NATO Egey dənizində “anti-miqrasiya” əməliyyatına başlayır
NATO Avropa İttifaqının qaçqın problemi və miqrasiya böhranına reaksiyasını dəstəkləmək qərarına gəlib.
Xural.com azertag.az-ın Vesti.ru saytına istinadla xəbər verir ki, təşkilatın Baş katibi Yens Stoltenberq iki həftə əvvəl NATO ölkələrinin müdafiə nazirlərinin Almaniya, Yunanıstan və Türkiyənin təklifinə cavab olaraq təcili qərar qəbul etdiyini bildirib. O, alyansın Egey dənizində qanunsuz dövriyyə marşrutu və qanunsuz miqrasiyanın qarşısını almaq istiqamətində beynəlxalq səylərdə iştirak edəcəyini deyib.
NATO-nun mənzil qərargahı tərəfindən fevralın 25-də yayımlanan kommünikedə qərarın qəbul olunmasından 48 saat sonra alyansın ikinci daimi dəniz qrupunun Egey dənizinə gəldiyi qeyd olunur. Qrup kəşfiyyat və nəzarət fəaliyyəti ilə məşğul olacaq, topladığı məlumatları müvafiq milli qurumlara ötürəcək. Stoltenberqin fikrincə, bu, qanunsuz şəbəkələrə qarşı daha effektiv mübarizə aparmağa imkan verəcək. NATO, həmçinin Avropa İttifaqının “Frontex” sərhədçi agentliyi ilə də birbaşa əməkdaşlıq etmək niyyətindədir.
Kommünikedə qeyd olunur ki, alyans mühacirləri daşıyan gəmiləri geri göndərməyəcək, sadəcə, Yunanıstan və Türkiyənin sahil mühafizə xidmətlərini informasiya ilə təmin edəcək.