Leyla Yunusun evini dağıtdılar…
SÜLH VƏ DEMOKRATİYA İNSTİTUTUNUN OFİSİ ƏŞYALARI İLƏ BİRGƏ YERLƏ YEKSAN EDİLDİ
Sülh və Demokratiya İnstitutunun Şəmsi Bədəlbəyli küçəsi 38 ünvanında yerləşən ofisi avqustun 11-də axşam saatlarında içindəki avadanlıqlar çıxarılmadan söküldü.
Hadisə yerində olan Obyektiv TV əməkdaşlarının müşahidələrinə görə, polis və xeyli sayda mülki şəxsin nəzarəti altında söküntü bir neçə gənc fəhlə və ağır texnikanın köməkliyi ilə aparılıb. Habelə ofisdən yalnız bir-neçə stul və 2 ədəd Bakı istehsalı olan kondisioner salamat çıxarılaraq kənarda qoyulub. Amma ofisin mebeli, sənədlər, seyf, kompüterlərin hamısı içəridə saxlanılsa da ekskavatorla ofis yerlə-yeksan edilib.
Qeyd edək ki, söküntü işlərinə nəzarət edən Dövlət Əmlak Komitəsinin əməkdaşı Yusif Qəmbərov jurnalistlərə təzyiq edib. Konkret olaraq o, “Azadlıq” radiosu üçün çəkiliş aparan Turxan Qarışqanı (Kərimovu) itələyib və onu təhqir edib, habelə “Ayna-Zerkalo” qəzetləri və Reportyorların Azadlıq və Təhlükəsizlik İnstitutunun əməkdaşı İdrak Abbasova təhqir etməklə bərabər, ona fiziki zor da tətbiq edib. Nəticədə jurnalist sağ qolundan xəsarət alıb. Y.Qəmbərov İ.Abbasovun ərazidə foto çəkiliş aparmasına mane olub. Ondan RATİ-yə məxsus Nikon D-7000 markalı professional fotoaparatını almağa cəhd edib. Jurnalist hadisə ilə bağlı dərhal polisə rəsmi qaydada şikayət edib və məhkəmə tibbi ekspertizasından da keçib.
Sülh və Demokratiya İnstitutunun rəhbəri Leyla Yunus həyat yoldaşı Arif Yunusla xaricdə ezamiyyətdədirlər. Onlar bir müddət bundan əvvəl ofisin sökülməsi ilə bağlı məhkəmə qərarının icraatının dayandırıldığı açıqlamışdılar.
Xatırladaq ki, bir müddətdir ki, “Qış Parkı”nın salınması ilə əlaqədər Şəmsi Bədəlbəyli küçəsindəki evlərin söküntüsünə başlanıb. İşi dövlət qurumlarından ibarət köçürmə komissiyası həyata keçirdir.
Amma bəzi sakinlər, o cümlədən də Azərbaycanda insan haqlarının müdafiəsi ilə məşğul olan Sülh və Demokratiya İnstitutu bu ərazidə yerləşən mülkiyyətindən çıxmaq istəmirdi. Sakinlər rəsmilərin təklif etdikləri kompensasiyanın onların əmlakının dəyərindən az olduğunu iddia edərək, mülklərini tərk etməkdən imtina edirlər.
