Karantin rejimi pozulub və DİN əməkdaşı xəsarət alıb
Aprelin 14-ü saat 12 radələrində Hacıqabul rayonunun polis bölməsinin yanında polis əməkdaşının avtomobili dayandırmaq barədə qanuni tələbinə məhəl qoymadan Tərtər rayon sakini Elşad Məmmədov “Mersedes” markalı avtomobili (10-OO-018 dövlət nömrə nişanlı) idarə edərkən polis məmuruna qəsdən xəsarət yetirərək, idarəetməni davam edib.
Bu barədə virtualaz.org-a Baş Prokurorluğun mətbuat xidmətinin rəhbəri Eldar Sultanov məlumat verib.
“Hadisə ilə əlaqədar Azərbaycan Cinayət Məcəlləsinin 139-1.1 və 315.2 maddələri ilə cinayət işi başlanıb.
Məhkəmə prosesi zamanı həmçinin məlum olub ki, avtomobildə olan sərnişinlər Natiq Hüseynzadə və Anar Fətəliyev xüsusi karantin rejiminin qaydalarını pozublar”, – Baş prokurorun nümayəndəsi bildirib.
Yuxarıdakı cinayətləri törətməkdə şübhəli bilinən Elşad Məmmədov, Natiq Hüseynzadə və Anar Fətəliyev saxlanılaraq istintaqa təhvil verilib.
Zəruri istintaq tədbirləri davam etdirilir.
