Tərtərlə Bərdə İcra hakimlərinin arasında qalan qaçqın ailəsinin fəryadı – FOTO
xural.com-un email ünvanına şikayət məktubu daxil olub. Məktubda bildirilir ki, Bərdə rayonunda yaşayan, Kəlbəcərdən olan qaçqın Famil İsmayılov ailəsi ilə birlikdə yüksək gərginlikli elektrik xəttinin altında, yanacaqdoldurma məntəqəsinin yanında kiçik, qəzalı bir evdə yaşayır.
O, dəfələrlə Qaçqınların və Məcburi Köçkünlərin İşləri üzrə Dövlət Komitəsinə, Bərdə Rayon İcra Hakimiyyətinə müraciət etsə də, ona, prezidentin sərəncamı ilə Bərdədə qaçqınlar üçün tikilən evlərdən verilməyib, adı sihayıya da salınmayıb.
Səbəb kimi isə onun Bərdə yox, Tərtər rayonunda qeydiyyatda olması göstərilir.
Məsələ ilə bağlı açıqlama verən Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimov da Famil İsmayılovun Bərdə rayonunda qeydiyyatda olmadığını dedi:
“Onun qeydiyyatı Tərtər rayonundadır. Ancaq yaşadığı ərazi Bərdədir, kommunal xidməti də Bərdədən istifadə edir. Həmin ailə Bərdədə dəmiryol xəttinin kənarında yaşayır. Siz deyirsiniz yanacaqdoldurma məntəqəsinin yanında yaşayır. O ailənin əvvəlcə balaca bir daxması olub, sonra evini böyüdüb. Digər bir tərəfdən Bərdə rayonu ərazisində heç bir köçürülmədən söz gedə bilməz. Hələ köçürülməyə başlanılmayıb”.
E.Qədiov Famil İsmayılovun qeydiyyatının Tərtər rayonuna olduğunu desə də Qaçqınların və Məcburi Köçkünlərin İşləri üzrə Dövlət Komitəsinin sturukturları bir-birindən xəbərləri olmadan fəaliyyət göstərdiyi ortaya çıxıb. Belə ki, Qaçqınların və Məcburi Köçkünlərin İşləri üzrə Dövlət Komitəsinin Bərdə üzrə nümayəndəsi Sərdar Zeynalov Qaçqınların və Məcburi Köçkünlərin İşləri üzrə Dövlət Komitəsi Bərdə Rayon Nümayəndəliyinin möhürü ilə Əmək və Əhalinin Sosial Müdafiəsi Nazirliyinə təqdim etmək üçün F.İsmayılova arayış verib.
Hüquqşünas Ələsgər Məmmədli bildirib ki, qanunvericiliyə görə, sənədlərin bu və ya digər şəkildə saxtalaşdırılması yolverilməzdir: “Əgər həmin şəxs məcburi köçkün kimi Bərdədə qeydiyyatda deyilsə o zaman ona elə bir sənədin verilməsi doğru deyil. Bu da sənədin saxtalaşdırılması hesab olunur. Qanunvericiliyə görə də məsuliyyət daşıyır”.
Hüquqşünas Adil Minbaşıyev də bildirib ki, həmin sənədin verilməsinə görə Qaçqınların və Məcburi Köçkünlərin İşləri üzrə Dövlət Komitəsinin Bərdə rayonunda olan nümayəndəsi məsuliyyət daşıyır.
Başqa bir hüquqşünas Yavər Hüseynli də deyib ki, qaçqınların hansı rayonda qeydiyyatda olması kompüterdə sistemdə qeyd olunub: “Əgər Tərtər qeydiyyatındadırsa Bərdə rayonundan arayış verilməli deyil. Verirsə məsuliyyətini daşıyır”.
E.Qədimov eyni zamanda deyir ki, F.İsmayılov Qaçqınların və Məcburi Köçkünlərin İşləri üzrə Dövlət Komitəsinin müraciət etməyib, müraciət etdəndən sonra onun şikayətinə baxılacaq:
“Həmin ailə komitəyə müraciət eləsin, bizim qaynar xəttimiz var, “e-Mail” adreslərimiz var. Problemi yazıb komitəyə göndərsin. Yazıbsa qanunvericiliyə uyğun olaraq araşdırılıb tədbir görülür, cavab verilir”.
Famil İsmayılov isə Qaçqınların və Məcburi Köçkünlərin İşləri üzrə Dövlət Komitəsinə bu ilin 12 may tarixində müraciət edib.
Məsələnin araşdırıldığını bildirən E.Qərimovun xəbəri yoxdur bəlkə də, ancaq S.Zeynalov Famil İsmayılova deyib ki, “siz evlə təmin olunmamalısınız. Məni xərcə salıb bura niyə gətirirsiniz?”
Elçin Qədimov açıqlamasında israrla bildirir ki, Famil İsmayılov öz evini böyüdüb:
– Əvvəl evi balaca idi, indi tikib böyüdüb. Mən rayon İcra Hakimiyyəti ilə əlaqə saxladım, o dedi ki, böyüdüb.
Ancaq fotolardan da aydın görünür ki, F.İsmayılov kiçik bir evdə yaşayır.
Famil İsmayılovun övladları Bərdə rayonunda məktəbə gedir, o, artıq 17 ildir ki, burada yaşayır, arayışları burada alır. İndi Qaçqınların və Məcburi Köçkünlərin İşləri üzrə Dövlət Komitəsinin Bərdə rayonu üzrə nümayəndəsi Sərdar Zeynalov deyir ki, “siz burada qeydiyyatda deyilsiniz”. Bəs, S.Zeynalov niyə arayış verirdi? Özü də “Qaçqınkom”un Bərdə Rayon Nümayəndəliyinin möhürü ilə…
