir ki, Emin Millinin istefasından sonra “Meydan TV”yə kimin rəhbərlik edəcəyi məlum olub. Bu vəzifəyə kanalın əməkdaşı Camal Əli seçilib.

Qeyd edək ki, Camal Əli məşhur “Host” rep qrupunun üzvlərindən biri olub. O, bir neçə il əvvəl Almaniyaya mühacirət edib və orada siyasi sığınacaq alıb.

GÜNDƏM  / XuralTAC

Onun həbsi də, ölümü də siyasi idi

Xural Yazıldığı tarix 29 Aprel 2019

Hüquq müdafiəçisi Oktay Gülalıyev

Bakı İstintaq Təcridxanasında həyatına müəmmalı şəkildə son qoyulmuş keçmiş siyasi məhbus Mehman Qələndərovun ölümündən 2 il keçir. O da Qiyas İbrahimov və Bayram Məmmdov kimi “heykəl məhbusu” idi. Tbilisidən Bakıya gəlib siyasi məhbusların həbsinə etiraz əlaməti olaraq Heydər Əliyevin heykəli önünüdə tək başına aksiya keçirərkən 2017- ci ilin 07 fevralında həbs olunmuşdu. Həbs olunan zaman işgəncələrə və təhdidlərə məruz qalmışdı…

Mehman Qələndərovun ölümünə aydınlıq gətirilməsi ilə bağlı yerli və beynəlxalq ictimaiyyətin tələblərinə rəğmən hakimiyyət heç bir addım atmadı. Ölüm faktı ilə bağlı cinayət işi açılsa da sonradan xitam olundu…

Mehman Qələndərov ictimai- siyasi fəaliyyətinə və heykəl önündəki aksiyasına görə həbs olunmuşdu. Onun həbsi də, ölümü də siyasi idi. Əslində Mehman Qələndərovun həbsi siyasi qətl idi. Məhz bu səbəbdən də onun ölümünün üstü rəsmi şəkildə açılmayıb…

Amma bizlər nə Mehman Qələndərovu unutduq, nə də onunla ölümü ilə bağlı cinayəti. Onun qatilləri onu şərləyib həbs edənlər, ölümə sürükləyənlərdir. Biz inanırıq ki, Mehmanların arzuladığı azad, demokratik, hüquqi cəmiyyəti quracayıq və o zaman həm bu cinayətlərə hüquqi qiymətlər veriləcək, həm də onların ruhu sakitlik tapacaq…

GÜNDƏM  / XuralTAC

Avropa Komitəsi: “Azərbaycan hakimiyyəti işgəncələrə son qoymalıdır”

Xural Yazıldığı tarix 28 Aprel 2019

İşgəncələrin, qeyri-insani və ləyaqəti alçaldan rəftarın və ya cəzanın qarşısının alınması üzrə Avropa Komitəsi (İQAAK) cinayət təhqiqatlarının aparılması zamanı polis qüvvələri tərəfindən şübhəlilərin dindirilməsi yollarının yaxşılaşdırılmasının vacibliyini bildirib.

Komitənin aprelin 26-da açıqlanan illik hesabatında deyilir ki, bəzi ölkələrdə polislə ünsiyyət əvvəlkitək ifadənin alınmasına yönəlib ki, bu da amansız rəftar riskini artırır. Halbuki, bu, istintaq altında olan məsələlərlə bağlı dəqiq və səhih məlumatın alınmasına yönəlməlidir.

İQAAK qeyd edir ki, polis dindirmələri zamanı amansız rəftarın tətbiqi ölkələrin çoxunda ciddi problem olaraq qalır. Son on ildə Komitə Avropa Şurası ölkələrinin təxminən üçdə birindən polis tərəfindən amansız rəftarla bağlı məlumatlar alıb ki, bunu da işgəncə kimi təsnifləndirmək olar.

Hesabatda tövsiyə olunur ki, polisin amansız rəftarının qarşısının alınması üçün milli hakimiyyət orqanları dindirməyə istintaq yanaşması əsasında polis dindirmələrinin keçirilməsi prinsiplərini və ya dəqiq qaydaları işləyib hazırlasınlar. Belə yanaşma “ittihamedici” sayılmır, səhvlər və yalan ifadələr riskini azaldır. Bu, Avropa Şurasının bir neçə ölkəsində hazırlanıb və İQAAK -ni monitorinq keçirməyə ruhlandırıb. Bu hərəkətlər tədricən universal səviyyədə geniş tanınmaya başlayır.

2018-ci il mayın 31-də və iyunun 1-də Azərbaycanda yüksək səviyyədə danışıqlar aparılıb. Danışıqlar zamanı hüquq-mühafizə orqanları və həbsxanalarla bağlı İQAAK -nin tövsiyələrinin icrası müzakirə edilib. Həmçinin hüquq-mühafizə orqanları əməkdaşları tərəfindən işgəncələrə və amansız rəftarın digər formalarına dair bəzi şikayətlərin araşdırılması müzakirə olunub. Bunlar barədə İQAAK -yə 2015-2017-ci illərdə qurumun xüsusi başçəkmələri zamanı məlum olub.

Yeddi səfər haqqında hesabatların və cavabların xüsusi dərci, xüsusilə İQAAK və Azərbaycan hakimiyyəti arasında intensiv dialoq (2017-ci ilin fevralında və 2018-ci ilin may/iyun aylarında Bakıda yüksək səviyyədə keçirilmiş danışıqlar da daxildir) böyük dönüş olub və hakimiyyətin Komitə ilə dialoqu genişləndirmək əzmində olduğunu göstərir.

İQAAK bu qərarı alqışlayıb. Bu, İQAAK -nin göstərdiyi bir çox ciddi problemin həllində şəffaflığa sadiqliyə siqnal ola bilər.

İQAAK -nin səfərlərilə bağlı nəticələr göstərir ki, polis və digər hüquq-mühafizə orqanları tərəfindən işgəncələr və amansız fiziki rəftarın digər formaları, hüquq-mühafizə sistemində korrupsiya və cəzasızlıq sistemli və endemik olaraq qalır.

İQAAK 2017-ci ilin oktyabrında xüsusi səfər zamanı dəfələrlə qeyd edib ki, polis, digər hüquq-mühafizə orqanları və ordu tərəfindən saxlanılan şəxslərə qarşı işgəncələr, amansız fiziki rəftarın digər formaları geniş yayılmış olaraq qalır və saxlanılan şəxslər (əsasən söhbət hüquqlar haqda informasiyanın, həbsdə olma, vəkilin və həkimin yanına buraxılma barədə bildirişin təqdimatından gedir) üçün qeyri-effektiv hüquqi zəmanət və cəzasızlıq problemi (effektiv təhqiqatın olmaması) mövcuddur.

Qanunvericilik islahatlarına baxmayaraq, (“Penitensiar sistemin fəaliyyətinin yaxşılaşdırılması, cəza siyasətinin humanistləşdirilməsi və həbs cəzası ilə bağlı olmayan alternativ sanksiyaların və preventiv tədbirlərin yaxşılaşdırılması barədə” Azərbaycan Respublikası prezidentinin fərmanının qəbulundan sonra) həbsxanaların dolu olması, pis şərait, qeyri-adekvat fəaliyyətin olmaması (xüsusilə məhbuslar və ömürlük mühakimə olunanlar üçün), keyfiyyətli tibbi xidmətin olmaması problem olaraq qalır.

Dərc edilmiş hesabatlarda psixiatriya xəstəxanalarında və sosial yardım evlərində ciddi problemlərin olması, o cümlədən bir çox xəstəxanada yaşayış şəraitinin pis olması, pasientlər arasında zorakılığın olması (xüsusilə Gəncə psixiatriya xəstəxanasında) və könüllü olmayan pasientlər üçün effektiv hüquqi zəmanətlərin olmaması əksini tapır.

İQAAK ümid edir ki, səfərlər (və cavablar) barədə həmin yeddi hesabatın dərci Azərbaycan hakimiyyətinin hesabatlarda qeyd olunan ciddi problemləri effektiv həll etməkdə əzmli olduğunu göstəir. İQAAK ilk addım kimi istərdi ki, ölkənin ali siyasi rəhbərliyi Azərbaycanda azadlıqdan məhrum edilmiş şəxslərə qarşı işgəncələrə və amansız rəftarın digər formalarına “sıfır dözümlülük” haqda açıq, sərt və birmənalı bəyanatla çıxış etsin. Bu kontekstdə Aİ komitənin tövsiyələrinin icrasında Azərbaycana yardım göstərilməsi məqsədilə hakimiyyətlə əməkdaşlığən davamına ümid edir.

Contact.az

GÜNDƏM  / XuralTAC

Gürcü polislər azərbaycanlı gəncləri vəhşicəsinə döyərək saxta ittihamla həbs ediblər

Xural Yazıldığı tarix 26 Aprel 2019

Namaz Namazov: “Bizi heç bir səbəb olmadan milliyyətcə gürcü polislər vəhşicəsinə döydülər, təhqiramizcəsinə bizə “tatrebi” dedilər.”

Gürcüstanın Marneuli rayonunun azərbaycanlılar yaşayan Təkəli kəndinin 3 gənc sakini 17 aprel 2019-cu il tarixdə polis özbaşınalığının qurbanı olublar. Marneuli rayon Şulaver Polis Bölməsinin 5 nəfər əməkdaşı, Şaumyan qəsəbəsi inzibati ərazisində, Təkəli kənd sakinləri Elçin Aslanovu, Musa Namazovu və Namaz Namazovu heç bir səbəb olmadan vəhşicəsinə döyüb, sürüyərək maşına mindirib, sonra bölməyə gətirərək, orada təkrar döyüb, daha sonra isə Elçin Aslanov və Musa Namazovu saxta ittihamla (polisə müqavimət) həbs ediblər.

Digər şəxs Namaz Namazovu isə Marneuli Polis İdarəsində 1 gün qanunsuz saxladıqdan sonra 18 aprel 2019-cu il tarixdə azad ediblər. Bu insidentlə bağlı polis tərəfindən vəhşicəsinə döyülən Namaz Namazov mətbuat üçün açıqlama yayıb. N.Namazov bildirib ki, onun və digər iki gəncin milliyyətcə gürcü polislər tərəfindən döyülməsi ilə bağlı operativ olaraq Gürcüstan Baş Naziri Mamuka Baxtadzeyə, Ombudsman Nino Lomcariyaya, Daxili İşlər Naziri Giorgi Qaxariyaya, Baş Prokuror Şalva Tadumadzeyə və Gürcüstan Parlamentinin Vitse Spikeri Giorgi Volskiyə şikayət verilib.

Namaz Namazov bəyan edib ki, onu milliyyətcə gürcü polislər döyüb və milli kimliyini təhqir edərək ona “tatrebi” (“eşşək tatar”) deyiblər. O düşünür ki, bu məsələyə görə onun şikayətinin Gürcüstanda obyektiv araşdırılması şübhəlidir. Ona görə də insidentlə bağlı Azərbaycan Respublikasının Prezidenti cənab İlham Əliyevə də rəsmi müraciət göndərib. Rəsmi müraciətin surəti eyni zamanda Azərbaycan Respublikası İnsan Hüquqları üzrə müvəkkili Elmira Süleymanovaya, deputatlar Fərəc Quliyev və Qüdrət Həsənquliyevə də ünvanlanıb. O bildirib ki, ona, həmçinin digər Təkəli kənd sakinləri Elçin Aslanov və Musa Namazova qarşı zorakılıq tətbiq edilməsi, saxta ittiham irəli sürülməsi, milli kimliklərinin milliyyətcə gürcü polislər tərəfindən təhqir edilməsinə Azərbaycan Respublikasında da hüquqi qiymət verilməlidir. Çünki bu, faktiki olaraq Gürcüstanda azərbaycanlıların milli diskriminasiyasıdır.

Gürcüstanın Marneuli rayonu Şulaver Polis Bölməsinin milliyyətcə gürcü polisləri tərfindən döyülən və milli kimliyi təhqir edilən Namaz Namazovun Azərbaycan Respublikası Prezidentinə göndərdiyi rəsmi müraciətdə deyilir:

“Möhtərəm Prezident İlham Əliyev,

Yazaraq nəzərinizə çatdırıram ki, Gürcüstanda, azərbaycanlı olduğum üçün, Gürcüstan Daxili İşlər Nazirlyinin polis əməkdaşları tərəfindən həm milli diskriminasiyaya, həm də fiziki zorakılığa məruz qalmışam. Məni və iki nəfər Marneuli muniçipaliteti Təkəli kənd sakinini Marneuli muniçipaliteti Şulaver Polis Bölməsinin milliyyətcə gürcü polis əməkdaşları vəhşicəsinə döyüblər, məni 1 gün Marneuli rayon Polis idarəsində saxlayıblar, digər iki nəfəri Elçin Aslanovu və Musa Namazovu isə saxta ittihamla həbs ediblər.

Bilririəm ki, 17 aprel 2019-cu il tarixdə, mən Marneuli muniçipaliteti, Şaumyan qəsəbəsi inzibati ərazisində yerləşən otaracaqda iş başındaydım. Həmin ərazidə sahibkarın qoyun sürüsünü otararaq çobanlıq edirəm. Qeyd edim ki, 17 aprel 2019-cu il tarixdə təxminən 17.30 radələrində həmin ərazidə, Təkəli kənd sakini Elçin Aslanova, özümə məxsus 10 ədəd qoyun satarkən, ağ rəngli “Folskvagen-Passat” maşında gələn 5 nəfər mülki qeyimli şəxs (sonradan məlum oldu ki polis əməkdaşlarıdır), Elçin Aslanovun içində olduğu, Musa Namazovun idarə etdiyi “Mersedes-Sprinteri” yük minibusunu saxlatdılar və onları maşından düşürüb döyməyə başladılar. Onlara bildirdilər ki, siz qoyunları oğurlamısınız. Mən bunları eşidirdim və tez onların olduğu yerə gəldim, gördüm ki, 5 nəfər mülki geyimli şəxsdən 2 nəfəri (sifətdən tanıya bilərəm) Gürcüstan vətəndaşları, Təkəli kənd sakinləri, azərbaycanlı Elçin Aslanovu və Musa Namazovu vəhşicəsinə döyürlər. Gördüm ki, Musa Namazovun başına vurdular, sonradan sinə nahyəsinə ağır zərbə endirdilər, daha sonra başını maşının qabaq hissəsinə vurdular və yerə yıxıb yerdə döyməyə başladılar. Elçin Aslanovu da yerə yıxıb təpikləməyə, arada ayağa qaldırıb başına və üz nahiyəsinə vurmağa başladılar. Mən dərhal lap yaxınlaşdım və soruşdum ki, bunları niyə döyürsüz, siz kimsiniz? Onları özlərini təqdim etmədilər, mənə dedilər ki, qoyunları bu şəxsər oğurlayıblar. Mən isə bildirdim ki, qoyunları mən satmışam və mənim qoyunlarımdır, onlar oğurlamayıblar. Maşının qapısını açıb 10 ədəd qoyunu mən bayıra buraxdım və dedim ki, nisyə satmışam, ində da başqa vaxt sata bilərəm, nəqd pula. Bunu dedyim təqdirdə onlardan biri məni tutdu, digəri isə başıma yumruq vurdu, nətəcədə ağır zərbədən mən yıxıldım. Həmin iki nəfər mənim yıxlmağıma baxmayaraq məni yerdə döyməyə başladılar, böyürlərimə, ayaqlarıma, başıma təpiklə vurmağa başladılar. Daha sonra məni sürüyərək maşına mindirdilər və mənim milliyyətinimi təhqir etməyə başladılar, hər iki şəxs mənə təkrar-təkrar “tatrebi, tatrebi şen xle xar, şeni deda moqitxan, tatrebi sənə göstərərcəyik” deməyə başladılar. Məni təhqir etdiklərini görüb mən də onlara təhqiramiz sözlər dedim. Biri mənim boğaz nahiyəmdən, əlinin arxası ilə vurudu. Ondan sonra mən nə olduğu yadımda deyil. Bir daha Şulaver Polis Bölməsində özümə gəldim. Gördüm ki, məni divana uzadıblar, özümü çox pis hiss edirdim. Polis əməkdaşlarından biri (sifətdən tanıya bilərəm) üzümə su vururdu, əski parçası ilə kompress edirdilər, mənə həmçinin mouloks mədə dərmanı içirməyə cahd edirdi. Bu zaman əməkdaşlardan biri polis bölməsinin içindəki xidməti kameranın önünü kəsmişdi və məni döyən həmin şəxslərdən biri yenidən gəldi alın nahiyəmdən yumruqla vurdu. Mənə bildirdi ki, səni həbsə atıb başına min oyun açdıracam. Qeyd edim ki, polis bölməsində olduğumuz zaman qanunsuz olaraq mobil telefonlarımız əlimizdən alındı, yaxın qohumlarımıza zəng etməyə imkan vermədilər, hətta mənim təcili yardım çağırın istəyimi rədd etdilər. Bu hadisə təxminən 17.04.2019-cu il tarixdə 21.00 radələrində olmuşdur. Mən polis bölməsində olarkən, mənimlə birlikdə qanunsuz olaraq, zor tətbiq etməklə bölməyə gətirilən Elçin Aslanova və Musa Namazova sodalı su içirtdilər, baş nahiyələrində olan əziklərə kompress qoydular. Və onları razı salmağa çalışdılar ki, sizi həbs etməyəcəyik, bizdən heç bir yerə şikayət etməyin, barışaq, siz evinizə gedin. Təxminən 23.00-24.00 arası məni, Elçin Aslanovu və Musa Namazovu Marneuli Polis idarəsinə apardılar. 3-ci mərtəbədə müstəntiqlərdən biri hər üçümüzdən ayrı-ayrılıqda ifadə almağa başladı. Mən ifadə verən zaman, hadisənin baş verməsi, bizi mülki geyimli polislərin döyməsi, milli kimliyimizi təhqir edərək bizə “tatrebi” (“eşşək tatar”, “eşşək türk”) deməsi, zorla Şulaver Polis Bölməsinə gətirilməyimiz barədə bütün faktları qeyd etmişəm. Daha sonra Elçin Aslanov və Musa Namazovu şərləyərək, barələrində qanunsuz ittiham tərtib edərək guya polisə müqavimət göstərdikləri üçün qanunsuz olaraq həbs etdilər. Halbuki Şulaver Polis Bölməsinin polis əməkdaşları, özlərini təqdim etmədən, mülki qeyimdə gələrək özləri bizi vəhçicəsinə döymüş, bizi “tatrebi” deyərək təhqir etmiş, daha sonra zorla polis bölməsinə gətirmişlər. Məni 17 aprel 2019-ci il tarixdən, 18 aprel 2019-cu il tarixi, saat 17.00 radələrinə qədər Marneuli Polis İdarəsinin 2-ci mərtəbəsində saxladılar. Bu vaxt ərzində bütün qanunları pozaraq, nə valideyinlərimə, nə də vəkilə zəng etməyə heç bir halda imkan vermədilər. Mənə nə su verdilər nə də yemək, hətta tualetdən istifadə etməyi də qadağan etdilər. Məni 18.04.2019-cu il tarix təxminən saat 18.00-da qanunsuz həbsdən azad etdilər və idarədən çıxan kimi, atam Namazov Mansurla görüşdüm və evimizə qayıtdım.

Cənab Prezident İlham Əliyev,

Dünyada yaşayan Azərbaycanlarının lideri olaraq, Azərbaycan Prespublikasının Dövlət Başçısı kimi Sizdən xahiş edirəm ki, Marneuli muniçipaliteti Şulaver Polis Bölməsində mənim və daha iki nəfər azərbaycanlının üzləşdiyimiz polis özbaşınalığı, bizə qarşı fiziki güc tətbiq etmə, vəhşicəsinə döymə, milli kimliyimizi təhqir etmə faktı ilə bağlı xüsusi istintaq başladılmasına, bu işin Gürcüstan hüquq-muhafizə orqanlarında araşdırılmasına və hüquqi qiymət verilməsinə, bu prosesin Gürcüstanın azərbaycanlılar yaşayan bölgələrində adi hala çevirilməməsinə təsir etmənizi xahiş edirəm. Milliyyətcə gürcü polis əməkdaşlarının belə özbaşınalığı yerli azərbaycanlı əhali arasında Gürcüstan dövlətinə qarşı nifrət hissi oyada, milli zəmində münaqişənin yaranmasına səbəb ola bilər. Mənim və iki nəfər şəxsin başına gələn hadisə Gürcüstanda yaşayan azərbaycanlılara qarşı milli təxribat və insan azadlığına qəsddir.”

Həmçinin əldə etdiyimiz məlumata görə, Marneuli rayonu Təkəli kənd sakinləri, azərbaycanlı gənclər Elçin Aslanov və Musa Namazovla bağlı Marneuli Məhkəməsinin qərarı ilə Gürcüstan Cinayət Məcəlləsinin polisə müqavimət maddəsi ilə barələrində 2 aylıq həbs qətimkan tədbiri seçilib. Eyni zamanda Namaz Namazovun şikayəti əsasında Gürcüstan Parlamentinin İnsan Hüquqları və Vətəndaş İnteqrasiyası Komitəsində və Gürcüstan Baş Prokurorluğunda insidentlə bağlı ciddi araşdırma başlayıb.

Xural.com

GÜNDƏM  / XuralTAC

Sülhəddin Əkbər: “ABŞ Azərbaycana nəzarəti yəhudi verib…”

Xural Yazıldığı tarix 25 Aprel 2019

Dünyanı yəhudilər idarə edirlər – son illərdə ən çox eşitdiyimiz sözdür. Taksi şoferi də belə düşünür, peşəkar siyasətçi də… Bu fikrin populizm, blef, yoxsa bir həqiqət olduğunu birmənalı söyləmək çətindir.

Lakin bəzi reallıqlar göz deşir ki, onlardan biri də elə Ukraynadakı prezident seçkilərində öz təzahürünü tapdı. Söhbət dost ölkədə yəhudi əsilli yumorist Vladimir Zelenskinin qalibiyyətindən gedir.

Bu gənc siyasətçi 1978-ci ildə Krivoy Roq şəhərində yəhudi ailəsində anadan olub. Ona siyasi dəstək verdiyi şübhə doğurmayan oliqarx İqor Kolomoyski də yəhudidir. Qeyd edək ki, Petro Poroşenko da yəhudi əsillidir. Ukraynanın keçmiş baş naziri Arseni Yatsenyuk da yəhudi idi.

Nədir bu siyasətdəki yəhudi enerjisi, yəhudi fenomeni? Axi yəhudilərin siyasətdəki rolu təkcə Ukrayna ilə məhdudlaşmır. Dünyanın fövqəlbəşər dövləti olan ABŞ-da prezident Donald Trampın kürəkəni yəhudi əsilli Cared Kuşnerdir.

Ağ Ev sahibinin yəhudilərə münasibəti Qüdsü İsrail paytaxtı elan etməsində də göründü. Ümumiyyətlə, milyarder yəhudi ailələrinin Amerikanı idarə etdiyi, oradakı seçkilərin müqəddəratını həll etdiyi bildirilir.

Rotşildlər və Rokfellerlər kimi ailələrin kapitalı haqda həmişə mülahizələr səslənib. Baxın, ən varlı yəhudilər qrupu Amerikada dövlət bankı vəzifəsini öz öhdəsinə götürüb. Vaxtilə yəhudi oliqarx, Boris Yeltsinin dövründə az qala Rusiyanı idarə edəcək dərəcədə geniş imkanlara malik olan Boris Berezovski varıydı.

Berezovskinin adamları hər yerdə – parlamentdə, hökumətdə, xüsusi xidmət orqanlarında, hüquq-mühafizə sistemində, o cümlədən Kreml aparatında var idi.

Yəhudi oliqarx Rusiya siyasətində də əsas söz sahiblərindən biri idi və iqtisadiyyatın bir çox gəlirli sahəsinə nəzarət onun əlində idi. Bu səbəbdən Berezovskini zərərsizləşdirmək üçün Kremlə bir neçə il lazım oldu.

Vaxtilə Rusiyanın ən böyük özəl neft şirkəti olan “YUKOS”un yəhudi prezidenti,milyarder Mixail Xodorkovski də siyasətə qarışdığına görə Kremlin qəzəbinə tuş gəlmişdi. Lakin o, Berezovski qədər zirək ola bilmədi və FTX agentləri Xodorkovskini elə onun özəl təyyarəsinin trapındaca saxladılar.

Çoxsaylı iqtisadi cinayətlərdə ittiham olunan Xodorkovskini ABŞ-ın və yəhudi lobbisinin güclü dəstəyi ilə bir neçə il sonra həbsdən qurtula bildi.

Rusiyada Roman Abramoviç, Oleq Deripaska kimi yəhudi oliqarxları da var və onlar Kremllə anlaşaraq bizneslərini hələ də davam etdirirlər.

“Mən deyə bilmərəm ki, dünya milyarderlərinin 90%-i yəhudidir. O rəqəmlə razı deyiləm. Ancaq bəli, əsli Azərbaycandan olan dağ yəhudilərindən bu gün 20-yə qədər oliqarx Rusiyada fəaliyyət göstərir. Bunlar iqtisadi yollarla pul qazanırlar, siyasətlə yox. Bunlar biznesmendir, siyasətə qarışmırlar. Yeri gələndə Azərbaycan dövlətinə, müdafiə fondumuza yardım göstərirlər. Mən yenə də deyirəm, bunlar iş adamlardır, diplomat deyillər. Siyasət sahəsində böyük gözləntilərimiz yoxdur, ola da bilməz”. Bunu isə bir müddət əvvəl 53 saylı Quba-Qusar seçki dairəsindən deputat Yevda Abramov yerli mediaya açıqlamasında demişdi.

Politoloq Sülhəddin Əkbərin “Yeni Müsavat”a dediyinə görə, yəhudilərin tarixdə gücü heç vaxt indiki qədər olmayıb.

Onun sözlərinə görə, Ukraynanın hazırkı baş naziri də yəhudidir: “Nəzərə alsaq ki, Zelenski kimi baş nazir Qroysman da yəhudidir, o halda Ukraynada hakimiyyət yəhudilərin əlində cəmləşib. Səbəblərin dərinliyini bilmək üçün yəhudilərin tarixini, siyasi, maliyyə, informasiya və dini təsirini öyrənmək lazımdır. Bu, bir neçə cümlə ilə izah oluna bilməz. Onların yüksəliş dövrü 1917-ci ildə sosialist inqilabı və SSRİ-nin ələ keçirilməsi dövrünə təsadüf edir.

O zaman Kommunist Partiyasının rəhbərliyində əksəriyyət yəhudlər idi. Mən təklif edərdim ki, amerikalı sabiq senator Devid Dyukun “Yəhudi məsələsi” kitabı ilə tanış olasınız, orada yəhudilərin siyasətdəki rolu ətraflı yazılıb. İndi isə dünyada yeni yəhudi yüksəlişi, dalğası müşahidə olunur.

Düşünürəm ki, ardınca anti-yəhudi dalğasını gözləmək lazımdır. Xüsusən də bu dalğanın anqlo-sakson dünyasından başlayacağı gözləniləndir”.

S.Əkbərin fikrincə, yəhudilər Amerikada da iqtidarı ələ keçirib: “Yəhudi sionistlər xristian sionistləri – yevangelistləri özlərinə tərəf çəkiblər. Dünyadakı savaşların da səbəblərindən biri budur. Amerikanın dünyadakı liderliyində yaranan axsamaların da səbəblərindən biri budur. Yəhudilər dünya siyasətinə Tramp vasitəsilə təsir etməyə başlayıblar. Anqlo-sakslar isə yəhudi təşkilatlarını bölməyə çalışırlar. Hazırda Avropada Sorosla Rotşildlər arasındakı davanın səbəbləri də bu məsələlərdən qaynaqlanır. Eyni zamanda Fransadakı ”sarı jiletlilər” hərəkatının arxasında bu məsələlər dayanır. Eləcə də Afrikada, müsəlman dünyasında baş verən hadisələrə də yəhudilərlə anqlo-sakslar arasında gedən mübarizə təsir etməkdədir.

Ona görə də bu dərinliyi bilmədən siyasəti, dünyada və regionda baş verənləri təhlil etmək çətindir. Azərbaycana gəlincə, ABŞ strateji baxımdan nəzarəti yəhudilərə verib”.

GÜNDƏM  / XuralTAC

Mübariz Mənsimov Rövnəq Abdullayevi hədələdi: “bildiklərimi yazsam, bu dünyada özünüzə yer tapa bilməzsiz”

Xural Yazıldığı tarix 22 Aprel 2019

Mübariz Mənsimov,

“Palmali” şirkətlər qrupunun prezidenti, media düşməni

“Palmali” şirkətlər qrupunun prezidenti, məşhur media düşməni Mübariz Mənsimov son zamanlar statuslarında hakimiyyətin və onun bir zamanlar əməkdaşlıq etdiyi məmurların əleyhinə sərt statuslar yazır. Hələlik “mən Heydər Əliyevin əsgəriyəm!” müsajları versə də, aydın olur ki, döyüşdüyü adamlar da elə Heydər Əliyevin əsgərləridir. Xural.com Mübariz Mənsimovu çox yaxşı tanıyır, amma onun səmimiyyətinə zərrə qədər də inanmır. Ancaq ictimai rəydə böyük ajiotajla qarşılandığına görə bu media düşməninin statusunu təqdim edirik:

“Bakıdan bir məmur zəng etdi ki, “qardaş, əla yazırsan, amma “like” qoya bilmirik, “like” edəni aparırlar, amma bil ki, çox bəyənirik”. Dedim, qardaş, mən özümü bəyəndirmək üçün bunları yazmıram. Kim istəyir, bəyənsin, kim istəmirsə, yox. Anlamıram: mən dövlətdən, prezidentdən yazıram? Həmişə qeyd edirəm ki, dövlətimin yanındayam, ulu öndər Heydər Əliyevin sadiq əsgəriyəm! Dövlətə qarşı yazanlara səs çıxarmayıb, hətta əl altından dəstəkləyənlər öz adları çəkiləndə narahat olurlar. Məni siyasi oyunlara qatmayın! Əl çəkin millətdən! Göstərişlər verdirirsiniz ki, məni insanlar pisləsin? Yazıqlar…

SOCAR-dan yazanda niyə çaxnaşma düşür? Saytlar dağıdılır, adamlar “Bandotdel”ə aparılır. Kimsiniz siz?! Rövnəq, ya da qulbeçələri dövlətdən üstündür? Nə özbaşınalıq edirsiz? Türkiyədə mənasız, qazancı yalnız trollarınızın cibinə gedən TV açana qədər Azərbaycanda bir TV açıb, kasıb jurnalistləri işə alsaydınız, dünya dağılardı? Qoy, həmin jurnalistlər tapşırığınızla əleyhimə yazaydılar, ancaq iş sahibi olaydılar. Onsuz da sizdən xeyir gəlməz. Həqiqətən, dərin quyu qazansınız. Çox dərin quyular qazırsınız. Amma bir gün özünüz ora düşəcəksiz, darıxmayın. Abdullayevlər, qohumları, Anar Əliyev, Adnan Əhmədzadə! İllik qazanc, sərvət və var-dövlətiniz satılsa, hər ay xalqın 1 illik qaz və elektrik pulunu ödəmək olar. Bəsdir dövlətdən oğurlayıb, xalqın cibinə girdiniz! Bir vaxtlar ortaq olduğum, oğru olduğunuzu gördükdən sonra ortaqlıqdan çıxdığım “SOCAR Trading”dəki oyunlarınızdan yazsam, bu dünyada özünüzə yer tapa bilməzsiz. Vaxtilə qapımda gözləyən Anar Əliyev indi lovğalanaraq deyir ki, “SOCAR Trading”i elə qurdum, belə qurdum. Mənim əlaqələrim olmasaydı, yerinizdən tərpənə bilməzdiniz. Dövlətin etimadından sui-istifadə edib, xalqımın sərvəti ilə özünüzə səltənət qurmusunuz. Elə həmin Adnan Əhmədzadə, bütün dünya sizin sərvətlərinizdən danışır. Maşın, şirkət, mülklərinizdən. Son 4 ildən bəri “Palmali”ni məhv etməyə çalışırsız. Alınmayacaq! Amma sizə bir təşəkkür borcum var. Sayənizdə satın aldığınız içimizdəki xainlər, çaqqallar ifşa olundu. Yaxşı ki, onlarla yollarımızı ayırdıq. İndi biz sarsılmaz qalayıq. Siz çox sərt qayaya rast gəlmisiniz. Bir daha deyirəm: qorxmayın!”

Xural.com

P.S. Yazıda adı çəkilənlərin də cavab haqlarını dərc etməyə hazırıq.

GÜNDƏM  / XuralTAC

Dünya Mətbuat Azadlığı İndeksində Azərbaycan 166-ci yer tutub

Xural Yazıldığı tarix 21 Aprel 2019

Sərhədsiz Reportyorlar (RSF) Təşkilatı 2019-cu il Dünya Mətbuat Azadlığı İndeksini açıqlayıb.

Bu indeks hər il 180 ölkə və ərazidə jurnalistikanın durumunu dəyərləndirir. Qurum bir çox ölkələrdə siyasi liderlərin jurnalistlərə ifadə etdiyi düşmənçiliyin tez-tez ciddi zorakılıq forması aldığını, jurnalistlər üçün qorxu və təhlükəni görünməmiş həddə qaldırdığını bildirir.

Azərbaycan 180 ölkə içində 166-cı yeri tutub.
“Prezident İlham Əliyev plüralizmin bütün formalarını əzməklə kifayətlənməyib, 2014-cü ildən bəri olub-qalan media tənqidçilərinə qarşı amansız müharibə aparır. Müstəqil jurnalistlər və bloqerlər qısnama, döyülmə, şantaj və rüşvətə boyun əyməyincə absurd ittihamlarla həbs olunurlar. Zerkalo və Azadlıq qəzetləri kimi müstəqil media iqtisadi baxımdan boğulub. AzadlıqRadiosu zorla bağlanıb. Əsas müstəqil xəbər vebsaytları bloklanıb. Mühacirətdə müqaviməti davam etdirənləri susdurmaq üçün hakimiyyət onların Azərbaycandakı ailə üzvlərinə təzyiq göstərir. Rejim Gürcüstan və Ukraynada jurnalistləri həbs etdirməklə, Fransada məhkəməyə müraciət etməklə repressiyasını ixrac edib. Rejim yalnız təzyiq altında geri çəkilə bilər – belə bir təzyiqə həmişəkindən daha çox ehtiyac var”, RSF qeyd edir.

Rəsmilər hələlik, bu indeksə münasibət açıqlamayıblar. Hakimiyyət təmsilçiləri həmişə ölkədə mətbuat azadlığının tam təmin olunduğunu, heç bir jurnalistin peşəsinə görə təqibə məruz qalmadığını deyirlər.

Şərqi Avropa və Orta Asiya regionu indeksdə axırdan ikinci yeri tutur, yəni illərdir olduğu mövqeyini qoruyub saxlayır. Bu region ölkələrindən yarıdan çoxu indeksdə 150-ci yerə yaxın, yaxud ondan aşağıda qərarlaşıblar.

Təşkilat qeyd edir ki, Rusiya və Türkiyədə müstəqil media orqanlarının təqibi davam edir.

“Türkiyə dünyada peşəkar jurnalistlərin ən çox həbsdə olduğu ölkədir. Həm də yeganə ölkədir ki, Cənnət Sənədləri (Paradise Papers) ilə bağlı reportajlarına görə jurnalist mühakimə olunub”, təşkilat bildirir.

Ermənistan 9 pillə irəliləyərək 61-ci yeri tutub. Bu ölkədə “məxməri inqilab”dan sonra hökumətin dövlətə məxsus media üzərində nəzarətinin yumşaldığı bildirilir.

Gürcüstan isə 60-cı yerini qoruyub saxlayıb. Bu ölkədə medianın müstəqil, ancaq xeyli qütbləşmiş olduğu vurğulanır.
“2017-ci ildə Tbilisidə azərbaycanlı dissident jurnalist Əfqan Muxtarlının oğurlanması ilə bağlı aparılan təhqiqat hələ ki, ortaya inandırıcı nəticələr qoymayıb. Muxtarlının sirli şəkildə oğurlanması və daha sonra Azərbaycanda həbsi gürcüstanlıları sarsıdıb. Axı, bu ölkə adətən qonşuları üçün adətən bir sığınacağa çevrilmişdi”, RSF bildirir.
İran dünyada jurnalistləri ən çox həbs edən ölkələrdən biridir, 170-ci yerdə qərarlaşıb.

Bir çox avtoritar rejimlər indeks üzrə geriləyiblər. Venesuela beş pillə geriləyərək 148-ci, Rusiya isə bir pillə düşərək 149-cu olub. Kremlin müstəqil media və internetə təzyiqi gücləndirmək üçün həbslərdən, qanunsuz axtarışlardan, məhdudlaşdırıcı qanunlardan istifadə etdiyi bildirilir.

“Jurnalistlərin təqibi zamanı zorakılıqdan istifadənin artıq hüdudu yoxdur. Ötən oktyabrda səudiyyəli yazar Camal Xaşokçinin İstanbuldakı Səudiyyə konsulluğunda qətli Səudiyyə Ərəbistanının (172-ci yer) sərhədlərindən çox-çox uzaqlarda jurnalistlərə üşüdücü mesaj göndərdi. Sağ qalmaq qorxusu regionda bir çox jurnalistlərin özünə senzura qoyması, yaxud yazmağı tamam atmasıyla sonuclanıb”, Sərhədsiz Reportyor Təşkilatı bildirir.

Vyetnam (176), Çin (177), Eritrea (178), Şimali Koreya (179) və Türkmənistan (180) qərarlaşıb.

Norveç artıq üçüncü ildir birinci yeri tutur. İkinci yerdə Finlandiya gəlir. Bu ölkədə mütəşəkkil cinayətkarlığı araşdıran iki jurnalist daimi polis qoruması altında yaşayır. Kiber qısnamanın artması nəticəsində İsveç üçüncü yerə düşüb. Dördüncü yerdə Niderlanddır.

amerikaninsesi.org

GÜNDƏM  / XuralTAC

Elinanın ölümündə günahlandırılan Xalidə Bayramova açıqlama yaydı

Xural Yazıldığı tarix 21 Aprel 2019

Səbail rayon İcra Hakimiyyəti başçısının müavini Xalidə Bayramova 162 saylı məktəbin şagirdi Elina Hacıyevanın ölümündə onu ittiham edənlərlə bağlı açıqlama yayıb.

Xural.com xəbər verir ki, o, Meydan TV-yə yazılı açıqlama göndərib.

Həmin açıqlamanı təqdim edirik:

“Bir sıra səbəblərdən, cəmiyyətimizi silkələmiş və ciddi narahat edən Elina Hacıyeva ilə bağlı faciəvi hadisəyə cəlb olunmuş durumdayam. Çox acı həqiqətdir ki, uşağı qaytarmaq mümkün deyil və buna görə onun bütün yaxınlarına və dostlarına səmimi qəlbdən başsağlığı verirəm. Bugünə kimi dövlət məmuru və məsul şəxs olaraq hər hansı bir açıqlamadan və şərhdən yayınmışam. Və hesab edirəm ki, açıqlama verərkən diqqətli olmalıyam. Bütün hallarda, istintaq gedir və hüquq-mühafizə orqanları baş vermiş faciəyə obyektiv hüquqi qiymət verəcəklər. Lakin bəzi məsələlər vardır ki, mətbuatda və sosial mediada spekulyasiya və manupulyasiya predmetinə çevrilmişdir və hansındakı mənim adım hallandırılır. Aprelin 4-də səhər saat 09:57-də 162 nömrəli məktəbin direktoru Sevinc Abbasovadan mənə zəng oldu ki, şagirdlərdən biri pəncərədən yıxılıb. Mən, Səbail rayon İcra hakimiyyətinin başçısının birinci müavini olmaqla yanaşı, yetkinlikyaşına çatmayan şəxslərlə iş üzrə rayon komissiyasının sədri və Uşaq Fondunun rayon şöbəsinin direktoruyam. Uşaqlarla iş mənim vəzifələrimə daxildir. Buna görə də belə bir zəng başadüşülən idi. Zəngdən dərhal sonra birbaşa rəhbərim olan rayon içra hakimiyyəti başçısına hadısə barədə məlumat verdim və onun tapşırığı ilə qeyd olunan məktəbə getdim. Yolüstü baş vermiş hadisə haqqında polisə məlumat verdim. Məktəbə 11:01-də çatdım (bu barədə məktəbin kamerasında qeyd var). 6 dəqiqə sonra, 11:07-də mən təcili yardıma zəng etdim. Elinaya çatmaq, şəraiti öyrənmək və anlamaq ki, təcili yardım hələ də çağırılmayıb, 6 dəqiqə buna sərf olundu. Sosial şəbəkələrdə yayılan uşaqla birinci danışığın videoyazılışı mənim tərəfimdən təcili yardım gəldikdən sonra, həkim uşağı müayinə edərkən 11:16-da aparılıb və 14 saniyə çəkib.

Qalan videolar xəstəxanada həkimlər Elinanı müayinə edən zaman tərəfimdən çəkilib. Belə çətin vəziyyətlərdə video çəklişin aparılması praktikasına uzun illərdir malikəm. Belə etməklə məqsədim baş verən prosesin maksimum şəffaflığını təmin etmək, hadisənin sonrakı araşdırılması üçün faktları qeyd etmək olub. Xəstəxanada sadəcə müşahidə etmirdim, Elinan həyata qaytarılması üçün lazım olan bütün tədbirlərin görülməsinin təmin olunmasına çalışırdım. Bu zaman keçirdiyim hiss və həyacanları, ağrını və yanğını sözlə izah etmək mümkün deyil.

Sözügeden video mənim tərəfimdən Elinanın faciəvi ölümündən sonra anasının xahişi ilə ona verildi. Belə ki, bu çəkiliş ondan, hələ canlı, gözəl, ağıllı və xeyirxah qızdan qalan son xatirə idi.

Sosial mediada və mətbuatda hadisə ilə bağlı adımın hallandırılması və yazılanlar həqiqətəuyğun deyildir. Mənim hərəkətlərimdə kömək etmək istəyi və ürəkyanğısından başqa digər motivlərin axtarılması qoy axtaranların vicdanında qalsın”.

GÜNDƏM  / XuralTAC

Fazil Məmmədovun 500 milyonluq sərvəti-Siyahı+SƏNƏDLƏR

Xural Yazıldığı tarix 19 Aprel 2019

“Mətbuat yazır ki, keçmiş vergilər naziri Fazil Məmmədovun yeznəsi onun bankını silib-süpürüb. Halbuki, Fazil Məmmədov özü, elə yeznəsi ilə birlikdə ölkəni silib-süpürüb”. 

“AzPolitika.info“nun məlumatına görə, bunları araşdırmaçı-jurnalist Cavanşir Həsənli yeni araşdırmasında yazır.

“Yeznəsinin ölkə xaricindəki, ələlxüsus İngiltərədəki, Almaniyadakı şirkətlərinin sayı-hesabı yoxdur”, – yazan jurnalist, sabiq nazirin yalnız “Synergy Group” şirkətlər qrupuna daxil olan biznes strukturlarının siyahısın açıqlayıb. Bildirib ki, təqdim etdiyi maliyyə sənədində YARIM MİLYARD civarında açıqda olan aktivlər əks olunub.

Həmin siyahını və sənədləri təqdim edirik:

1. “Synergy Group” MMC – baş müәssisә;

2. “AAC” MMC – inşaat materiallarının istehsalı, törәmә müәssisә, iştirak payı 39%;

3. “Synergy Construction” MMC – inşaat, törәmә müәssisә, iştirak payı 100%, aşağıdakı müәssisәdә iştirak payına malikdir:
a) “Renaissance Construction Azәrbaycan” MMC – inşaat, birgә müәssisә, iştirak payı 50%;

4. “Azagro” MMC – kәnd tәsәrrüfatı, törәmә müәssisә, iştirak payı 100%;

5. “B.N.M.” MMC – turizm vә otelçilik, törәmә müәssisә, iştirak payı 100%;

6. “Cybernet” MMC – informasiya texnologiyaları, törәmә müәssisә, iştirak payı 100%, aşağıdakı müәssisәdә iştirak payına malikdir:

7. “Azorchid Hotels” MMC – turizm vә otelçilik, törәmә müәssisә, iştirak payı 70%;

8. “Caspian Coast Winery and Vineyards” MMC – şәrabçılıq, törәmә müәssisә, iştirak payı 50%, aşağıdakı müәssisәdә iştirak payına malikdir:

a) “Tradehouse Caspian Coast Winery and Vineyards” MMC – şәrab mәhsullarının satışı vә paylanması, törәmә müәssisә, iştirak payı 100%;

9. “Khazar-Turizm” MMC – turizm vә otelçilik, törәmә müәssisә, iştirak payı 100%;

10. “Bestpack” MMC – poliqrafiya vә qablaşdırma, törәmә müәssisә, iştirak payı 100%;

11. “Caspian Agro” MMC – kәnd tәsәrrüfatı, törәmә müәssisә, iştirak payı 50%, aşağıdakı müәssisәdә iştirak payına malikdir:

a) “Azagroexport” MMC – kәnd tәsәrrüfatı, törәmә müәssisә, iştirak payı 100%;

12. “Exclusive Dining” MMC – restoran, törәmә müәssisә, iştirak payı 100%;

13. “Shamkir City Hotels and SPA” MMC – turizm vә otelçilik, törәmә müәssisә, iştirak payı 100%;

14. “Azәrbaycan Universiteti” – tәhsil, törәmә müәssisә, iştirak payı 90%, aşağıdakı müәssisәdә iştirak payına malikdir:

a) “Unicamp” MMC – tәhsil, törәmә müәssisә, iştirak payı 100%;

15. “Ecolime” MMC – tikinti materiallarının istehsalı, törәmә müәssisә, iştirak payı 100%;

16. “Synergy Foundation” – qeyri-kommersiya tәşkilatı, törәmә müәssisә, iştirak payı 100%;

17. “Synergy Development” MMC – daşınmaz әmlakın idarә olunması, törәmә müәssisә, iştirak payı 100%;

18. “Synac” LLC – tәhsil, törәmә müәssisә, iştirak payı 100%;

19. “Synergy Sport” MMC – qeyri-kommersiya tәşkilatı, törәmә müәssisә, iştirak payı 100%;

20. “Synergy Technics” MMC – investisiya şirkәti, törәmә müәssisә, iştirak payı 100%, aşağıdakı müәssisәdә iştirak payına malikdir:

a) “Zәyәmkәndmaş” ASC – metal konstruksiyaların istehsalı, törәmә müәssisә, iştirak payı 51%;

21. “Azerbaijan Global Investments” ASC – investisiya şirkәti, asılı müәssisә, iştirak payı 32%;

22. “Azerbaijan Fibro Cement” MMC – tikinti materiallarının istehsalı, törәmә müәssisә, iştirak payı 100%;

23. “Synergy Jet” MMC, – jet әmәliyyat şirkәti, törәmә müәssisә, iştirak payı 100%;

24. “Synergy Trading” MMC, ticarәt şirkәti, törәmә müәssisә, iştirak payı 100%;

25. “Caspian Development Bank” ASC, törәmә müәssisә, iştirak payı 99.91%;

Rusiya Federasiyasında fәaliyyәt göstәrәn “Tradehouse Caspian Coast Winery and Vineyards” MMC-dәn başqa, Qrupa daxil olan bütün şirkәtlәr Azәrbaycan Respublikasında fәaliyyәt göstәrir.

GÜNDƏM  / XuralTAC

AXH-də daha bir fövqəladə toplantı-İsgəndər Həmidov Nemət Pənahlıdan üzr istədi-FOTOLAR

Xural Yazıldığı tarix 19 Aprel 2019

Azərbaycan Xalq Hərəkatı parçalanma təhlükəsi ilə üz-üzə qalıb. Qurumun 21 idarə heyəti üzvü iki hissəyə ayrılıb. Artıq qruplardan bir tərəf bu gün fövqəladə toplantı keçirərək, ciddi qərarlar qəbul edib.

Valeh İbadov və Ağasif Şakiroğlu idarə heyətindən uzaqlaşdırılıb. Sabiq daxili işlər naziri İsgəndər Həmidov Ramiz və Tağıyevə xəbərdarlıq edilib. Süleyman Kərimov, Salman İmanlı, Yavər Mikayılov və Firudin Əhmədlinin hərəkatın idarə heyətinin üzvü olmadığı elan olunub. Hərəkatın Məclisinin 27 apreldə keçiriləcək iclası təxirə salınıb.

Bu dəqiqələrdə isə digər qrup GAP qərargahında fövqəladə toplantı keçirir.

Toplantıda çıxış edən İ.Həmidov S.Kərimov, S.İmanlı, Y.Mikayılov və F.Əhmədlinin idarə heyətinin üzvü olduqlarını bəyan edib: “Bu adamların idarə heyəti üzvü olmalarına həmin şəxslər səs veriblər. Bu gün ölkəmizdə hansı fövqəladə vəziyyət var ki, sizlər belə bir toplantı keçirdiniz? AXH-də heç nə baş verməyib. Hər kəsə müraciət edirəm ki, işlərini görməyə davam etsinlər. Onların iclasları sifarişli idi. 7 nəfərlə 13 nəfərin hərəkatda taleyini həll edirlər. Tələsik iclas niyə keçirdiniz? Kimlərə hesabat verirsiniz? İclas qeyri-legitimdir. Savaş açdılar, qəbul etdik. Məclisin təxirə salınması ilə aldıqları qərarla bağlı deyirəm ki, bu Məclis baş tutacaq. Günahlarım çoxdur, onlardan biri də Nemət Pənahlının hərəkatdan çıxarılması oldu. Ondan üzr istəyirəm”.

Əks qanadın hərəkatdan uzaqlaşdırdığı A.Şakiroğlu qarşı tərəfi xəyanətdə suçlayıb: “Onların etdikləri separatçılıqdır. Onların qərarları ortadakı məlum “screen”lərin sübutudur. Özlərini ifşa etdilər. Həmin 7 nəfər mütləq cəzalandırılmalıdır. Qurban Məmmədovun hərəkat üçün xidməti o oldu ki, bizi qərargahsız qoydu. Müzakirə ediləsi şəxslər onun dirijorluğu ilə hərəkət edənlərdir”.

İdarə heyəti üzvlərindən Ramiz Tağıyev hərəkatın dağılmadığını bildirib: “Xəyanətkar insanlar hər zaman olublar. Oğru elə bağırır ki, doğrunun bağrı yarılır. Qurban Məmmədov oradan dəfələrlə təhdidli ifadələr işlədib. Ona cavab vermək haqqımdır. Xalq bilməlidir ki, kimlərin arxasınca gedir. Ruhdan düşmək lazım deyil. Onlarla bir masa ətrafında oturmaq fikrində deyiləm. Bura gələcəklər, yenə də çaxnaşma yaradacaqlar”.

S.Kərimov əks tərəfin iclasını qeyri-qanuni adlandırıb: “Üç iclasdır görün nələri müzakirə edirik. Onlar bizi təxribata çəkmək istəyirlər”.

V.İbadov hərəkatdan uzaqlaşdırılmasının səbəblərini anlamadığını qeyd edib: “Onlar özlərini buradan uzaqlaşdırdılar. Missiyalarını başa çatdıra bilmədilər”.

İ.Həmidov əks tərəfi gələn həftənin ilk günü keçiriləcək iclasa dəvət edib: “O iclasa gəlməsələr, özləri bilərlər. Qərar qəbul ediblər ki, aprelin 20-də Qarabağ Forumu keçirilməyəcək. Mən deyirəm ki keçiriləcək və hər kəsi foruma dəvət edirəm”.

Toplantının aparıcısı Həsən Həsənov kimlərisə çıxartmaq fikrindən uzaq olduqlarını söyləyib: “Haqqın yoluna qayıtmasalar, səsə qoyulub kimlərsə çıxarıla da, töhmət də ala bilər. Gələn həftə ki iclasda şəxsən mən Qurban Məmmədovun hərəkatdan uzaqlaşdırılması təklifini verəcəm. Qalan 7 nəfəri isə iclaslara dəvət edirəm. Xalq tərəfindən qazandığınız hörməti hansısa vədlərə görə itirməyin. Birinci gün qərarlar qəbul olunacaq”.

Sonda səsvermə yolu ilə hərəkatdan çıxarılanlar və töhmət alanlar barədə qərar qeyri-legitim sayılıb.

GÜNDƏM  / XuralTAC

AXH-nin fövqəladə toplantısında qərar: iki üzv uzaqlaşdırıldı, İsgəndər Həmidova xəbərdarlıq edildi

Xural Yazıldığı tarix 19 Aprel 2019

Bu gün Azərbaycan Xalq Hərəkatının idarə heyətinin fövqəladə toplantısı keçirilib.

Toplantıda 21 idarə heyəti üzvündən 8 nəfər iştirak edir. İclası hərəkatın dönəm sədri, AĞ Partiya başqanı Tural Abbaslı aparır. Dönəm sədri ilk olaraq toplantı barədə məlumat verib: “Toplantı 10 nəfər idarə heyətinin üzvünün qərarı ilə keçirilir. Bütün idarə heyəti üzvlərinə məlumat verilib. Son zamanlar hərəkat daxilində ciddi problemlər yaşanır. Bu səbəbdən belə bir qərar aldıq ki, problemlər həll yolunu tapsın”.

Daha sonra Mətləb Mütəllimli çıxış edib: “Bu iclas yetərli sayılır. Yanvardan etibarən hərəkatın əsasnaməsi pozulur. 4 nəfər qanunsuz olaraq idarə heyətinə üzv qəbul olunub”.

“Azadlıq” partiyasının sədri Əhməd Oruc bu iclasda önəmli qərarların qəbuluna böyük ehtiyacın olduğunu söyləyib.

Əhməd Oruc deyib: “Bizdən rayonlarda hərəkatın yaradılan şöbələrinin üzvlərinin adları, protokollar gizlədilir. Biz sonradan rayonlarda ümumiyyətlə, şöbələrin yaradılmadığı barədə məlumat aldıq. Uşaq nağılları ilə son 3 ayda baş aldadılır. Hər kəsin üzərinə şübhə atılır. Son olaraq da saxta vatsap yazıları ortaya çıxarıldı. Guya kimsə bu yazıları Isgəndər Həmidova ötürüb. İdarə heyəti üzvlərinin bəziləri Isgəndər bəydən maddi cəhətdən asılıdırlar. Məhz bu iclasda həmin insanlar iştirak etmirlər. AXH daxilində hakimiyyətin adamları var. O şəxslər aprelin 1-dən etibarən hərəkatı dağıtmaq istəyirlər. Nemət Pənahlının hərəkatdan çıxarılması həmin şəxslərin əli ilə baş tutdu. Kimlərsə məqsədli şəkildə hərəkatı iki hissəyə parçalamaq istəyirlər. Hər kəsin maskası açılacaq. Kimsəyə güzəşt edilməyəcək”.

BAP sədri Elşad Musayev hərəkatın ilk günlərdə problemlərlə yaradıldığını söyləyib: “Təzyiq altında yaradılan hərəkatda problemlər olmalı idi. Biz məcburiyyət qarşısında belə toplantı keçirməyə məcbur olduq. İndiyə qədər bir neçə dəfə gərginlik yaşandı və bunlar hərəkata ciddi zərbə oldu. Hərəkat daxilində əks qrup ancaq görüntü naminə nəkrədə etməyə çalışırlar. AXH daxilindəki iki qrup tərəfdən keçirilən görüşlərin hamısında iştirak etmişəm. Bu görüşlər heç nəyi həll etmədi. Biz İsgəndər Həmidovla son olaraq aprelin 17 də görüşdük. Oradakı danışıqlarda gördük ki, heç nə həllini tapmır. Bu halda heç nəyi düzəltmək mümkün deyil. Bəzi hallarda kritik qərarlar vermək lazım gəlir. Hərəkatı düşünənlərin bir arada olması vacibdir. Bura toplanan şəxslər daha intellektual, prosesləri önə apara biləcək şəxslərdir. Kimsə prosesə qoşulmaq istəsə qapı açıqdır. Buradakı insanlar dünyagörmüş insanlardır. Bu təşkilat yenidən qurulmalıdır”.

T.Abbaslı bu iclasda bir sıra şəxslərin idarə heyəti üzvlüyündən uzaqlaşdırılacağının anonslarını verib.

İslam Demokrat Partiyasının sədri Tahir Abbaslı çıxışında bu məsələlərə toxunub: “AXH hərəkatı çox böyük problemləri həll etməyi qarşısına məqsəd qoyub. Hərəkat yaradılanda atılan addımlar uğurlu idi. Amma sonradan bəziləri bunun davamını istəmədi. Isgəndər bəyin ətrafında olanlar yerlipərəstliklərini ortaya qoyublar. Bu şəkildə davam etmək mümkün deyildi. Mən buradakı insanların əhatəsində olmaqdan qürur duyuram. Vaxt gələcək, o insanlar etdiklərinə görə peşman olacaqlar”.

Sabiq müdafiə naziri Rəhim Qazıyev ötən iclasda istefa verdiyini, ancaq istefasının qəbul olunmamasından danışıb: “Bu gün bu iclasda iştirak etməyi özümə borc bildim. Şəxsi maraqlar arxa planda olmalıdır. Ümummilli maraqlardan iştirak etmək çox vacibdir. Yerlibazlıqdan uzaq durmaq lazımdır. Hərəkatdakı qanunsuzluqlar aradan qaldırılmalıdır. Aprelin 15-dəki iclasda qərara alındı ki, barışıq əldə olunsun. Amma onun səhərisi gün Isgəndər Həmidovun yanındakı adam mətbuata çıxıb şər-böhtanlarını davam etdirdi”.

VİP sədri Əli Əliyev: “Dostlarım müxtəlif aspektlərdən məsələyə qiymət verirlər. Bu iclas tam legitim olduğu üçün qanunidir. Bu səbəbdən hərəkatın qəbul edəcəyi qərar hər kəs tərəfindən qəbul olunmalıdır. AXH daxilində ciddi problemlər yaşanır. Buradakı dostlar problemləri aradan qaldırmaq üçün hər şeyi etdilər. Amma kiçik bir qrup problemlər yaratmaqda davam etdilər. Bu hərəkat kimsəni şəxsi hərəkatı deyil. Mənim bir sıra müşahidələrim var. Görünən odur ki, hərəkata kənar təsirlər daha çoxdur, həm hakimiyyət, həm iqtidar tərəfindən. Kimlərinsə sərsəm qərarlarına tabe olmamalıyıq. Hərəkat iqtidar müstəvisində fəaliyyətini davam etdirməlidir. Yanvarın 26-da əsasnamə pozulanda bizlər susdu. Isgəndər Həmidov 4 nəfəri hərəkatın idarə heyətinə qanunsuz üzv edəndə səsimizi çıxarmalı idik. Həmin 4 nəfər iclaslarda iştirak edir, qanunsuz qərarların qəbulunda səs verirlər. Bu şəxslər uzaqlaşdırılmalıdır. 1 aprel iclasında dönəm sədri Tural Abbaslıya qarşı avantüra təşkil olundu. Isgəndər Həmidov o iclasda hətta sədrə qarşı belə qıcandı. Buna hüquqi qiymət verilmədi. Ramiz Tağıyev də eyni davranış nümayiş etdirdi. 15 aprel iclasından sonra Ağasif Şakiroğlu mətbuata çıxıb hər birimizə hörmətsizlini nümayiş etdirdi, ittihamlar yağdırdı. Həmin şəxs də idarə heyətindən uzaqlaşdırılmalıdır. Şəxsi maraqlarını həyata keçirmək üçün bəzi üzvlər təşəbbüslər göstərirlər. Bunların qarşısı alınmalıdır. Bəzi idarə heyəti üzvləri gözləmə mövqeyindədirlər və gələn iclaslarda onlar da bizə qoşulacaqlar. Biz rayon şöbələri yaradıb, tezliklə hərəkatın Məclisini keçirməliyik. AXH prinsipal qərarlar qəbul etməlidur. Bu parçalanma deyil. Kimsə kiminsə əlaltısıdırsa, bura gəlməyinin mənası yoxdur”.

Mətləb Mütəllimli indiyə qədər fəaliyyətlərinə düzgün qiymət vermədiklərini qeyd edib:” Bu probleminin yaranmasında bizlər də günahkarıq. Qanunsuzluqlara göz yummamalı idik. İdarə heyətinin üzvləri təhqir olunanda susqunluq nümayiş etdirməməli idik. Kimlərinsə yazışmaları bizi maraqlandırmır. Qarşımıza ciddi hədəflər qoymuşuq. Növbəti proseslərdə belə hadisələrin yaşanmasına yol verməməliyik. Digər üzvlərimizi proseslərə cəlb etməliyik. Təşkilatlanmağa davam etməliyik. İşimizə mane olanlar buradan uzaqlaşdırılmalıdır”.

İclasa idarə heyəti üzvlərindən Londonda yaşayan Qurban Məmmədov da qatılıb: “Xalqımız bilməlidir ki, qarşımızda ciddi hədəflər var. Hərəkatdakı problemlər də biz də böyük məsuliyyət daşıyırıq. Şişirtmə ilə hara qədər getmək olardı? Siyahı ilə idarə heyəti formalaşdırılmaz. Siyasət çox ciddi sahədir.Heç bir güzəşt etmədən ciddiliyi əldən vermək olmaz. Ötən iclasda Əli Əliyevə hörmətsizlik ediləndə idarə heyəti üzvlərinin susması məni dəhşətə gətirdi. Bu iclası bütün səfirliklər izləyir. Çünki bir proseslərin başlandığını bilirlər. Hərakat ətrafında tərbiyəsiz oyun oynayanlara cavab verilməlidir. Heç kəsin indiki məqamda xalqı ruhdan salmağa haqqı yoxdur. Kimsə fəaliyyətinin xalqa ləkə olduğunu anlamırsa, elələrindın uzaq durmaq lazımdır. Valeh İbadov və Ağasif Şakiroğlu bu iclasda idarə heyətindən çıxarılmalıdır. Gəlin əl-ələ verək, namusla fəaliyyət göstərək. Istənilən qərar veriləndə xalq nəzərə alınmalıdır. Kim özünü biədəb aparır, xalq görür. Sizlərə uğurlar arzulayıram”.

T.Abbaslı AXH adından sui istifadə hallarına yol verildiyini bildirib:” Kimisə hərəkatın lideri kimi qələmə verirlər. Hamı bilsin, dönəm sədrliyi var, əlifba siyahısı ilə üzvlər rəhbərlik edirlər”.

M.Mütəllimli toplantının qərarlarını açıqlayıb. Valeh İbadov və Ağasif Şakiroğlu idarə heyətindən uzaqlaşdırılıb. Ramiz Tağıyevə xəbərdrlıq edilib. Süleyman Kərimov, Salman İmanlı, Yavər Mikayılov və Firudin Əhmədlinin hərəkatın idarə heyətinin üzvü olmadığı elan olunub.

Toplantıda hərəkatın Məclisinin aprelin 27-də keçiriləcək iclası və 20 aprelə planlaşdırılan Qarabağ Forumu təxirə salınıb.
İsgəndər Həmidova xəbərdarlıq edilməsi barədə ayrıca səsə qoyulub. M.Mütəllimli buna etiraz etdi. Ə.Oruc nöqsanlarına görə İ.Həmidova xəbərdarlıq edilməsini təkidlə tələb edib. Səs çoxluğu ilə sabiq daxili işlər nazirinə xəbərdarlıq edilib.

Cavanşir Abbaslı,

Musavat.com

GÜNDƏM  / XuralTAC

Direktor Sevinc Abbasova barəsində ev dustaqlığı qətimkan tədbiri seçildi

Xural Yazıldığı tarix 18 Aprel 2019

Jurnalistlər direktorun məhkəməyə necə gətirildiyini görməyiblər

Bakı şəhəri Səbail rayonu 162 nömrəli tam orta məktəbin direktoru Sevinc Abbasova barəsində ev dustaqlığı qətimkan tədbiri seçilib.

Məlumatı Respublika Prokurorluğunun mətbuat xidməti yayıb.

Bildirilir ki, sözügedən məktəbin 8-ci (r) sinif şagirdi, 2004-cü il təvəllüdlü Elina Hacıyevanın təhsil aldığı məktəbin üçüncü mərtəbəsindən özünü ataraq intihar etməsi faktı ilə bağlı Cinayət Məcəlləsinin 125-ci (özünü öldürmə həddinə çatdırma) maddəsi ilə başlanmış cinayət işi üzrə istintaq davam etdirilir.

Aparılmış istintaqla həmin məktəbin direktoru işləmiş Sevinc Abbasovanın xidməti vəzifələrini lazımı qaydada yerinə yetirməyib, vaxtaşırı olaraq özünə qapanan Elina Hacıyevanın ruhi-emosional vəziyyətinə xüsusi həssaslıqla yanaşmamaqla, ona psixoloji-mənəvi dəstək göstərilməsinə laqeyd münasibətinin ehtiyatsızlıqdan onun ölümünə səbəb olmasına, habelə hadisə baş verdikdən dərhal sonra təcili-tibbi yardım çağırılmasını vaxtında təmin etməyərək E.Hacıyevanı təhlükədə qoymasına dair əsaslı şübhələr müəyyən edilib.

Beləliklə, direktor aprelin 15-də Cinayət Məcəlləsinin 143-cü (təhlükədə qoyma) və 314.2-ci (səhlənkarlıq, ehtiyatsızlıqdan zərərçəkmiş şəxsin ölümünə səbəb olduqda) maddələri ilə təqsirləndirilən şəxs qismində cəlb olunub.

Bakı şəhəri Səbail rayon məhkəməsinin 16 aprel 2019-cu il tarixli qərarı ilə S.Abbasova barəsində ev dustaqlığı qətimkan tədbiri seçilib.

Günorta saatlarıdan Səbail Rayon Məhkəmməsinin önündə olan jurnalistlərin Meydan TV-yə verdiyi məlumata görəsə, direktor məhkəməyə gətirilməyib. Onlar məhkəmənin heç bir qapısından Sevinc Abbasovanın içəri keçirildiyini görməyiblər.

“Yalnız polislər qapı ağzına yığışıb, sonra da dağılışdı. Sevinc Abbasova məhkəməyə gətirilmədi,” – deyə jurnalistlər bildirib.

Meydan tv

GÜNDƏM  / XuralTAC

Fuad Qəhramanlının qızını döyüblər-VİDEO

Xural Yazıldığı tarix 18 Aprel 2019

Bu gün Elmlər Akademiyası metrosunun yaxınlığında AXCP sədrinin müavini Fuad Qəhramanlının qızına hücum edilib.

Sozcu.az xəbər verir ki. bu barədə Fuad Qәhrәmanlının hәyat yoldaşı, yazar Zümrüd Yağmur məlumat verərərək, bunları deyib:

“Xatırlayırsınızsa, bir neçə gün əvvəl 14 yaşlı qızım Elina Hacıyevanın anım gününü təşkil etmişdi. Həftənin ikinci günü məktəbə gedərkən təqib edilib və məktəbdən çıxarkən də eyni adam tərəfindən arxadan təqib edilərkən, maşınla da qabağı kəsilib. Bu gün isə Elmlər metro stansiyası yaxınlığında bu şəxs tərəfindən önü kəsilib, təhqir olunub və döyülüb (başına və burnuna zərbə alıb). Buyurun baxın idarə etdiyiniz ölkəyə. Sizin trollarınız artıq insanlara küçədə saldırır. Dünənə qədər virtual olan trollarınız indi küçələrə tökülüb. Bu şəxs Elinanın adını çəkərək feministləri təhqir edib, Sənaydan Mehriban Əliyevadan üzr istəməyi tələb edib.

Qeyd edim ki, bu videonun yarısıdır. Qızım yarım saata yaxın küçədə təhqir və təyziqə məruz qalıb”.

GÜNDƏM  / XuralTAC

SMMM son həbslər və işgəncələrlə bağlı bəyanat yaydı-MƏTN

Xural Yazıldığı tarix 17 Aprel 2019

Son vaxtlar hakimiyyətin repressiv siyasətinin davamı olaraq ictimai-siyasi fəalların şərlənib həbs olunması, təqib və təzyiqlərə, işgəncələrə məruz qalması halları genişlənməkdədir.

Bir tərəfdən “məhkəmə-hüquq sistemində dərinləşmə islahatları”nın aparılmasından bəhs edilir, digər tərəfdən isə əməli olaraq əks hərəkətlər təkrarlanır. 10 iyul 2018-ci il Gəncə hadisələri və Tərtərdə hərbçilərlə bağlı açılmış cinayət işlərində yol verilmiş qanunsuzluq və işgəncə halları, ictimai fəallara qarşı aparılan repressiyalar ictimaiyyətin haqlı narazılığına səbəb olur.

Son 1 ay ərzində onlarla ictimai fəal – “heykəl məhbusu” Bayram Məmmədov, Tofiq Məmmədov, Qaraçuxur sakini Ruslan Cumayev, Aqil Hümbətov, AXCP üzvləri – Nicat Abdullazadə, Nicat Nizamov, Yalçın Abdullayev, Paşa Umudov, Saqif Qurbanov və digərləri inzibati qaydada qanunsuz həbslərə məruz qalmış, ictimai fəallar – Qiyas İbrahimov, Gülnarə Rahimova, Fatimə Mövlamlı, jurnalist Sevinc Sadıqova dəfələrlə əsassız olaraq saxlanılaraq polis bölmələrinə aparılıblar. Həmin şəxslərin əksəriyyəti polis bölmələrində və saxlanma yerlərində zorakalığa, insan ləyaqətini alçaldan münasibətə məruz qalıblar.
SMMM-in üzvlərinin 10 iyul 2018-ci il Gəncədə baş vermiş məlum hadisələrlə bağlı Sabunçu rayon məhkəməsində iştirakı və digər apardıqları araşdırmalar zamanı məlum olmuşdur ki, hadisələr zamanı həbs olunmuş şəxslər birmənalı şəkildə ən ağır işgəncələrə və qeyri-insani münasibətə məruz qalıblar. Eyni zamanda onların əməllərinə adekvat olmayan, Azərbaycan Respublikası qanunvericiliyinə zidd olacaq ittihamlar verilmiş və prosessual hərəkətlər düzgün icra edilməmişdir. Belə ki, cinayət hadisəsinin iştirakçısı (təşkilatçı, təhrikçi, əlbir və s.) olmadıqları halda onların barəsində eyni maddələrlə ittihamlar verilmiş, müstəqil vəkil müdafiəsindən məhrum olunmuş, ailə üzvləri və yaxınları ilə əlaqələri uzun müddət tamamilə kəsilmişdir. Təəssüflə qeyd olunmalıdır ki, ibtidai istintaq dövründə yol verilən pozuntular hazırda “Gəncə işi” ilə bağlı keçirilən məhkəmədə də təkrarlanır. Hakimlər və dövlət ittihamçıları nəyin bahasına olursa olsun ittiham aktını təsdiq etməyə çalışırlar. Bu isə təqsirləndirilən şəxslərin, onların vəkillərinin və valideynlərinin haqlı narazılığına səbəb olur.

Məhkəmə prosesinin ən vacib və dəhşətli səhnələrindən biri təqsirləndirilən şəxslərin həbs olunan zaman Gəncə polisində və Bakıda “bandotdel”-də məruz qaldıqları ağır işgəncə hallarını bildirərkən hakimlərin və dövlət ittihamçılarının verdiyi reaksiyadır. Belə ki, təqsirləndirilən şəxslər onlara verilən ağır işgəncələrdən danışarkən hakimlər onların danışığını dayandırmağa, başqa səmtə yönəltməyə, özlərini heç nə eşitmirmiş kimi aparmağa və işgəncə hallarını ört-basdır etməyə çalışırlar. Hətta işgəncəyə məruz qalan Rauf Bayramov adlı təqsirləndirilən şəxs 9 ay ötməsinə baxmayaraq bədənində işgəncənin izlərini göstərmək istəyəndə hakim buna imkan verməyərək hadisənin üzərində sükutla keçib. Demək olar ki, bütün təqsirləndirilən şəxslər öz ifadələrində ağır və dəhşətli işgəncələrə, qeyri- insani münasibətlərə məruz qaldıqlarını bildiriblər. Amma çox dəhşətli və acınacaqlı haldır ki, bu faktları hakimlər və ittihamçılar görməməzlikdən gəlirlər.

Çox maraqlıdır ki, ittiham tərəfi məhkəməyə təqsirləndirilən şəxslərdən istintaq zamanı işgəncə ilə alınmış etirafedici ifadələrdən və yalançı şahid ifadələrindən başqa hər hansı dəlil, sübut təqdim etmir. Dəfələrlə vəsatət verilsə də şəhər kamerasının görüntüləri məhkəmədə nümayiş olunmur.

Təəssüflə qeyd olunmalıdır ki, 2017-ci ildə Tərtərdə bir qrup hərbçinin müəmmalı qətli və kütləvi həbsi ilə nəticələnən hadisələrlə bağlı keçirilən məhkəmə prosesi də çoxsaylı qanun pozuntuları ilə müşayiət olunur. Qapalı keçirilən həmin məhkəmə proseslərində də işgəncə nəticəsində alınmış ifadələr əsas götürülür, ittiham tərəfindən məhkəməyə ciddi dəlil və sübutlar təqdim olunmur. Hərbçilərin məruz qaldığı dəhşətli və amansız işgəncələrin araşdırılması istiqamətində heç bir addım atılmır və s.

Siyasi Məhbusları Müdafiə Mərkəzi hesab edir ki, respublika baş prokurorluğu başda olmaqla aidiyyatı qurumlar insanların qanunsuz həbs olunması, qətlə yetirilməsi, təzyiq və təqiblərə, ağır işgəncələrə məruz qalması hallarına ciddi reaksiya verməli, müvafiq addımlar atmalıdır. SMMM yol verilmiş qanunsuzluqların aradan qaldırılmasını, mühakimələrin və məhkəmələrin ədalətli aparılmasını, həbsdə olan bütün siyasi məhbusların qeyd-şərtsiz azadlığa buraxılmasını tələb edir.

17 aprel 2019- cu il, Bakı şəhəri

GÜNDƏM  / XuralTAC

Pənah Hüseyn DTK-ya çağrıldı

Xural Yazıldığı tarix 17 Aprel 2019

Azərbaycan Xalq Partiyasından verilən xəbərə görə, bu gün partiyanın sədri Pənah Hüseyn DTX-ya dəvət olunub. Ondan “ölkənin cənubunda və şimalında təxribatlar hazırlanır” açıqlamasına dair izahat alınıb.
Xural.com xatırladır ki, Pənah Hüseyn bir neçə gün bundan öncə Müsavat TV-də canlı efirdə “Aprel-may aylarında Azərbaycanın cənubunda və şimalında ciddi təxribatlar hazırlanır” məzmununda fikirlər səsləndirmişdi. AXP sədrinin bu fikirləri sosial şəbəkələrdə müzakirə mövzusuna çevrilmişdi.

Xural.com

GÜNDƏM  / XuralTAC

Qarabağ Komitəsi növbəti toplantı keçirdi

Xural Yazıldığı tarix 17 Aprel 2019

Qarabağ Komitəsinin növbəti toplantısı keçirilib.

Toplantıda vətəndaş cəmiyyətinin nümayəndələri, icrimai-siyasi xadimlər və təəssübkeşlər iştirak ediblər. Toplantıda ölkədəki ictimai və siyasi durum müzakirə olunub.

GÜNDƏM  / XuralTAC

“Mən Azərbaycan Xalq Hərəkatının üzvü deyiləm”

Xural Yazıldığı tarix 17 Aprel 2019

Musavat.com-un Facebook və Youtube.com üzərindən gerçəkləşdirdiyi canlı yayın verilişində bu gün Azərbaycan Xalq Hərəkatı İdarə Heyətinin üzvü, Gələcək Azərbaycan Partiyasının (GAP) sədri Ağasif Şakiroğlu qonaq olub.

A.Şakiroğlu oxucu suallarına cavabda bildirib ki, AXH sıraları müxalifət liderləri ilə zəngindir. O, bu sırada Azərbaycan Xalq Partiyasının (AXP) sədri Pənah Hüseynin də adını çəkib və onun AXH üzvləri sırasında olduğunu bildirib.

Bu məlumatı dəqiqləşdirmək üçün musavat.com-un əməkdaşı P.Hüseynlə əlaqə saxlayıb. P.Hüseyn bildirib ki, ötən ilin 25 dekabrında siyasi partiyaların, ictimai-siyasi təşkilat nümayəndələrinin dəyirmi masasında iştirak edib: “Azərbaycan Xalq Hərəkatının yaradılması təşəbbüsü yanvarda irəli sürülüb. Mənim nə Xalq Hərəkatının yaradılmasında, nə də yaradılma təşəbbüsündə iştirakım olub. Üstəlik, təsisçisi və üzvü də deyiləm. Orda bizim dostlarımız da var, dostlarımız olmayanlar da…”

GÜNDƏM  / XuralTAC

Fuad Abbasov ittihamlara cavab verdi

Xural Yazıldığı tarix 17 Aprel 2019

İnformasiya Təşəbbüsləri Mərkəzinin rəhbəri, jurnalist Fuad Abbasov Axar.az-a müsahibəsində “deportasiyası”, “həbsi”, guya mənzilində aşkar edilmiş “milyon rubllar”, bəzi azərbaycanlıların ermənilərlə əlbir olması barədə özünün qənaətləri və bir çox başqa məsələlər barədə danışıb.

Xural.com həmin müsahibəni təqdim edir:

– Sizin Rusiyadan deportasiyanız, Moskvadakı mənzilinizdə axtarış aparılması, həbsiniz və ən maraqlısı isə evinizdən 15 milyon rubldan çox vəsait aşkar edilməsi ilə bağlı məlumatlar son günlərdə sosial şəbəkələrdə əsas müzakirə mövzularından birinə çevrilib…

– Hazırda deportasiya və həbs barədə mənə heç bir şey məlum deyil, mənə bu barədə heç kim heç nə deməyib. Evimdə axtarış aparılmasına gəldikdə isə bu, açıq-aşkar yalandır. Bu mənada mənzilimdə külli miqdarda vəsait aşkar edilməsi ilə bağlı informasiyalar da eyni zamanda yalan və böhtandır.

Deportasiyamla bağlı ilk informasiyanı Zabil Məhərrəmov adlı kimsə sosial şəbəkə hesabında paylaşıb. Azərbaycan saytları bu xəbəri kütləvi şəkildə tirajlamağa başladı. Ən dəhşətlisi isə odur ki, saytlar buna həmçinin mənim həbsim, mənzilimdə axtarış aparılması və hansısa 15 milyonun tapılması ilə bağlı məlumatları əlavə etdilər.

Separatçılar, bizim düşmənlərimiz Azərbaycan və azərbaycanlıların əleyhinə çalışanda bunu anlayıram, məntiqlidir. Bu məlumatı belə şövqlə yayan diaspordan olan həmvətənlərimiz və Azərbaycan saytlarına isə bunun nə üçün lazım olması anlaşılmazdır… Bu saytların adlarını çəkməyəcəm, ancaq böhtana görə onlar məhkəmə qarşısında cavab verməli olacaqlar.

Qeyd etdiyim kimi ermənilərin mənim əksimə hərəkət etməsi təəccüblü deyil. Çünki mən onların Azərbaycan və Azərbaycan dövlətçiliyi əleyhinə istənilən fəaliyyətlərinə qarşı dururam. Məsələn onlar Moskvada qondarma “dqr” himninin təqdimat mərasimini keçirmək istəyirlər. Mən təqdimatın keçiriləcəyi yerdə peyda oluram və onların planlarını həyata keçirmələrinə mane oluram. Təbii ki, istisnasız olaraq onların hər biri mənə nifrət edir. Məni Rusiyadan çıxarmaq onların arzusudur. Ancaq məni bağışlayın, mən eynilə düşmənlərimiz kimi məni və mənim fəaliyyətimi Rusiyada görmək istəməyən bizim diaspor təşkilatlarımızı anlaya bilmirəm. Bu, sadəcə “AzərRos” (Rusiya Azərbaycanlıları Federal Milli-Mədəni Muxtariyyəti) və “AzərMos” kimi təşkilatların ermənilərlə birlikdə vahid orqanizm kimi hərəkət etməsindən xəbər verir.

Hətta onlar Rusiyanın müvafiq strukturlarına təsir göstərə bilsələr və mən həqiqətən deportasiya edilsəm belə, bu mənim fəaliyyətimin sonu anlamına gəlməyəcək. Etiraz, apellyasiya olacaq. Mən antiazərbaycan qüvvələrinə qarşı mübarizəmi davam etdirəcəm.

– Sual yaranır: mənzilinizdə 15 milyon rubl tapılması barədə şayiələr nəyə əsaslanır? Bizə öz gəlirləriniz barədə danışın.

– Bir çox insanlarda belə təəssürat yaranır ki, mən öz ictimai-siyasi fəaliyyətinlə milyonlar qazanıram. Bu pulları Rusiyadakı Azərbaycan diasporuna qarşı hansısa fəaliyyətlərə sərf etməyi planlaşdırdığımı düşünən insanlar da tapılır. Bu insanlar mənə külli miqdarda vəsait verən sponsorlarımın olduğunu düşünürlər. Reallıqda isə mən sadəcə “kraudfandinq” sistemi yaratmışam. Yəni mən çalışıram, məni dəstəkləyən insanlar isə mənim hesabıma pul köçürürlər. Ancaq heç bir milyonlardan söhbət belə gedə bilməz. Hansı milyonlar?!

Bir qədər əvvəl, dəqiqliklə desək, martın 12-də Azərbaycan Milli Mədəni Muxtariyyətinin Moskva regional bölməsinin sədri Ağadadaş Kərimov təşkilatın toplantılarının birində mənim 6 milyonum olması barədə fikirlər səsləndirib. Qeyd edim ki, bu dəyirmi masada həmçinin erməni millətindən olan şəxslər də iştirak edirdi. Dəyirmi masanın mərkəzi mövzusu mənim fəaliyyətim olub. Onlar məndən yaxa qurtarmağın yollarını axtarırdılar.

Üstündən bir ay keçdikdən sonra artıq yeni informasiya peyda olur. Bu dəfə artıq mənim 6 yox, 15 milyon rublum olduğu bildirilir. Üstəlik bunun 9 milyonu bir aya peyda olub (gülür – müəllif). Bu, absurddur.

Məni həm mənəvi, həm də maddi mənada dəstəkləyən hər kəsə minnətdaram. Mən həmişə demişəm ki, məni maddi mənada dəstəkləməklə bağlı heç bir öhdəlik yoxdur. Bütün bunlar yalnız könüllü əsaslarla edilir. Bu məbləğ milyonçu ola biləcəyiniz məbləğ deyil. İsrail dövləti xalq maliyyələşməsi sayəsində yaradılıb. Ermənistan hazırda bunun sayəsində mövcuddur. Burada kriminal heç bir şey yoxdur.

– Sizin təşəbbüsünüzlə Rusiya azərbaycanlılarının növbədənkənar qurultayı keçirilməlidir. Buraya Moskvanın və Rusiyanın Azərbaycan ictimaiyyəti dəvət olunub, Azərbaycan diasporuna yeni rəhbər seçilməsi planlaşdırılır. Hər şey plana uyğun şəkildə davam edir? Sizi deportasiya ediblərsə, qurultay baş tutacaqmı?

– Qurultay istənilən halda baş tutacaq. Mən bu tədbirdə iştirak etmək yolu taparam. Yenidən xalq maliyyələşməsi mövzuna qayıdaraq – sözügedən qurultayın keçirilməsi və təşkilatçılığı mənim tərəfimdən ödənilir. Bu qurultayda Rusiya azərbaycanlıları bizim diasporumuzun layiqli təmsilçisini seçməlidilər. Bu, bütün Rusiya azərbaycanlıları və bizim dövlətçiliyimiz üçün vacib tədbirdir.

– Rusiyadakı Azərbaycan diasporu rəhbərliyinə namizədlər arasında sizin də adınızın olması barədə fikirlər səsləndirilir?

– Hətta mən bunu istəsəm belə, bunun üçün mənim qanuni haqqım yoxdur. Çünki mən Azərbaycan vətəndaşıyam, diaspora isə yalnız Rusiya Federasiyası vətəndaşı olan azərbaycanlı rəhbərlik edə bilər. Namizədlər arasında çox layiqli insanlar var. Onların adını çəkə bilmərəm. Çünki heç kimdə Fuad Abbasovun öz adamını reklam etməsi barədə təəssürat yaranmasını istəmirəm. Şəffaf səsvermə olacaq. Azərbaycan diasporuna bizim ölkəmizin layiqli bir nümayəndəsi rəhbərlik etsə, mən öz missiyamı yerinə yetirilmiş hesab edəcəm.

Mənə gəldikdə isə heç vaxt Azərbaycan diasporuna rəhbərlik etmək kimi bir ambisiyalarım olmayıb. Mənim vəzifəm onilliklər ərzində Rusiyada yaşamasına baxmayaraq, hələ də bizim bu ölkədə diasporumuz olduğunu bilməyən azərbaycanlıların gözlərini açmaqdan ibarətdir. Onlar həmvətənlərimizin problemləri ilə məşğul olmaq əvəzinə, əksinə ermənipərəst ideyalara inandırmağa çalışırlar.

GÜNDƏM  / XuralTAC

Eyyubovlar Xorvatiyada milyonluq biznes qurub–FOTO

Xural Yazıldığı tarix 7 Aprel 2019

“Baş nazirin 1-ci müavini Yaqub Eyyubovun qardaşı Yusif Abdulla oğlu Eyyubov 2001-ci ildən Xorvatiyada yaşayır, bu ölkədə biznes sahibidir, Azərbaycan Sahibkarlar Konfederasiyasının Balkanlardakı nümayəndəsidir“. Bunu müstəqil jurnalist Cavanşir Həsənov öz “facebook” hesabından paylaşdığı yazıda bildirib.

Xural.com xəbər verir ki, “AzPolitika.info”nun məlumatına görə, yazıda daha sonra bildirilir: “Yusif Eyyubov Xorvatiya paytaxtında “Montevideo doo” şirkətini təsis etdiyi vaxtdan yaşayır. Şirkət 27 fevral 2001-cu ildə Zaqreb Ticarət Məhkəməskndə (Trgovački sud u Zagrebu) qeydiyyatdan keçib və Zagreb, Rijeka küçəsi 10 ünvanında fəaliyyət göstərir.

Şirkətin qeydiyyat nömrəsi: 080389265-dir.

Şirkət daşınmaz əmlak, ticarət, inşaat, turizm, reklam və idman sahələrində fəaliyyət göstərir. Şirkət “Vita” fitnes mərkəzi, “La Vita” cafe-barı, massaj salonu və saunadan ibarət iri kompleksə də sahibdir.

Xorvat mənbələrində kompaniyanın ilkin kapitalı 19,908,400.00 xorvat kunesi və ya 3 milyon dollardan bir qədər artıq göstərllir. 2013-cü ildə gəliri təxminən 10 milyon xorvat kunesi və ya 1.5 milyon dollar olub”.

GÜNDƏM  / XuralTAC

Bayram Məmmədovun səhhəti ilə bağlı narahatlıq var

Xural Yazıldığı tarix 7 Aprel 2019

Gənc fəalın hər axşam qusduğu, baş ağrılarının olduğu bildirilir

Martın 17-də prezidentin əfv sərəncamı ilə azadlığa çıxan və 13 gün sonra təkrar həbs edilən Bayram Məmmədovun vəziyyətinin pis olduğu haqda məlumatlar var. Aldığı xəsarətlərdən sonra baş ağrılarının yarandığı, ürəkbulanması olduğu bildirilir.

Vəziyyətlə əlaqədar NİDA Vətəndaş Hərəkatı da bəyanat yayıb. Təşkilat Bayram Məmmədovun təcili xəstəxanaya köçürülməsini tələb edir:

“Nida Vətəndaş Hərəkatının üzvü Bayram Məmmədov İnzibati Həbs Olunanların Saxlanma Təcridxanasında (Binəqədi həbsxanası) fiziki təzyiqlərə, igəncələrə məruz qalandan sonra sağlamlığında ciddi problemlər yaranıb. Həmin təcridxanadan çıxan məhbusların verdiyi məlumata görə, Bayram Məmmədovun ağrıları şiddətlənməkdədir. O, başından çoxlu zərbələr alıb, baş gicəllənmələri var və hər axşam qusur. Bunlar isə beyin silkələnməsinin əlamətləridir”.

İctimai fəallar sosial şəbəkələrdə Bayram Məmmədovun durumu ilə bağlı narahatlıqlarını ifadə etsələr də, rəsmi qurumlardan hər hansı açıqlama yoxdur.

Gənc fəalın vəkil Elçin Sadıqov Meydan TV-yə deyib ki, ötən həftə görüşəndə Bayram Məmmədov ona baş ağrıları olduğunu söyləyib:

“Vəziyyəti yaxşı deyildi. Səhhətində yaranmış durumla əlaqədar müvafiq orqanlara məlumat vermişəm”.

Vəkil gələn həftə Bayram Məmmədovla görüşəcəyini bildirib.

Məhbusun atası Fərman Məmmədov oğluyla aprelin 4-də görüşdüyünü deyib. Onun sözlərinə görə, Bayram özü barədə heç vaxt ailəsinə söz demir, susur:

“Biz onunla şüşə arxasında danışdıq. Ona görə konkret heç nə deyə bilməyəcəm”.

Fərman Məmmədov oğluyla gələn həftə görüşəcəyini deyib.

Martın 17-də Əfv sərəncamı ilə azadlığa çıxan heykəl məhbusu” Bayram Məmmədov yenidən həbs olunarkən üzləşdiyi işgəncələrlə bağlı yazılı izahat verib.

Vəkilinə ünvanladığı yazılı izahatında gənc fəal yazır:

“Mənə verilən şifahi suallara cavab cavab olaraq bildirirəm ki, 30 mart 2019-cu il tarixdə barəmdə uydurma məhkəmə qərarı çıxdıqdan sonra Azərbaycan Respublikası Daxili İşlər Nazirliyinin inzibati həbs olunan şəxslərin saxlanılma məntəqəsinə gətirildim və bir neçə saat sonra heç bir qanuni əsas olmadan məni rezin kameraya apardılar. Əllərimi arxadan qandalladılar, sonradan adının Pənah olduğu bildiyim polis və digər 5-6 nəfər məni təpik və yumruq zərbələri ilə döyməyə başladılar. Sonra mən müvazinətimi itirib yerə yıxıldım, yerdə məni təpikləməyə və üzümə yumruq zərbələri ilə vurmağa başladılar. Bu, təxminən 30-40 dəqiqə çəkdi, arada fasilələr verib niyə peşman olmadığımı öz müsahibəmdə bildirdiyimi, niyə “Facebook” sosial şəbəkəsində onlara görə radikal və aqressiv tərkibli statuslar yazdığımı irad bildirirək döyürdülər. Daha sonra ayaqlarımı da əllərimə qandallayıb təxminən 2-3 saat ağzı üstə uzatdılar”.

Bayram Məmmədov ona verilən işgəncə hallarının araşdırılmasını xahiş edir.

Bayram Məmmədov İnzibati Xətalar Məcəlləsinin 535.1 maddəsilə – polisə müqavimətdə təqsirli bilinərək martın 30-da 30 sutka azadlıqdan məhrum edilib.

O, 2016-cı ildə mərhum prezident Heydər Əliyevin heykəlinə “Qul bayramınız mübarək!” şüarı yazıldıqdan sonra narkotik ittihamıyla həbs olunub 10 il cəza almışdı.

İlham Əliyevin martın 16-da verdiyi əfv sərəncamından 1 gün sonra azadlığa çıxıb.

GÜNDƏM  / XuralTAC

ReAL üzvü İlqar Məmmədova müraciət etdi: “Əli Kərimlini debata şəxsən özünüz dəvət edin!”

Xural Yazıldığı tarix 7 Aprel 2019

Respublikaçı Alternativ Partiyasının sədri Cənab İlqar Məmmədova müraciət:

“Hörmətli İlqar bəy!
İlk öncə nəzərinizə çatdırmaq istəyirəm ki, bu aralar mənim müxalifət partiyaları, müxalifət liderləri və müxalif düşüncəli insanlarla təşkilatlar haqqında heç bir mövzuda nə öz fikrimi, nə də iradlarımı bildirmək fikrim yox idi.

Başım daha vacib məsələlərə qarışdığı üçün, öz mübarizəmi birbaşa iqtidarda olan bütün məmurlarla yuxarıdan aşağıya doğru gedərək, öz bildiklərimi cəmiyyətlə paylaşıram.

Lakin son günlər müxalif partiyalar arasında yaranan “İlqar döyər, yoxsa Əli” kimi gülünc və xaricdən baxanda ölkənin müxalifət partiyaları haqqında komik imic yaratdığını gördükdən sonra məcbur qalıb birbaşa müraciətimi ilk öncə sizə ünvanlamağı özümə borc bildim.

Çünki rəsmi qeydiyyatdan keçmiş olduğum partiya ReAL partiyasıdır və siz İlqar Məmmədov mənim üzvü olduğum partiyanın sədrisiniz.

İlk öncə onu qeyd edim ki, öz səhifəmdə partiyalar haqda yazmağın tərəfdarı olmasam da, bu durum məni buna vadar etdi və düşünürəm ki, siz demokratiyanın tərəfdarı olduğunuz üçün mənim bu tələbimi dəyərləndirəcəksiniz.

İlqar bəy, biz sizi ANS-dəki o möhtəşəm çıxışınızdan sonra tanımışıq və içimizdə müxalifətə qırılan inamımızı bərpa edən yeganə şəxs sizsiniz.

Siz həbsdə olan zaman hamımız bir nəfər kimi İlqar Məmmədova dəstək etmək üçün küçələrə çıxıb, haqqı tələb edirdik.

Yazıqlar olsun ki, sizin həbsdən çıxmağınızı müxalifətin monopolist qüvvələri çalışırlar öz adlarına bunu xal olaraq yazsınlar ki, sizi özlərinə tabe etsinlər, amma sizə təşəkkür edirəm ki, bu imkanı onlara vermirsiniz.

ReAL-dan öncə başqa bir partiyanın üzvü olsam da, ReAL partiyasının demokratik qaydalara riayət etdiyini düşünüb bu partiyaya üzv oldum və düşünürəm ki, demokratik dəyərlərə dəyər verən bir partiya rəhbəri olaraq mənim kimi sıravi üzvün partiya sədrindən tələbini özünüzə həqarət kimi qəbul etməzsiniz.

İlqar bəy, sizdən xahiş edirəm, son günlərdə yaranan bütün narahatlığa, aşağılamalara, sayğısızlıqlara və gülünc atmosferə son qoymaq, sizin tərəfdarlarınızın sayını daha da çox artırmaq və mövcud olan monopolist qüvvələrin yaratdığı şouya son qoymaq üçün Əli Kərimlini debata şəxsən özünüz dəvət edin.

Sizə etimad edənlər də bilir ki, sizinlə debata çıxan oradan məyus qayıdacaq, amma hər halda artıq siz bunu etməlisiniz.

Bunu sizdən mən Rəşad Əlizadə, Respublikaçı Alternativ Partiyasının üzvü olaraq tələb edirəm.

Təşəkkür edirəm.”

Xural.com