Azərbaycan Ordusunun əsgəri həlak olub, xəsarət alan da var
Sıldırım qayalıqlardan qopan qaya parçası müddətli həqiqi hərbi xidmət hərbi qulluqçuları əsgər Samir Səməd oğlu Xudiyevin və əsgər Tahir Çingiz oğlu Əliyevin üstünə düşüb
Avqustun 5-də Laçın rayonunda bir Azərbaycan hərbi quluqçusunun həlak olduğu, başqa birinin isə xəsarət aldığı bildirilir.
Bu barədə Azərbaycan Müdafiə Nazirliyinin məlumatında qeyd edilir ki, çətin relyefli ərazidə xidməti döyüş tapşırığını yerinə yetirərkən sıldırım qayalıqlardan qopan qaya parçası müddətli həqiqi hərbi xidmət hərbi qulluqçuları əsgər Samir Səməd oğlu Xudiyevin və əsgər Tahir Çingiz oğlu Əliyevin üstünə düşüb.
Məlumata görə, nəticədə əsgər S.Xudiyev aldığı bədən xəsarətlərindən hadisə yerində vəfat edib. Müxtəlif bədən xəsarətləri almış əsgər T.Əliyevin vəziyyəti isə ağır qiymətləndirilir.
Faktla bağlı cinayət işi açıldığı, araşdırma aparıldığı bildirilir.
Amma bu rəsmi məlumata, hələlik, həmin hərbi qulluqçuların yaxınlarından münasibət almaq mümkün olmayıb.
