Kəmaləddin Heydərov BBC-ni və mətbuatı hədələdi!
Kəmaləddin Heydərov BBC-yə meydan oxudu
“Bu işi təşkil edənlər cavab verməlidir”
“Kimlərinsə yalan sözünə əsasən, qeyri-ciddi informasiyanı dünya ictimaiyyətinə ötürmək yaxşı hal deyil. Bu işi təşkil edənlər cavab verməlidirlər”. Bunu Azərbaycan Boks Federasiyasının (ABF) prezidenti Kəmaləddin Heydərov deyib.
ABF rəhbəri BBC kanalında AİBA və Azərbaycan əleyhinə böhtan xarakterli yayılan xəbərlərlə bağlı fikirlərini açıqlayarkən bu xəbərləri böhtan adlandırıb: “AİBA-nın və ABF-nin əlində hər bir fakt var ki, bunların söylədikləri böhtandan başqa bir şey deyil. Buna görə də boksçularımız dünya çempionatında daha yaxşı çalışıb sübut etməlidirlər ki, onların söylədiklərinin hamısı cəfəngiyyatdır.
AİBA son illər ərzində korrupsiyaya qarşı ciddi tədbirlər görüb, şəffaflığın təmin olunması üçün böyük islahatlar aparılıb. Kiminsə kənardan onun imicinə ləkə yaxmağa gücü çatmaz. Onlar buna nə qədər çalışsalar da, gücləri çatmaz”.
K.Heydərov AİBA və bu təşkilatın prezidenti haqqında yalnız xoş sözlər deyə biləcəyini vurğulayıb: “AİBA-nın Bakıda keçirilən son Konqresində bütün ölkələrin nümayəndələri, o cümlədən İngiltərə Boks Federasiyasının təmsilçisi Beynəlxalq Boks Federasiyası haqqında müsbət fikirlər söylədi. Təəssüf ki, yerli müxalifət mətbuatı da hər dəfə xaricdən gələn böhtan xarakterli kampaniyaya qoşulur. Onlar Azərbaycanın heç bir uğuruna sevinmirlər. Nə vaxt xarici mətbuatda neqativ material oldu, onlar da həmin yalanlara qoşulurlar. Bir neçə gün qəzet səhifələrini doldurmaq üçün bundan istifadə edirlər. Yalanları üzə çıxanda isə məsuliyyətsizcəsinə susurlar. Amma bu həmişə belə davam etməyəcək. Onlar bu haqda ciddi düşünməlidirlər. Məsələ Azərbaycanın imicindən gedirsə, iqtidar-müxalifət söhbəti olmamalıdır”.
“Xural” qəzeti,
il 9, sayı: 043 (451), 26 sentyabr 2011
