Rəsmi: Azərbaycan 95 hərbçinin nəşini Ermənistana təhvil verib
Yayımlandı: 20 Sentyabr 2022 14:01
Təhvildən öncə meyitlərə baxış keçirilib
95 hərbçinin meyitini Ermənistana təhvil verilib. Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatına http://human.gov.az/az/media/xeberler/xeber.html?newsID=146 görə, 12-14 sentyabr tarixlərində Azərbaycan-Ermənistan sərhədində baş verən atışmada həlak olan erməni hərbi qulluqçularına aid meyitlərin axtarışı həyata keçirilib.
Məlumatda deyilir ki, sentyabrın 20-də 95 erməni hərbçisinin meyitinə Hərbi Prokurorluğun iştirakı ilə baxış keçirildikdən və onların üzərində hər hansı zorakılıq əlamətlərinin olmaması müəyyən edildikdən sonra Beynəlxalq Qızıl Xaç Komitəsinin vasitəçiliyi ilə Ermənistan tərəfinə təhvil verilib.
“Ermənistan hərbçilərinin cəsədlərinin qarşı tərəfə təhvil verilməsi ilə bağlı humanitar proses davam etdiriləcəkdir”, – deyə məlumatda vurğulanır.
Xatırlatma
2020-ci ilin sentyabrında Azərbaycan və Ermənistan silahlı qüvvələri arasında qarşıdurma başlayıb.
Ümumilikdə 44 gün sürən və İkinci Qarabağ müharibəsi adlandırılan münaqişədə hər iki tərəfdən 6 mindən artıq hərbçi həlak olub.
Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib.
Həmin ilin 10 noyabr bəyanatına (Azərbaycan, Ermənistan və Rusiya arasında imzalanıb) əsasən, döyüşlər dayandırılıb.
Bundan sonra Laçın dəhlizində və Qarabağda Rusiya sülhməramlıları yerləşdirilib.
İkinci Qarabağ müharibəsindən öncə, 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu Ermənistanın nəzarətinə keçmişdi.
Münaqişə SSRİ dönəmindən Ermənistanın Azərbaycana qarşı ərazi iddiaları ilə başlayıb.
