Ehtiram İlhamdan duyğu yüklü bir şeir: “ƏLVİDA!”
Ehtiram İlham
Səni gündüz işığında
Çıraqnan gəzdim, əlvida.
Dolanıb, axtarıb, tapdım –
Əlimi üzdüm, əlvida.
Ömrümdə bir vaxt var idi,
Bir qurulu taxt var idi…
Az var idi, çox var idi,
Hər şeydən bezdim, əlvida.
Tapdığıma şükür dedim,
Nuş-cannan ruzumu yedim.
Bir kimsədən incimədim –
Bəxtimdən küsdüm, əlvida.
Yalanlar sonsuz, doğru min,
Başından keçdim ağrımın.
Sənin adını bağrımın
Başına yazdım, əlvida.
Sevincin olarsa yasım –
Məni günahımdan asın.
Allah məni bağışlasın,
Yolumdan azdım, əlvida.
Məni nəynən aldın satın?
Dilindənmi qopdu adım?
…Günaydın, dostum, günaydın!
Əlvida, dostum, əlvida!
12.05.2019
Xural.com
