Səadət Cahangir şeiri: “…yenə hər şey yarımçıq”
Həyat eyni axarda,
yenə hər şey yarımçıq-
bir az havadan, sudan,
yenə çatışmır nəsə,
nəsə əskik Tanrıdan…
yenə donur əllərim,
ruhu üşüyür səni
xatırladan hər şeyin,
inanmasan, özün gəl,
iqlimi sıfırladan
bu soyuğu al geyin…
yenə çatışmır nəsə,
quşlar köçlənib gedir
buralara qonmamış,
yağmurlar yağıb keçir
içimə toxunmamış…
yenə hər şey yarımçıq,
havadakı bu kədər,
bu sarılıq tanışdı,
yenə uzaqlardasan,
dilimdə o misra var-
“bir gün qayıdacaqsan…”
nə gözəl aldanışdı…
Xural.com
