VHP sədri İraq parlamentinin keçmiş deputatı ilə görüşüb
Vətəndaş Həmrəyliyi Partiyasının sədri Sabir Rüstəmxanlı İraqın Türkmaneli Partiyasının sədri, İraq parlamentinin keçmiş deputatı Riyaz Sarıkahya ilə görüşüb. Görüşdə İraqda, Kərkükdə, Azərbaycan və türk dünyasında baş verənlərlə bağlı fikir mübadiləsi aparılıb.
Partiyadan verilən məlumata görə, Riyaz Sarıkahya türkmanların vəziyyəti, bölgədə keçirilən son referendum və ondan sonra Kərkükdə yaranan vəziyyət haqda geniş məlumat verib. Bildirib ki, Azərbaycan və Türkiyə Kərkükün taleyinə biganə olmamalı, sahib çıxmalıdır.
Sabir Rüstəmxanlı Azərbaycandakı ictimai-siyasi vəziyyətlə bağlı qonaqları məlumatlandırıb.
Səmimi keçən görüşdə partiyaların əməkdaşlıq məsələsi müzakirə olunub, həmçinin İraqda, İranda və Suriyada yaşayan türklərin gələcək durumu ətrafında geniş fikir mübadiləsi aparılıb. Xüsusən türkmanların ciddi dəstəyə ehtiyacı olduğu vurğulanıb.
Görüşdə VHP Mərkəzi İcra Aparatının rəhbəri Samir Əsədli, Türkməmeli Partiyasının təmsilçiləri Şahlar Azaroğlu və Yahya Ali Mehdi iştirak ediblər.(musavat.com)
