Tərbiyəsiz Süleymanın əxlaqını DIN bölüşür

anar niftəliyevAnar Mahmudoğlu

Cənab Usubov sifətinin eybəcər görünməsində niyə bu qədər maraqlıdır?!

Millət vəkili Sabir Rüstəmxanlının təşəbbüsü ilə Urumçidə Türklərə qarşı soyqırıma etiraz əlaməti olaraq, Çin səfirliyinin qarşısına qara çələng qoymaq üçün getdik. Cəmi iki maşın idik. Nəzərə alsaq ki, iri dəmir çərçivədə çələng də aparırdıq, sayımızın 8-i ötmədiyini təxmin edə bilərsiniz. Piket üçün icazə verilməmişdi, ona görə də bir neçə adamla səfirliyin önünə əklil buraxıb gedəsiydik.

Bizi olay yerində jurnalistlər və polislər qarşıladı. Nə şüar qışqırdıq, nə də plakat qaldırdıq – zatən, “asayişi pozmaq” ittihamı üçün kimsəyə fürsət vermək niyyətində deyildik. Səfirliyin qapısına doğru yaxınlaşanda polislər önümüzə keçdi. Əklil aparanları mədəniyyətlə (səmimi deyirəm) saxladılar, sonra içlərindən çəkisinə və çiynindəki ulduzunun sayına görə fərqlənən biri Sabir bəyə yaxınlaşdı: “Sabir müəllim, piketə icazə verilməyib, sizi buraxa bilmərik”.

Sabir bəy iştirakçıları göstərib, “5 adamla piket keçirilmir” dedi: “Çindəki qırğınlara etiraz əlaməti olaraq qara çələngi səfirliyin qapısı önünə qoyub gedəcəyik”.

Zabit şüar səsləndirilməyəcəyinə inandı, ya da sözümüzdən tutdu: “Sizə inanıram, Sabir müəllim. Amma yenə xahiş edirəm ki, ləngiməyin!”

Adam balası adam olduğunu nümayiş etdirən zabitlə qısa dialoqu yekunlaşdırıb cəmi 3-4 addım atmışdıq ki, “022″ nömrəli, ağ rəngli xarici maşından mülki geyimli bir ipləmə düşüb dəli kimi – inanın ki, heç bir bənzətmə-filan yoxdur! – üstümüzə şığıdı, hamını itələməyə, vurmağa, təhdid etməyə, söyməyə başladı.

Donub qalmışdıq: Bu zırrama kimdir? Nə istəyir? Axı, biz ki polislərlə anlaşdıq!

Bayaqdan lal-dinməz, sakitcə bizi müşayiət edən polislər bir anda dəyişdilər: Ipləmənin göstərişi ilə 2-3 nəfəri polis maşınına sarı sürüməyə başladılar.

Nə baş verdiyini anlayana qədər “ipləmə-zırrama” artıq Sabir bəyin önündə idi. Rüstəmxanlının “sən kimsən, niyə belə eləyirsən?” təəccübqarışıq sualına dişini qıcadı, sağ əlini düyünləyib sol ovcuna çırpa-çırpa təhqirlər yağdırmağa başladı.

Tanımadığını düşünmək mümkün deyildi, Sabir bəyə adıyla müraciət edirdi.

Onun söyüş və təhqirlərini burda yaza bilmərəm. Yazsam, bir polis işçisinin bu boyda əxlaqsız söyüşləri qarşısında lal-dinməz durduğumuza görə bizi qınayarsız!

Bir-iki ziyalı onun önünə keçib sakitləşdirməyə çalışdı. Adam – ona adam dediyimə görə Ramil Usubovdan üzr istəyirəm – dişlərini qıcaya-qıcaya dəli kimi fırlandı, böyrümüzdəki avtomobilləri (bizim maşınlar deyildi) döyməyə – təpikləməyə, yumruqlamağa başladı. Söyüşlərinin mərtəbəsini artırdı, sırasını genişləndirdi, ziyalıların “biz Türklərin qırılmasına etiraz edirik, sən nə əl qatmısan özünə?” sözlərini alıb, bütün Türkləri öz tərbiyəsinə qonaq elədi.

Ilk dəfə onda Sabir bəyin əsəbiləşdiyini gördüm: “Sən kimsən ki, bu millətin qurduğu dövlətin çörəyini yeyib, bu milləti söyürsən?..”

Onun söyüşləri kimi, yumruqlarına da qonaq olmamaq üçün uzaqlaşmaqdan ayrı əlac qalmadı.

Şəkillər çəkilmişdi, videogörüntülər vardı və adamın – yenə ona adam dediyimə görə Ramil Usubovdan üzr istəyirəm – kimliyini tapdıq: Nəsimi Rayon Polis Idarəsinin şəxsi heyət üzrə rəis müavini, polkovnik-leytenant Süleyman Nemətov!
Daxili işlər naziri Ramil Usubova müraciət etdik – Süleymanın dəli, ipləmə olduğunu göstərən şəkilləri (maşınları yumruqlamasını, Sabir bəyin üstünə şığıdığı anları əks etdirən görüntüləri) fakt kimi məktuba əlavə edib tədbir görülməsini xahiş etdik.

Bir neçə aydan sonra Türkiyə səfirliyinin qarşısında “Xural” qəzetinin baş redaktoru Əvəz Zeynallını döyən Süleyman Nemətovun üzrü qəbahətindən betər “elə bildim Sabir Rüstəmxanlısan, ona görə vurdum”, “Sabir Rüstəmxanlını sınıq-sınıq edərəm” etirafından xəbər tutdum ki, zabit adına ləkə olan Ipləmə Süleyman cəzalandırılmayıb!

Növbəti məktub hazırladıq – yenə də sübutlarla, dəlillərlə birlikdə göndərdik!

Aradan bir ilə yaxın vaxt keçir və Şəhidlərin anım günündə Isa Qəmbərin təhqir olunmasından bildim ki, Zırrama Süleyman yenə də Daxili Işlər Nazirliyinin sıralarında xidmət edir!

Görünən nədir?

Anlayıram ki, Süleyman Nemətovun cəzalandırılmaması əslində, Daxili Işlər Nazirliyinin sifətinin Süleyman Nemətov olmasından irəli gəlir!

Amma anlamıram ki, cənab Usubov sifətinin eybəcər görünməsində niyə bu qədər maraqlıdır?!

“Azadlıq” qəzeti, 27 yanvar 2011-ci il

“Xural” qəzeti
il: 9, sayı: 004(412), 30 yanvar – 05 fevral 2011-ci il

Əlaqəli məqalələr

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Back to top button