“Nərmin işi”ndə qərar: İlkin Süleymanov 18-il azadlıqdan məhrum edildi!
Dadaş İmanovun sədirliyi ilə keçirilən son məhkəmə prosesində hakim İ.Süleymanovu ona qarşı irəli sürülən ittihamlarla təqsirli bilərək 18 il azadlıqdan məhrum etmə cəzası ilə cəzalandırıb. Məhkəmə prosesi təxminən 20-dəq çəkib və hakim qərarını açıqlayıb.
Xatırladaq ki, Tovuz rayonunun Dondar Quşçu kənd sakini N.Quliyeva 2019-cu il noyabrın 21-də itkin düşüb, onun meyiti 2020-ci il yanvarın 6-da yandırılmış halda tapılıb. 2020-ci il yanvarın 10-da isə hadisəni törətməkdə şübhəli bilinən Dondar Quşçu kənd sakini, 1973-cü il təvəllüdlü İ.Süleymanov saxlanılaraq istintaqa cəlb edilib. Ona Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələrində nəzərdə tutulan ittiham elan olunmuşdu.
Ilkin Süleymanov ona qarşı irəli sürülən ittihamların heç birini qəbul etməmiş, ilkin ifadə alınan zaman ona qarşı zor tətbiq edildiyini bildirmiş və bu cinayətdə onun deyil, yüksəkvəzifəli məmurların əli olduğunu dəfələrlə bəyan etmişdi.
Azərbaycanda fəaliyyət göstərən və İlkin Süleymanovun məhkəmə prosesində əvvəldən axıradək iştirak edən bütün beynəlxalq təşkilatların, səfirliklərin nümayəndələri prosesin sonunda İlkin Süleymanovun günahsız olduğu qənaətinə gəldikləri qeyd ediblər.
