Prezident polisləri Akademiyada təbrik etdi

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev mərasimdə iştirak edib. Polis Akademiyasına gələn İ.Əliyevə daxili işlər naziri, general-polkovnik Ramil Usubov raport verib. Prezident İlham Əliyev ulu öndər Heydər Əliyevin Akademiyanın baş meydanında ucaldılmış abidəsi önünə gül dəstəsi qoyub.

Sonra prezident Heydər Əliyev Mərkəzinin  açılışını rəmzi bildirən lenti kəsib.

Prezident İlham Əliyev Mərkəzdə yaradılmış şəraitlə tanış olub. Məlumat verilib ki, Azərbaycan Prezidentinin 2009-cu il 22 may tarixli Sərəncamı əsasında yaradılmış Mərkəz ümummilli lider Heydər Əliyevin zəngin dövlətçilik fəlsəfəsinin, azərbaycançılıq məfkurəsinin öyrənilməsi, geniş təbliği məqsədi ilə fəaliyyətə başlayıb. Mərkəzin üçmərtəbəli binasında ulu öndər Heydər Əliyevin büstü qoyulmuş, onun həyat və fəaliyyətinin müxtəlif dövrlərini, eləcə də Prezident İlham Əliyevin ölkəmizin inkişafı istiqamətində gördüyü işləri əks etdirən stendlər quraşdırılıb. Mərkəzin üçüncü mərtəbəsində şahmat dərnəyi, virtual sinif, xaric dil mərkəzi, ümummilli lider Heydər Əliyev irsinin öyrənilməsi mərkəzi, elektron kitabxana və fotostudiya fəaliyyət göstərir.

Daha sonra prezident Mərkəzin akt zalında Daxili İşlər Nazirliyinin əməkdaşları ilə görüşdü. Prezident, Ali Baş Komandan İlham Əliyev tədbirdə çıxış edib. Daxili işlər naziri, general-polkovnik Ramil Usubov Azərbaycan polisinin inkişafına göstərdiyi yüksək diqqət və qayğıya görə Prezident İlham Əliyevə minnətdarlığını bildirib. Sonda xatirə şəkli çəkdirilib.