Daha bir partiyada seçki mübahisələri –VİP iştirakla bağlı qərar verə bilmir

Fevralın 11-də Vətəndaş və İnkişaf  Partiyası (VİP) Məclisinin iclası keçirilib. İclasda VİP-in bu il aprelin 11-nə təyin edilmiş növbədənkənar prezident seçkilərində iştirak məsələsi müzakirə olunub.

Bu barədə VİP-in mətbuat xidmətindən məlumat verilib. Müzakirələrin əvvəlində VİP-in 2017-ci il mayın 28-də keçirilmiş IV Qurultayında partiyanın sədri Əli Əliyevin prezidentliyə namizədliyinin elan olunduğu bildirilərək, 11 aprel seçkilərində iştirak etmək və ya etməmək haqqında qərar vermək səlahiyyətinin Məclisə aid olduğu diqqətə çatdırılıb.

Çıxış edən Məclis üzvlərinin bir qismi Əli Əliyevin namizədliyinin artıq elan olunduğunu və cəmiyətə bununla bağlı qəti mesajlar verildiyini əsas götürərək, 11 aprel seçkilərinə qatılmağın zəruriliyini vurğulayıblar.

Bununla belə, Məclisin bir sıra üzvləri ölkədə normal siyasi fəaliyyət imkanlarının məhdudlaşdırıldığını, seçki mühitinin olmadığını və müxalifət düşərgəsinin mühüm hissəsinin 11 aprel seçkilərinə qatılmadığını önə çəkərək, boykot qərarının verilməsinə çağırıblar. İclasda seçkidə iştirak və boykot tərəfdarlarına öz mövqelərini daha dərindən əsaslandırmaq üçün əlavə çıxışlara şərait yaradılsa da, 11 aprel seçkilərinə münasibətdə konsensusun əldə edilməsi mümkün olmayıb.

Tərəflərin öz mövqelərində qəti dayandıqlarını və VİP sədri Əli Əliyevin hazırda ölkə xaricində olduğunu nəzərə alan Məclis üzvləri iclasın fevralın 18-də davam etdirilməsini məqbul sayıblar.(strateq.az)

Əlaqəli məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button