Traktor minaya düşüb, xəsarət alan var
Avqustun 24-də Azərbaycanın Xocalı rayonunun Sığnax kəndində kənd təsərrüfatı işlərini yerinə yetirərkən traktorun tank əleyhinə minaya düşərək partladığı bildirilir. Baş Prokurorluqdan verilən məlumata görə, hadisə zamanı traktorçu, 1987-ci il təvəllüdlü Əfqan Ələkbərli xəsarət alıb.
Sığnaxdan yaxınlıqda yerləşən Şuşa şəhərinə yol keçir. Rəsmi açıqlamaya Ə.Ələkbərlinin yaxınlarından münasibət almaq mümkün olmayıb.
Azərbaycanın rəsmi qurumlarının bildirməsinə görə, 10 noyabr sazişindən sonra ölkənin 40-dan çox vətəndaşı minaya düşərək həlak olub, 150-dən çoxu isə müxtəlif xəsarət alıblar. Onlar habelə əvvəl qeyd edirdilər ki, Ermənistan işğaldan azad olunan ərazilərdə minaların xəritəsini vermir. Amma sonra Azərbaycanda saxlanılan Ermənistan hərbçilərindən bəzilərinin geri təhvil verilməsi əvəzi işğaldan azad edilən bir sıra rayonlarında minalanmış ərazilərin xəritələrinin alındığı bildirildi. Hərçənd, sonra da Azərbaycan rəsmiləri bu xəritələrin böyük ölçüdə reallığı əks etdirmədiyini vurğuladılar. Buna cavab olaraq da Ermənistan Baş naziri dedi ki, onlar əllərində olan xəritələri Azərbaycana veriblər.
2020-ci il sentyabrın 27-də Azərbaycan və Ermənistan silahlı qüvvələrinin təmas xəttində ağır döyüşlər başlamışdı. 44 günlük bu müharibə, sonrakı razılaşma nəticəsində Azərbaycan Dağlıq Qarabağın bir hissəsinə (Xocalı rayonun bir neçə kəndi daxil) və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya rəhbərləri arasında) əsasən, Laçın dəhlizində və qoşunların təmas xəttində Rusiya sülhməramlıları yerləşdirilib.
Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.
