Gənclər «Fəvvarələr meydanı»nda aksiya keçirdi
“Azadlıq” radiosu
3 dekabr 2011
Dekabrın 3-də bir qrup gənc paytaxtın mərkəzində – «Fəvvarələr meydanı»nda aksiya keçiriblər.
Aksiyaçılar «Əsgər ölümlərinə YOX deyək!», «Şəhidlər ölməz, Vətən bölünməz!» şüarları səsləndiriblər, Azərbaycan himnini oxuyublar.
Aksiyaçılarla polis və mülkigeyimlilər arasında qarşıdurma yaranıb.
«Azərbaycan» kinoteatrının qarşısında başlayan aksiya Nəsimi heykəlinə qədər davam edib.
Aksiya zamanı Müsavat Gənclər Təşkilatının üzvləri Rauf Məmmədov, Tural Hacıbəyli, ADP Gənclər Təşkilatının sədri Cəmil Hacıyev, üzvü Emil, «Nida» təşkilatından Kənan Qasımlı və Dia.az-ın müxbiri Vaqif Sadıqlı saxlanıb.
Saxlananlar arasında AXCP Gənclər Komitəsinin 4 üzvü də var – İlham Hüseyn, Nihad Hüseynov, Dəyanət Babayev və Elvin Baycan.
Aksiyada iştirak edən əsgər atalarından iki nəfərin də saxlandığı bildirilir.
Aksiya zamanı jurnalistlərə də təzyiqlər olub. Onlara çəkiliş aparmağa imkan verilməyib.
