Prezident İlham Əliyev Soçidə işgüzar səfərdədir
Noyabrın 26-da Azərbaycan Respublikasının Prezidenti İlham Əliyev Rusiya Federasiyasının Prezidenti Vladimir Putinin dəvəti ilə Rusiya Federasiyasının Soçi şəhərinə işgüzar səfərə gəlib.
Xatırladaq ki, görüş ərəfəsində Kremlin mətbuat xidməti Soçi danışıqlarının gündəmində nələrin yer alacağına dair bəyanatla çıxış edib. Orada bildirilir ki, Rusiya prezidenti Vladimir Putin, Azərbaycan prezidenti İlham Əliyev və Ermənistanın baş naziri Nikol Paşinyan arasında Qarabağda hərbi əməliyyatların dayandırılmasına dair 10 noyabr 2020-ci ildə imzalanmış üçtərəfli bəyanatın bir illiyinə həsr edilmiş üçtərəfli danışıqlar noyabrın 26-da Soçidə baş tutacaq. Kremlin mətbuat xidməti bu görüşün Rusiya dövlət başçısının təşəbbüsü ilə keçirildiyini vurğulayır.
Bəyanatda deyilir ki, danışıqlarda 2020-ci il 10 noyabr və 2021-ci il 11 yanvar üçtərəfli razılaşmalarının həyata keçirilməsininin gedişinə nəzər salmaq, habelə regionda stabilliyin möhkəmləndirilməsi və dinc həyatın bərqərar olması istiqamətində sonrakı addımları müzakirə etmək planlaşdırılır. Bu zaman ticarət-iqtisadi və nəqliyyat əlaqələrinin bərpası və inkişafı məsələlərinə xüsusi diqqət ayrılacaq.
Rusiya prezidentinin mətbuat xidməti onu da bildirir ki, Putinin Əliyev və Paşinyanla ayrıca söhbətləri də nəzərdə tutulur.
