Sən, ey səcdəgahım mənim-ELÇİBƏY YAZI MÜSABİQƏSİNƏ
Böyük türk ƏBÜLFƏZ ELÇİBƏYin 80 illik yubileyinə
Elçibəyim, ey öndərim,
Ey saflığın nümunəsi,
Sənin ruhundan süzüldü,
Azərbaycanın haqq səsi.
Elçibəyim, ey öndərim,
Ey milyonların mürşidi,
Sən sağ ikən olandansan
Milli azadlıq şəhidi.
Elçibəyim, ey öndərim,
Ey peyğəmbər şahım mənim!
Ey üzü Allahın nuru,
Əməli salehim mənim!
Millətə ucalıq verən
Misilsiz bir dahim mənim!
İnsan kimi doğulmadın,
Doğdun Aytək, Günəş kimi.
Qolumdakı zəncirləri
Doğradın lap atəş kimi.
Düşüncəndə millət vardı,
Ürəyində qüdrət vardı.
Məmməd Əmin ruhusan sən,
Hər sözündə hikmət vardı.
Görürdün bəsirətinlə,
Şəfəq saçan istiqbalı,
Sənə doğma hədəf idi
Millətlərin istiqlalı.
Bilirdim ki, açılacaq
O xoşbəxt sabahım mənim.
Bu, qismətdi, doğubsan sən
Ulu Ulgenin ruhundan,
Haqq əmriylə törəyibsən
Oğuzların öz belindən.
Sən vərəq-vərəq oxunan
Tarixisən millətimin.
Hər görüşdə, hər çıxışda
Qayəsisən söhbətimin.
Min əzabdan keçmisən sən,
Zəfər durur qabağında.
Hüququdur bu, üçrəngli,
Ay-ulduzlu bayrağın da.
Təfsirin millət sevgisi,
Olubdur silahım mənim.
İndi hamı bayram edir
Yaşıyın səksən ilini.
Bəlkə səksən min il əvvəl
Şad eyləmisən elini.
Deyirlər, Mu qitəsində
Varıymış Günəş ölkəsi.
Başında da dayanırmış,
Yenilməz türk sərkərdəsi.
Yoxsa, Teoman, Metemi,
Babəkin özüydünmü sən?
Tarix boyu hayqırmısan
Daim Vətən, Vətən, Vətən!
Yuxumda da, əyanda da
Olursan pənahım mənim.
İmzan var mübarizədə,
Söz yox qeydimin üstündən.
Bu yurda gələn işğalçı
Keçər meydimin üstündən.
Hər müridin bir ordudur,
Yaşayırıq əqidənlə.
Nəfsimiz kəlam axtarır,
İşimiz yox ucuz dənlə.
Sənin qoyduğun miraslar
Bəlkə ən saf siyasətdi.
Allahın “Yaran” əmrinə
Sədaqətdi, mərhəmətdi.
Elə bunca müqəddəsdir
Ulu qibləgahım mənim.
Düşünürəm, sən dərgahda
Qırxların öz dəstindəsən.
Ədalətli amalıyın
Orada da üstündəsən.
Sözüyün əvvəli, sonu
Tanrıya söyləyirsən can,
Amma hər ikinci kəlmən
Müdam olur Azərbaycan.
Bilirəm kövrəkliyin var,
Qəlbin yamanca yuxadı.
Bəşəri sevgilər səndə
Coşqun çay kimi axadı.
Ürəklərdə heykəlin var,
Sən ey səcdəgahım mənim!
Elbəyi Cəlaloğlu, Bakı, 15.06.2018
Yazı “Elçibəy-80” yazı müsabiqəsinə təqdim edilir
Xural.com