“Hər iki valideynini itirmiş uşağın məsələsi Ombudsmanın daim nəzarətindədir”
“Hər iki valideynini itirmiş uşağın məsələsi Ombudsmanın daim nəzarətindədir”. Bu haqda Xural.com-a Azərbaycan Respublikası İnsan Hüquqları üzrə Müvəkkili (Ombudsman)-nin mətbuat xidmətindən məlumat verilib. Məlumatda deyilir:
Ermənistan silahlı qüvvələrinin Gəncə şəhərinə raket hücumları nəticəsində hər iki valideynini itirmiş 3 yaşlı Şahnəzərli Xədicə Röyal qızı barəsində sosial şəbəkələrdə video görüntülər yayılmışdır.
Bildiririk ki, məsələ Azərbaycan Respublikası İnsan Hüquqları üzrə Müvəkkili (Ombudsman) Səbinə Əliyevanın diqqətindədir.
İlk gündən Müvəkkilin təşəbbüsü ilə zərərçəkmiş ailə və uşaqlarla ünvanlanan psixoloji konsultasiyalara Xədicə də cəlb olunub. Uşaqlara ünvanlanan fəaliyyət prosesində uşağın mərhum valideynlərinin yaxın qohumlarına qanunvericiliyə uyğun olaraq qəyyumluğa götürülmə proseduru da izah edilib, hüquqi məsləhətlər verilib.
Xədicə hazırda ana nənə və babasının himayəsində yaşayır və onun rəsmi qəyyumluğa götürülməsi ilə bağlı yaxın qohumları tərəfindən Qəyyumluq və Himayəçilik orqanına müraciət olunub. Xədicənin ata qohumları da onun qəyyumluğa götürülməsi üçün müraciət edib.
Hazırda hər iki ailənin Gəncə şəhər Kəpəz rayon İcra Hakimiyyətinin Qəyyumluq və Himayəçilik orqanına müraciəti əsasında aidiyyatı dövlət qurumlarına sorğular verilməklə müvafiq araşdırmalar aparılır. Araşdırma müddətində Xədicənin psixioloji durumu nəzərə alınaraq nənəsi Ağayeva Sevinc Bayram qızının himayəsində yaşaması Qəyyumluq və Himayəçilik orqanı tərəfindən məqsədəuyğun sayılıb.
Azərbaycan Respublikası Ailə Məcəlləsinin 136.1-ci maddəsinə əsasən Qəyyumluq və himayə valideynlərini itirmiş uşaqlara onların saxlanması, tərbiyə olunması, təhsil alması, habelə onların hüquq və vəzifələrinin qorunması məqsədilə müəyyən olunur. Həmin Məcəllənin 137.2-ci maddəsinə əsasən isə uşaqlara qəyyum (himayəçi) təyin edilərkən qəyyumun (himayəçinin) əxlaqı və başqa cəhətləri, onun qəyyumluq (himayə) vəzifəsini yerinə yetirə bilməsi, onun və ailəsinin uşaqla ünsiyyəti və münasibəti, habelə mümkünsə, uşağın öz arzusu nəzərə alınmalıdır.
Uşağın ən ümdə maraqlarının təmini baxımından onun saxlanması, tərbiyə olunması, təhsil alması, habelə hüquq və vəzifələrinin qorunması məqsədilə müraciət etmiş ən uyğun şəxs qəyyum təyin olunmalıdır.
Bu baxımdan Xədicənin valideynlərinin yaxın qohumlarına səbirli olmağı və Gəncə şəhər Kəpəz rayon İcra Hakimiyyətinin Qəyyumluq və Himayəçilik orqanının qəyyumluqla bağlı müvafiq qərarını gözləməyi, həmçinin bu müddət ərzində Xədicənin psixoloji sağlamlıq durumuna xələl gətirə biləcək münaqişəli hallardan uzaq durmalarını tövsiyə edirik.
