Səadət Cahangir şeirləri: “Nə gedənlər qayıdar, nə gözlənənlər gələr…”

bir şəhərdi, dənizi
qapalı ayrılıqla,
yoxsa üzüb gələrdim
balaca bir qayıqla…

bu axşam sənə küsmüş
ürəyimə dedim ki,
bir az da səndən çəkim,
nələrdən çəkmədim ki…

doyurdum acıları,
qəhri, tütünü çəkdim,
yandıqca su çilədim,
üstdən ütünü çəkdim…

çəkdim, elə cızladı,
gözümdən yaşı çıxdı,
“qəlb” dedik, yana-yana
qapqara daşı çıxdı…

bir az da səndən çəkim,
çəkim elə tən gələr,
bəlkə gedənlər dönər
və gözlənənlər gələr…