İşxan Saqatelyan: “Ermənistanın türkləşməsinə imkan verməyəcəyik”
Müxalifətçi qeyd edib ki, təmsil etdiyi partiya Türkiyə ilə münasibətlərin normallaşmasının əleyhinə deyil, Ankaraya hər hansı güzəştə getməyə qarşıdır.
“Hayastan” müxalifət blokunun və “Daşnaksütyun” partiyasının nümayəndəsi İşxan Saqatelyan bildirib ki, müxalifət Ermənistan-Türkiyə danışıqlarını və Ermənistan tərəfinin mümkün güzəştlərini iflasa uğratmaq niyyətindədir. O, bu barədə parlamentdə keçirdiyi brifinqdə bildirib.
Jurnalistlərin onun da qoşulduğu siyasi qüvvələrin bunu konkret olaraq necə etmək niyyətində olduğunu soruşduqda, Saqatelyan bildirib ki, mitinqlərdən tutmuş digər aksiyalara qədər geniş vasitələrdən istifadə olunacaq.
“Bu, ölkəmiz üçün fəlakətli gündəmdir və biz Ermənistanın türkləşməsinə imkan verməyəcəyik”, – deyə müxalifətçi bildirib.
Bu kontekstdə o vurğulayıb ki, Daşnaksütyun Türkiyə ilə münasibətlərin normallaşmasının əleyhinə deyil, Ankaraya hər hansı güzəştin əleyhinədir. Onun sözlərinə görə, ölkə hakimiyyəti həqiqətən istəsələr də, Ermənistanın maraqlarını müdafiə edə bilmir, bu da münasibətlərin normallaşmasının erməni maraqları hesabına həyata keçiriləcəyi deməkdir.
“Əgər bu hakimiyyətin danışıqları nəticəsində biz Qarabağın böyük hissəsini itirmişiksə, indi Ermənistanın özünün mövcudluğu təhlükə altındadır”, – deyə Saqatelyan vurğulayıb.
Xatırladaq ki, yanvarın 14-də Moskvada Ermənistan və Türkiyənin xüsusi nümayəndələrinin ilk görüşü baş tutub. İrəvanı parlamentin vitse-spikeri Ruben Rubinyan, Ankaranı ABŞ-dakı keçmiş səfir Serdar Kılıç təmsil edib. Tərəflər danışıqları konstruktiv və müsbət adlandırıb, müvafiq kanallar vasitəsilə yeni təmasların yeri və şərtlərini razılaşdırmağa söz veriblər.
