Taleh Bağırzadə əlaqə saxladı: “Abbas Hüseynovun vəziyyəti yaxşı deyil”

Qobustandakı qapalı həbsxanada saxlanılan Nardaran məhbuslarından Müsəlman Birliyi Hərəkatının sədri, ilahiyyatçı Taleh Bağırzadə, Abbas Hüseynov və Cabbar Cabbarovun yaxınları onlar haqqındakı narahatlıq yaradan xəbərləri dəqiqləşdirmək üçün həbsxanaya gediblər. Məhbus ailələri ilə yanaşı ictimaiyyət nümayəndələri, jurnalistlər də həbsxanaya gedib.

Onları həbsxananın qarşısında rəis Avtandil Ağayev və digər əməkdaşlar qarşılayıb. Ağayev ailələrə yaxınları ilə görüşməyə imkan verməyib. Ailə üzvlərinin israrlı tələbindən sonra həbsxananın rəisi Penitensiar Xidmətlə əlaqə saxlayıb. Daha sonra məhbus ailələrinə bildirib ki, onları Penitensiar Xidmətdə qəbul edəcəklər.

Bundan sonra Nardaran məhbuslarının yaxınları Penitensiar Xidmətə yollanıblar. Onları orada Fikrət Vəliyev qarşılayıb, ardınca rəis müavini ilə görüşüblər.

Taleh Bağırzadənin həyat yoldaşı Leyla İsmayılzadənin “Azadliq.info”ya bildirdiyinə görə, rəis müavini onları əmin edib ki, bir qədər sonra ilahiyyatçı ailə üzvləri ilə əlaqə saxlayacaq, sabah isə onlar həbsxanada görüşə biləcəklər: “Dedik ki, mümkündüsə, elə indi sizin otağa zəng eləsinlər, bir kəlmə ilə səsini eşidib, salamat olduğunu bilək. O, etiraz elədi, dedi ki, mənim otağım görüş yeri deyil. Biz otaqdan çıxdıq. Düşündük ki, bizi sadəcə, yola vermək üçün zəng edəcəyini dedilər. Amma evə gələndən sonra həqiqətən əlaqə saxladı. Şükür ki, salamatdır. Amma bildirdi ki, Abbasın vəziyyəti yaxşı deyil, mütləq vəkilləri gəlib görüşsün. Abbas da hazırda “kars”dadı”.

Azadliq.info